ຊອກວຽກໃໝ່ ກ່ອນ ຫລື ຫລັງລາອອກ ຈຶ່ງຈະດີ ?

+ ຫາວຽກໃໝ່ໃຫ້ໄດ້ກ່ອນ ແລ້ວຈຶ່ງລາອອກ :

– ຂໍ້ດີຂອງທາງເລືອກນີ້ກໍຄື :

1. ເຮົາຍັງມີວຽກ ແລະ ມີເງິນເດືອນຮອງຮັບຢູ່ ຖ້າຍັງບໍ່ໄດ້ວຽກໃໝ່ ເຮົາຍັງເຮັດວຽກຢູ່ບ່ອນເກົ່າໄປຊຳຊາກ່ອນໄດ້ ຖ້າບໍລິສັດໃໝ່ທີ່ເຮົາໄປສະໝັກວຽກ ຫລື ສຳພາດວຽກໄວ້ເຂົາຕອບຮັບແລ້ວເຮົາຈຶ່ງຄ່ອຍມາຕັດສິນໃຈອີກເທື່ອໜຶ່ງ.

2.​ ຍິ່ງໄປສະໝັກໄວ້ຫລາຍບ່ອນ ຍິ່ງມີໂຕເລືອກໃຫ້ປຽບທຽບໄດ້ແບບບໍ່ຕ້ອງຟ້າວ ເພາະແນວໃດກໍມີວຽກໃນປະຈຸບັນຮອງຮັບຢູ່.

3. ຍັງມີອຳນາດໃນການຕໍ່ລອງຕຳແໜ່ງ, ເງິນເດືອນ ແລະ ອື່ນໆ ດີກ່ວາບໍ່ມີວຽກຫຍັງເຮັດໃນຕອນນີ້ ທັງສະຖານະຍັງຈະດີກ່ວາການເປັນຄົນວ່າງງານ.

– ຂໍ້ເສຍຂອງທາງເລືອກນີ້ມີຄື :

1. ການອອກໄປຫາວຽກ, ໄປສຳພາດວຽກ ຫລື ຕິດຕໍ່ວຽກກັບບ່ອນໃໝ່ອ່າວລຳບາກ ເພາະຖ້າລາພັກໄປຫລາຍເທື່ອຈົນຜິດ ສັງເກດ, ຫົວໜ້າຈັບໄດ້, ຂ່າວຮົ່ວໄຫລ ແລະ ອື່ນໆ ອາດຈະຖືກຫົວໜ້າ ຫລື ຝ່າຍບໍລິຫານໝາຍຫົວໄວ້ວ່າເປັນຄົນບໍ່ຮັກອົງກອນ, ຄິດຫາທາງຕີໂຕອອກຈາກ, ເຮັດໃຫ້ມີຜົນຕໍ່ການຂຶ້ນເງິນເດືອນ, ໂບນັດ, ໂອກາດດ້ານຄວາມກ້າວໜ້າ ແລະ ອື່ນໆ ເປັນຕົ້ນ.
2. ຖ້າບໍລິສັດບ່ອນໃໝ່ຕ້ອງການຄົນທີ່ມາເຮັດວຽກໄວ ອາດຈະໄປບໍ່ໄດ້ ຍ້ອນຕ້ອງຍື່ນໃບລາອອກລ່ວງໜ້າຕາມລະບຽບກັບ ບ່ອນເຮັດວຽກປະຈຸບັນ, ທັງຍັງ ຕ້ອງລໍຖ້າໃຫ້ບໍລິສັດຫາຄົນໃໝ່ມາແທນ ແລະ ສອນວຽກຄົນໃໝ່ໃຫ້ຮູ້ເລື່ອງ ແລ້ວສົ່ງມອບວຽກກັນໃຫ້ດີກ່ອນ (ເປັນໜ້າທີ່ຄວາມຮັບຜິດຊອບທີ່ເຮັດຕາມກົດລະບຽບຂອງບໍລິສັດ ແລະ ຢາກຈະລາອອກຈາກກັນດ້ວຍດີ) ເຊິ່ງແນ່ນອນວ່າຈະຫັນຫລັງໜີໄປທັນທີກໍບໍ່ແມ່ນເລື່ອງທີ່ຈົບງາມແນ່ນອນ.

+ ລາອອກແລ້ວຈຶ່ງຄ່ອຍຫາວຽກໃໝ່ :

– ຂໍ້ດີຂອງທາງເລືອກນີ້ມີຄື :

1. ມີເວລາຫາວຽກໃໝ່ໄດ້ຢ່າງເຕັມທີ່, ບໍ່ຕ້ອງຫລົບໆລີ້ໆຫົວໜ້າອອກມາຊອກວຽກ, ບໍ່ວ່າບໍລິສັດແຫ່ງໃໝ່ຈະນັດສຳພາດຈັກເທື່ອ, ຍາມໃດກໍພ້ອມຈະໄປຕາມນັດໄດ້ຢ່າງສະບາຍໃຈ.
2. ຖ້າບໍລິສັດແຫ່ງໃໝ່ຕ້ອງການຄົນທີ່ພ້ອມຈະມາເລີ່ມເຮັດ ວຽກໄດ້ໄວ ເຮົາພ້ອມຈະມາເຮັດວຽກໃຫ້ເຂົາໄດ້ຢ່າງທັນໃຈເຊັ່ນ ດຽວກັນ ເພາະວ່າງວຽກຢູ່ແລ້ວຕອນນີ້.
3. ມີເວລາໃນການກຽມໂຕສຳລັບການໄປສະໝັກວຽກຢູ່ບ່ອນໃໝ່ໄດ້ເຕັມທີ່ ເຊັ່ນ : ຫາຂໍ້ມູນກ່ຽວກັບບໍລິສັດແຫ່ງໃໝ່, ການກຽມເອກະສານສະໝັກວຽກໃຫ້ມີຄວາມໜ້າສົນໃຈຕື່ມ, ການກຽມໂຕສຳລັບການສຳພາດຢູ່ບ່ອນເຮັດວຽກໃໝ່ ແລະ ອື່ນໆ ເປັນຕົ້ນ.

