ທະຫານໄນຈີເຣຍຍິງຜູ້ປະທ້ວງຮຽກຮ້ອງປະຕິຮູບປະເທດ ຄາດວ່າມີຜູ້ເສຍຊີວິດຫລາຍຄົນ
ສື່ຫລາຍສຳນັກລາຍງານອ້າງຜູ້ເຫັນເຫດການວ່າ: ເກີດເຫດທະຫານໄນຈີເຣຍຍິງຜູ້ປະທ້ວງໃນເມືອງລາກອດຂອງໄນຈີເຣຍ ຫລັງຜູ້ປະທ້ວງອອກມາລວມຕົວກັນເພື່ອຮຽກຮ້ອງໃຫ້ຕຳຫລວດໄນຈີເຣຍຢຸດການໃຊ້ຄວາມຮຸນແຮງ ຈົນລັດຖະບານໄນຈີເຣຍຕ້ອງປະກາດເຄີຟິວ ແລະ ມີລາຍງານທະຫານໃຊ້ອາວຸດປືນຍິງຜູ້ຊຸມນຸມ.
ເຖິງວ່າຕອນນີ້ຍັງບໍ່ມີລາຍງານທີ່ຊັດເຈນ, ແຕ່ຜູ້ຢູ່ໃນເຫດການລະບຸວ່າ: ທະຫານໄນຈີເຣຍໃຊ້ອາວຸດປືນຍິງໃສ່ຝູງຊົນ ໂດຍມີຫລັກຖານເປັນວິດີໂອ ເຊິ່ງຖ່າຍທອດສົດເຫດການໃນເວລານັ້ນ ທີ່ມີຮູບຄົນອອກມາຊຸມນຸມຢູ່ຖະໜົນ ກ່ອນຈະມີສຽງຄືປືນຈົນເກີດຄວາມວຸ້ນວາຍ. ຂະນະດຽວກັນ ຍັງມີວິດີໂອທີ່ປາກົດຮູບຂອງຜູ້ຊຸມນຸມເຂົ້າໄປຊ່ວຍຜູ້ບາດເຈັບຈາກເຫດການດັ່ງກ່າວ ດ້ວຍການເອົາລູກປືນອອກຈາກຮ່າງກາຍຜູ້ບາດເຈັບນຳອີກ.
ເວັບໄຊ BBC ລາຍງານອ້າງຜູ້ເຫັນເຫດການວ່າ: ສາມາດນັບຮ່າງຜູ້ເສຍຊີວິດໄດ້ປະມານ 20 ຄົນ ແລະ ມີຜູ້ບາດເຈັບອີກຢ່າງໜ້ອຍ 50 ຄົນ. ຂະນະທີ່ແອມເນສຕີ້ ອິນເຕີເນຊັນແນລ ອອກຖະແຫລງການຢືນຢັນເຊັ່ນກັນວ່າ: ມີລາຍງານທີ່ເຊື່ອໄດ້ວ່າເຈົ້າໜ້າທີ່ໄນຈີເຣຍໃຊ້ກຳລັງຕໍ່ຕ້ານຜູ້ຊຸມນຸມຈົນເຮັດໃຫ້ມີຜູ້ເສຍຊີວິດຫລາຍຄົນ ແລະ ກຳລັງຢູ່ລະຫວ່າງການສືບສວນຂໍ້ມູນຄວາມຈິງ.
ຂະນະທີ່ທ່າທີຈາກຝ່າຍລັດ, ໂຄສົກຂອງລັດລາກອດລະບຸຜ່ານທະວິດເຕີວ່າ: ເຈົ້າໜ້າທີ່ໄດ້ເຂົ້າໄປສອບສວນສາເຫດແລ້ວ, ສ່ວນກອງທັບໄນຈີເຣຍຍັງບໍ່ອອກມາໃຫ້ຄວາມເຫັນໃດໆ.
ການປະທ້ວງໃນປະເທດໄນຈີເຣຍເກີດຂຶ້ນຢ່າງຕໍ່ເນື່ອງເປັນເວລາເກືອບ 2 ອາທິດແລ້ວ ໂດຍຜູ້ປະທ້ວງລວມຕົວກັນຜ່ານ #EndSARS ເພື່ອຕໍ່ຕ້ານການໃຊ້ຄວາມຮຸນແຮງຂອງຕຳຫລວດ ແລະ ຮຽກຮ້ອງໃຫ້ທາງການໄນຈີເຣຍຍົກເລີກຊຸດປະຕິບັດການພິເສດຕໍ່ຕ້ານການຂີ້ລັກ (SARS) ເຊິ່ງຖືກກ່າວຫາມາຕະຫລອດວ່າໃຊ້ອຳນາດຂົ່ມຂູ່ປະຊາຊົນ, ທໍລະມານ ຈົນເຖິງຂັ້ນມີຜູ້ເສຍຊີວິດ ໂດຍບໍ່ເປັນໄປຕາມຂັ້ນຕອນຂອງກົດໝາຍ.
ເຖິງວ່າຜົນຈາກການປະທ້ວງໄລຍະທຳອິດ ລັດຖະບານໄນຈີເຣຍຈະຍອມເຮັດຕາມເງື່ອນໄຂ ປະກາດຍຸບຊຸດປະຕິບັດການດັ່ງກ່າວ ພ້ອມເອີ້ນເຈົ້າໜ້າທີ່ທີ່ເຄີຍຢູ່ໃນຊຸດປະຕິບັດການເຂົ້າກວດຮ່າງກາຍ ແລະ ສຸຂະພາບຈິດ, ແຕ່ເວລາຕໍ່ມາ ລັດຖະບານໄນຈີເຣຍພັດປະກາດຕັ້ງໜ່ວຍງານໃໝ່ມາທົດແທນ ເຊິ່ງສ້າງຄວາມບໍ່ພໍໃຈໃຫ້ຜູ້ປະທ້ວງ ໂດຍຜູ້ປະທ້ວງຍັງຍື່ນຂໍ້ຮຽກຮ້ອງໃຫ້ປະຕິຮູບຂະບວນການຍຸຕິທຳ ແລະ ປະຕິຮູບປະເທດຢ່າງຈິງຈັງ.
ຂະນະທີ່ລັດຖະບານໄນຈີເຣຍເບິ່ງວ່າ: ການປະທ້ວງທີ່ລຸກລາມເປັນເພາະມີພວກກຸ່ມອັນຕະພານເຂົ້າຄອບງຳການຊຸມນຸມ ຫວັງສ້າງຄວາມວຸ້ນວາຍ.
ໂດຍຕະຫລອດການຊຸມນຸມໃນໄລຍະຫລັງ ມີລາຍງານຜູ້ປະທ້ວງຖືກຈັບກຸມ ແລະ ມີການໃຊ້ຄວາມຮຸນແຮງຕໍ່ຜູ້ຊຸມນຸມເພີ່ມຂຶ້ນ ເຊິ່ງແອມເນສຕີ້ ອິນເຕີເນຊັນແນລເປີດເຜີຍໃນວັນທີ 19 ຕຸລາວ່າ: ມີປະຊາຊົນເສຍຊີວິດຢ່າງໜ້ອຍ 15 ຄົນນັບແຕ່ເລີ່ມມີການຊຸມນຸມເກີດຂຶ້ນ.
