ກອງປະຊຸມຄົບຄະນະ ຂອງກໍາມາທິການຍຸຕິທໍາ ປະຈໍາປີ 2020 ແລະ ວຽກງານຈຸດສຸມປີ 2021
ກອງປະຊຸມຄົບຄະນະຂອງກຳມາທິການຍຸຕິທຳ ປະຈຳປີ 2020 ແລະ ວຽກງານຈຸດສຸມປີ 2021 ຂອງກໍາມາທິການດັ່ງກ່າວ ໄດ້ຈັດຂຶ້ນໃນວັນທີ 22-23 ຕຸລານີ້ ທີ່ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ບົວຄຳ ທິບພະວົງ ປະທານກຳມາທິການຍຸຕິທຳ.
ທ່ານ ນາງ ບົວຄຳ ທິບພະວົງ ກ່າວວ່າ: ກອງປະຊຸມໃນຄັ້ງນີ້ເປັນກອງປະຊຸມເທື່ອສຸດທ້າຍຂອງສະພາແຫ່ງຊາດ ຊຸດທີ VIII ເຊິ່ງພວກເຮົາຈະໄດ້ພ້ອມກັນຕີລາຄາ, ຄົ້ນຄວ້າ ແລະ ປະກອບຄໍາເຫັນໃສ່ບາງບັນຫາສຳຄັນຄື: 1. ສະຫລຸບຕີລາຄາການເຄື່ອນໄຫວວຽກງານ 5 ປີ (2016-2020) ແລະ ທິດທາງການເຄື່ອນໄຫວວຽກງານ 5 ປີ (2021-2025) ແລະ ວຽກງານຈຸດສຸມປີ 2021. 2. ບົດລາຍງານການເຄື່ອນໄຫວວຽກງານ 5 ປີ (2016-2020) ແລະ ທິດທາງການເຄື່ອນໄຫວວຽກງານ 5 ປີ (2021-2025) ຂອງອົງການໄອຍະການປະຊາຊົນສູງສຸດ. 3. ບົດລາຍງານການເຄື່ອນໄຫວວຽກງານ 5 ປີ (2016-2020) ແລະ ທິດທາງການເຄື່ອນໄຫວວຽກງານ 5 ປີ (2021-2025) ຂອງສານປະຊາຊົນສູງສຸດ; 4. ຄົ້ນຄວ້າ ແລະ ປະກອບຄໍາເຫັນໃສ່ຮ່າງບົດປະກອບຄໍາເຫັນຂອງຄະນະປະຈໍາສະພາແຫ່ງຊາດຕໍ່ບົດລາຍງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດໃນກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII; 5. ຄົ້ນຄວ້າ ແລະ ປະກອບຄໍາເຫັນຮ່າງມະຕິຂອງກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານການເຄື່ອນໄຫວວຽກງານ 5 ປີ (2016-2020) ແລະ ທິດທາງການເຄື່ອນໄຫວວຽກງານ 5 ປີ (2021-2025) ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ທີ່ຈະນໍາເຂົ້າຜ່ານໃນກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ທີ່ຈະໄຂຂຶ້ນໃນວັນທີ 27 ຕຸລານີ້. ນອກຈາກນັ້ນ, ກອງປະຊຸມຍັງຈະໄດ້ຄົ້ນຄວ້າ ແລະ ປະກອບຄໍາເຫັນໃສ່ຮ່າງມະຕິຂອງກອງປະຊຸມຄົບຄະນະຂອງກໍາມາທິການຍຸຕິທໍາ ປະຈໍາປີ 2020 ແລະ ວຽກງານຈຸດສຸມປີ 2021 ຂອງຕົນອີກດ້ວຍ.