– ຂໍ້ເສຍຂອງທາງເລືອກນີ້ມີຄື :

1. ອຳນາດຕໍ່ລອງຫລຸດລົງ ບໍ່ວ່າຈະເປັນເລື່ອງຂອງຕຳແໜ່ງ, ເງິນເດືອນ ແລະ ອື່ນໆຈະຫລຸດລົງ ເພາະບ່ອນໃໝ່ມັກຈະເຫັນວ່າຕອນນີ້ຜູ້ສະໝັກວຽກກໍວ່າງວຽກຢູ່ ຈຶ່ງສາມາດກົດເງິນເດືອນທີ່ຜູ້ສະໝັກຕ້ອງການລົງໄດ້ອີກ.
2. ທັງຝ່າຍບໍລິຫານບຸກຄະລາກອນ ຫລື ຝ່າຍບຸກຄົນ ຫລື ຜູ້ບໍລິຫານທີ່ເປັນກຳມະການສຳພາດຢູ່ບໍລິສັດແຫ່ງໃໝ່ທີ່ໄປສະໝັກວຽກ ເຂົາຈະຕ້ອງມີຄຳຖາມວ່າຍ້ອນຫຍັງຈຶ່ງຕ້ອງລາອອກມາກ່ອນແລ້ວຈຶ່ງມາຊອກວຽກໃໝ່, ມີບັນຫາຢູ່ບ່ອນເຮັດວຽກເກົ່າຫລວງຫລາຍຫລືບໍ່ ? ບາງເທື່ອກຳມະການສຳພາດບາງທ່ານອາດຈະຄິດໄປໄກເຖິງຂັ້ນວ່າຜູ້ສະໝັກຜູ້ນີ້ເປັນຄົນບໍ່ມີຄວາມອົດທົນ, ບໍ່ສູ້ວຽກ, ບໍ່ພໍໃຈກໍລາອອກມາ ໂດຍບໍ່ສົນວ່າຈະມີວຽກຮອງຮັບຫລືບໍ່ ແລ້ວຖ້າມາຢູ່ກັບບໍລິສັດຂອງເຂົາ ແລ້ວມາເຮັດແບບນີ້ກັບບໍລິສັດຂອງເຂົາ ອາດຈະມີຄວາມວຸ້ນວາຍຕ້ອງມາຊອກຫາຄົນໃໝ່ກະທັນຫັນໃນຮູບແບບນີ້ອີກຫລືບໍ່ ສຸດແຕ່ຈະຄິດໄປໃນຫລາຍທາງ ເຊິ່ງຄວາມຄິດຮູບແບບນີ້ຄົງບໍ່ເປັນຜົນດີກັບຜູ້ສະໝັກວຽກ ທັງຖ້າຜູ້ສະໝັກວຽກຕອບຄຳຖາມເຫລົ່ານີ້ໄດ້ ບໍ່ສົມເຫດສົມຜົນ ໂອກາດໄດ້ວຽກ ຍິ່ງຫລຸດໜ້ອຍລົງໄປຕື່ມອີກ ເມື່ອປຽບທຽບກັບຜູ້ສະໝັກຄົນອື່ນທີ່ຍັງມີວຽກເຮັດຢູ່ໃນຕອນນີ້.

ທີ່ກ່າວມາຂ້າງເທິງນີ້ແມ່ນຂໍ້ດີ – ຂໍ້ເສຍຂອງທັງ 2 ທາງເລືອກທີ່ພວກເຮົາເອົາມາແນະນຳທ່ານ ຈົ່ງເລືອກທາງທີ່ດີສຸດສຳລັບໂຕເອງ, ແຕ່ສິ່ງໜຶ່ງທີ່ຕ້ອງຄຳນຶງສຳລັບຜູ້ທີ່ກຳລັງຄິດຈະລາອອກຈາກວຽກ ຄື : ແມ່ນຫຍັງເປັນບັນຫາ ແລະ ສາເຫດທີ່ແທ້ຈິງຂອງຄວາມຄິດທີ່ທ່ານຢາກຈະລາອອກຈາກບ່ອນເຮັດວຽກປະຈຸບັນ ເຊິ່ງເຮົາໄດ້ໃຫ້ເວລາລວມເຖິງໄດ້ອົດທົນ ພະຍາຍາມແກ້ໄຂບັນຫາເຫລົ່ານີ້ຢ່າງເຕັມທີ່ແລ້ວຫລືຍັງ ແລ້ວເຮົາໄດ້ຄິດຕັດສິນໃຈດ້ວຍເຫດ ແລະ ຜົນຢ່າງດີແລ້ວ ໂດຍບໍ່ແມ່ນການຕັດສິນໃຈແບບໃຊ້ອາລົມຊົ່ວວູບເທົ່ານັ້ນ ເພາະອະນາຄົດຍ່ອມຂຶ້ນຢູ່ກັບປະຈຸບັນທີ່ທ່ານຕັດສິນໃຈຂໍໃຫ້ທ່ານຕັດສິນໃຈຢ່າງຖືກຕ້ອງ ແລະ ເໝາະສົມກໍພໍ.