ອຸຍນິເຊັບ ມອບອຸປະກອນການແພດ ໃຫ້ກະຊວງສາທາລະນະສຸກ

ໃນວັນທີ 16 ຕຸລານີ້ ທີ່ນະຄອນຫລວງວຽງຈັນ, ອົງການອຸຍນິເຊັບ (UNICEF) ປະຈໍາ ສປປ ລາວ ໄດ້ມອບອຸປະກອນດ້ານການແພດ ມີ​ມູນ​ຄ່າ​ຫລາຍ​ກວ່າ 1,16 ລ້ານໂດລາສະຫະລັດ ໃຫ້ກະຊວງສາທາລະນະສຸກ ເພື່ອນຳ​ໃຊ້​ເຂົ້າໃນການປ້ອງກັນ ແລະ ຕອບໂຕ້ພະຍາດໂຄວິດ-19 ​ເຊິ່ງ​ເຄື່ອງ​ຊ່ວຍ​ເຫລືອດັ່ງກ່າວນີ້ແມ່ນໄດ້ຮັບ​ທຶນຊ່ວຍເຫລືອຈາກສະຫະພາບເອີຣົບ, ລັດຖະບານໄອແລນ ແລະ ລັດຖະບານຍີ່ປຸ່ນ ເຊິ່ງປະກອບມີ: ຜ້າອັດປາກ, ໜ້າກາກແຜ່ນໃສ, ຖົງມື ແລະ ແວ່ນຕາປ້ອງກັນ, ​ເຄື່ອງດູດອົກຊີເຈນ, ເຄື່ອງຊ່ວຍຫາຍໃຈ, ເຄື່ອງວິເຄາະອົກຊີເຈນ, ເຄື່ອງວັດແທກລະດັບອົກຊີເຈນໃນເລືອດ, ທໍ່ໃສ່ດັງສຳລັບຜູ້ໃຫຍ່ ແລະ ເດັກນ້ອຍ.

ທ່ານ ດຣ.ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໄດ້ກ່າວສະ​ແດງ​ຄວາມ​ຂອບ​ໃຈ​ຕໍ່​ການ​ຊ່ວຍ​ເຫລືອ​ສໍາຄັນ​ນີ້ ​ເພື່ອເພີ່ມທະວີຄວາມອາດສາມາດໃນການຮັບມືກັບການແຜ່ລະບາດຂອງພະຍາດໂຄວິດ-19 ໃຫ້ກັບລັດຖະບານລາວ ໂດຍການຫລຸດຜ່ອນຄວາມສ່ຽງໃນການຕິດຕໍ່ ແລະ ແຜ່ເຊື້ອພະຍາດດັ່ງກ່າວ.