ຫວຽດນາມ ໄທ ຜະຫວາ ພາຍຸ ‘ ເປປິໂຕ ‘

ພາຍຸ ເປປິໂຕ ຕຽມຖະຫຼົ່ມ ຟີລິບປິນ ຄາດວ່າຈະຂຶ້ນຝັ່ງ ລູຊອນ ໃນວັນທີ 21-22 ຕຸລານີ້ ກ່ອນຈະເຄື່ອນຕົວໄປທາງທິດຕາເວັນຕົກມຸ່ງໜ້າໄປຫາຫວຽດນາມ ແລະ ໄທທີ່ມີຫຼາຍພື້ນທີ່ກຳລັງປະສົບໄພນໍ້າຖ້ວມ.

ວັນທີ 19 ຕຸລານີ້ ສື່ຕ່າງປະເທດ ແລະ ເວບໄຊ rappler ລາຍງານສຳນັກຂ່າວອຸຕຸນິຍົມວິທະຍາໃນຟີລິບປິນແຈ້ງເຕືອນຊາວຟີລິບປິນຢູ່ໃນເກາະ ລູຊອນ ຢູ່ທາງພາກເໜືອຂອງປະເທດ ໃຫ້ລະວັງອັນຕະລາຍຈາກຝົນຕົກໜັກຈາກອິດທິພົນຂອງພາຍຸ ດີເປຼຊັ່ນ ເຂດຮ້ອນ ເປປິໂຕ ຊຶ່ງມີທິດທາງຈະເຄື່ອນຕົວຂຶ້ນຝັ່ງທີ່ເກາະ ລູຊອນໃນຊ່ວງວັນທີ 21 ຕຸລານີ້, ຈາກນັ້ນຄາດວ່າພາຍຸຈະມີທິດທາງເຄື່ອນຕົວໄປທາງຕາເວັນຕົກ ມຸ່ງໜ້າຖະຫຼົ່ມ ຫວຽດນາມໃນອີກບໍ່ດົນທໍ່ໃດວັນຂ້າງໜ້າ ແລະ ຈະສົ່ງຜົນກະທົບຕໍ່ປະເທດໄທ ຊຶ່ງຫຼາຍເມືອງໃນແຂວງ ຣາດຊະສິມມາ ປາຈີນບູຣີ ແລະ ສະແກ້ວ ກຳລັງປະສົບນໍ້າຖ້ວມ

ຣອຍເຕີລາຍງານຄວາມຄືບໜ້າການພະຍາຍາມຄົ້ນຫາສົບທະຫານຫວຽດນາມທີ່ຕິດຢູ່ໃຕ້ດິນຖະຫຼົ່ມລົງມາໃສ່ຄ້າຍທະຫານແຫ່ງໜຶ່ງໃນແຂວງ ກວາງຈິ ໃນເຊົ້າວັນອາທິດທີ 18 ຜ່ານມາ ຫຼັງເກີດຝໄນຕົກໜັກຕໍ່ເນື່ອງໃນຫວຽດນາມວ່າ ກຳລັງທະຫານຫວຽດນາມພ້ອມດ້ວຍເຄື່ອງມືໜັກ ແລະ ໝາດົມກິ່ນໄດ້ຄົ້ນເພົບສົບທະຫານລວມທັງໝົດ 22 ສົບ.

ຂະນະນີ້ມີຜູ້ເສຍຊີວິດໃນຫວຽດນາມຈາກອິດທິພົນຂອງພາຍຸເຂດຮ້ອນ ລິນຟາ ນັງກາ ທີ່ເຮັດໃຫ້ນໍ້າຖ້ວມ ຊໍ້າ ແລະ ດິນເຈື່ອນລວມແລ້ວຢ່າງໜ້ອຍ 93 ສົບ ແລະຍັງມີຜູ້ສູນຫາຍອີກປະມານ 30 ຄົນ ໃນຂະນະທີ່ຄາດວ່າຫວຽດນາມຈະຜະເຊີນກັບຝົນຕົກໜັກຈາກພາຍຸ ເປປິໂຕໃນລະຫວ່າງວັນທີ 24-25 ຕຸລານີ້.