ຍີ່ປຸ່ນ ສະເໜີເງິນກູ້ດອກເບ້ຍຕໍ່າ 50.000 ລ້ານເຢນ ແກ່ ອິນໂດເນເຊຍ ສຳລັບສູ້ວິກິດໂຄວິດ-19
ລະຫວ່າງການຢ້ຽມຢາມອິນໂດເນເຊຍເປັນຄັ້ງທຳອິດຫລັງການເຂົ້າຮັບຕຳແໜ່ງໃນເດືອນກັນຍາຂອງທ່ານ ຊູງະ ໂຢຊິຮິເດະ ນາຍົກລັດຖະມົນຕີຄົນໃໝ່ຂອງຍີ່ປຸ່ນ ໄດ້ລະບຸວ່າ: ຍີ່ປຸ່ນຈະໃຫ້ເງິນກູ້ດອກເບ້ຍຕໍ່າແກ່ອິນໂດເນເຊຍມູນຄ່າ 50.000 ລ້ານເຢນ ສຳລັບໃຊ້ໃນການຕໍ່ສູ້ກັບວິກິດໂຄວິດ-19.
ໂດຍຂໍ້ສະເໜີນີ້ເກີດຂຶ້ນລະຫວ່າງການເຈລະຈາກັບປະທານາທິບໍດີ ໂຈໂກ ວິໂດໂດ ທີ່ຈັດຂຶ້ນໃກ້ນະຄອນຫລວງຈາກາຕາ ເຊິ່ງປັດຈຸບັນອິນໂດເນເຊຍເປັນປະເທດທີ່ພົບຜູ້ຕິດເຊື້ອຫລາຍທີ່ສຸດໃນອາຊີຕາເວັນອອກສຽງໃຕ້ ໂດຍມີການຢືນຢັນແລ້ວ 360.000 ກວ່າຄົນ.
ຂະນະດຽວກັນ ໄດ້ມີການລະບຸວ່າ: ລັດຖະບານທັງສອງມີເປົ້າໝາຍຈະຫລຸດໄລຍະເວລາກັກກັນຕົນເອງ ເພື່ອໃຫ້ສາມາດເດີນທາງໄປເຮັດທຸລະກິດໄດ້ໃນໄລຍະສັ້ນໆ ເຊິ່ງປັດຈຸບັນຍີ່ປຸ່ນກຳນົດໄລຍະເວລາກັກກັນຕົນເອງ 14 ວັນສຳລັບຜູ້ມາຢາມ ໂດຍທັງສອງຝ່າຍຈະໃຫ້ລັດຖະມົນຕີຕ່າງປະເທດເຈລະຈາລາຍລະອຽດ ແລະ ຫາຂໍ້ສະຫລຸບພາຍໃນໜຶ່ງເດືອນ.
ການເດີນທາງຢ້ຽມຢາມອິນໂດເນເຊຍຄັ້ງນີ້ຂອງນາຍົກລັດຖະມົນຕີ ຊູງະ ໂຢຊິຮິເດະ ເປັນສ່ວໜຶ່ງຂອງຄວາມພະຍາຍາມໃນການຮັດແໜ້ນການພົວພັນກັບປະເທດໃນອາຊີຕາເວັນອອກສຽງໃຕ້ ເພື່ອຕໍ່ຕ້ານອິດທິພົນທີ່ເພີ່ມຂຶ້ນຂອງຈີນ ໂດຍຫລ້າສຸດ ນາຍົກລັດຖະມົນຕີ ຊູງະ ໂຢຊິຮິເດະ ແລະ ປະທານາທິບໍດີ ໂຈໂກ ວິໂດໂດ ຍັງຕົກລົງຈະຮັດແໜ້ນການພົວພັນດ້ານຄວາມໝັ້ນຄົງ ແລະ ການປ້ອງກັນ.
ໂດຍຈະໃຫ້ລັດຖະມົນຕີຕ່າງປະເທດ ແລະ ລັດຖະມົນຕີປ້ອງກັນປະເທດເຂົ້າຮ່ວມຫາລືກັນ ຫລື ເອີ້ນວ່າ: ການເຈລະຈາ 2+2 ເຊິ່ງຈະມີການເຈລະຈາໃນຫລາຍເລື່ອງ ລວມທັງການເລັ່ງເຈລະຈາກ່ຽວກັບການປ່ຽນຖ່າຍອຸປະກອນ ແລະ ເຕັກໂນໂລຊີການປ້ອງກັນປະເທດ.
ນອກຈາກອິນໂດເນເຊຍແລ້ວ, ກ່ອນໜ້ານີ້ ນາຍົກລັດຖະມົນຕີ ຊູງະ ໂຢຊິຮິເດະ ໄດ້ມີການຢ້ຽມຢາມຫວຽດນາມ ເຊິ່ງໄດ້ຕົກລົງໃນຫລັກການສົນທິສັນຍາທີ່ຈະອະນຸຍາດໃຫ້ຍີ່ປຸ່ນສົ່ງອອກອຸປະກອນ ແລະ ເຕັກໂນໂລຊີປ້ອງກັນປະເທດໄປຫວຽດນາມໄດ້. ຂະນະດຽວກັນ ຍັງມີຂໍ້ຕົກລົງຈະໃຫ້ເປີດບໍລິການຖ້ຽວບິນປົກກະຕິລະຫວ່າງ 2 ປະເທດອີກ.
