ຜູ້ສໍ້ໂກງຊັບພົນລະເມືອງຢູ່ແຂວງຈໍາປາສັກຈະໄດ້ຮັບໂທດຢ່າງເໝາະສົມ

ນາງ ເກື້ອກູນ ແພງຄຳກີບ ອາຍຸ 62 ປີຢູ່ບ້ານມ່ວງ, ເມືອງປະທຸມພອນ ແຂວງຈຳປາສັກ, ໃກ້ຖືກສານປະຊາຊົນແຂວງດັ່ງກ່າວຕັດສີນລົງໂທດແລ້ວ, ພາຍຫລັງຖືກເຈົ້າໜ້າທີ່ຈັບຕົວມາດໍາເນີນຄະດີເມື່ອທ້າຍປີ 2015 ໃນຂໍ້ຫາສໍ້ໂກງຊັບພົນລະເມືອງ.

ເຈົ້າໜ້າທີ່ ໃຫ້ຮູ້ວ່າ: ພາຍຫລັງມີປະຊາຊົນຈໍານວນບໍ່ໜ້ອຍແຈ້ງວ່າໄດ້ຖືກນາງເກື້ອກູນສໍ້ໂກງເອົາເງິນເປັນຈໍານວນຫລາຍລ້ານກີບ, ຈຶ່ງໄດ້ນໍາຕົວຜູ້ກ່ຽວ ມາສືບສວນ-ສອບສວນ ແລະ ໄດ້ຮັບສາລະພາບວ່າ: ຕົນເອງເປັນແມ່ຫວຍເງິນມື້ຢູ່ເຂດຕະຫລາດໃໝ່ເມືອງປາກເຊ, ເຊິ່ງມີລູກຫວຍທັງໝົດປະມານ 16 ພັນມື, ຊຶ່ງແຕ່ລະວັນຕົນຈະໄປເກັບເງິນຈາກລູກຫວຍໄດ້ປະມານ 160 ລ້ານກີບ ແລ້ວກໍນຳໄປໃຫ້ລູກຫວຍຜູ້ທີ່ເປຍເອົາ ແລະ ຈຳນວນໜຶ່ງແມ່ນເອົາໄປໃຫ້ຄົນອື່ນຢືມດ້ວຍອັດຕາດອກເບ້ຍ 20% ຕໍ່ເດືອນ ແລະ ໃນທີ່ສຸດຕົນເອງກໍບໍ່ສາມາດຫາເງິນມາໃຫ້ລູກຫວຍໄດ້, ຊຶ່ງມີປະມານ 60 ກວ່າຄົນ ແລະ ຕົກເປັນເງິນຫລາຍກວ່າ 7 ຕື້ກີບ ແລະ ມາຮອດທ້າຍປີ 2015 ຈຶ່ງຖືກເຈົ້າໜ້າທີ່ຈັບຕົວມາດໍາເນີນຄະດີ.

ປັດຈຸບັນຄະດີສໍ້ໂກງຊັບພົນລະເມືອງລາຍນີ້, ພວມຢູ່ໃນຂັ້ນຕອນກະກຽມສະຫລຸບສໍານວນຄະດີສົ່ງໄອຍະການເພື່ອສັ່ງຟ້ອງສານຕັດສີນລົງໂທດຕາມລະບຽບກົດໝາຍ.