ສິງກະໂປ-ຮົງກົງ ຈັບຄູ່ເປີດຊາຍແດນ ເດີນທາງໄປໄດ້ບໍ່ຕ້ອງກັກຕົວ ແຕ່ຕ້ອງກວດໂຄວິດ-19
ຮົງກົງ ແລະ ສິງກະໂປ ລົງນາມໃນຂໍ້ຕົກລົງຈະຈັບຄູ່ການເດີນທາງລະຫວ່າງກັນ (travel bubble) ໂດຍຈະອະນຸຍາດໃຫ້ຜູ້ທີ່ເດີນທາງເຂົ້າ-ອອກລະຫວ່າງຮົງກົງ ແລະ ສິງກະໂປ ບໍ່ຈຳເປັນຕ້ອງກັກຕົວ 14 ວັນ, ແຕ່ຜູ້ທີ່ເດີນທາງຈະຕ້ອງຢູ່ຮົງກົງ ຫລື ສິງກະໂປມາແລ້ວຢ່າງໜ້ອຍ 14 ວັນ ແລະ ເຂົ້າຮັບການກວດໂຄວິດ-19 ໂດຍຕ້ອງບໍ່ພົບເຊື້ອໃນຮ່າງກາຍ.
ເຖິງວ່າຈະຍັງບໍ່ມີກຳນົດເລີ່ມຕົ້ນມາດຕະການດັ່ງກ່າວຢ່າງເປັນທາງການ, ແຕ່ຮົງກົງ ແລະ ສິງກະໂປເຫັນກົງກັນວ່າ: ຈະເລີ່ມອະນຸຍາດເດີນທາງລະຫວ່າງກັນໃຫ້ໄດ້ໃນມໍ່ໆນີ້ ແລະ ຈະໃຊ້ວິທີຍືດຍຸ່ນອາໄສການປະເມີນສະຖານະການການລະບາດເປັນຫລັກ ຖ້າທ່າອ່ຽງການລະບາດຮຸນແຮງກໍອາດປ່ຽນແປງມາດຕະການໄດ້ຕາມຄວາມເໝາະສົມ.
ລັດຖະມົນຕີຄົມມະນາຄົມສິງກະໂປ ລະບຸວ່າ: ຂໍ້ຕົກລົງການເດີນທາງລະຫວ່າງຮົງກົງກັບສິງກະໂປ ຖືເປັນບາດກ້າວນ້ອຍໆທີ່ຍິ່ງໃຫຍ່ ເພາະສິງກະໂປ ແລະ ຮົງກົງຖືເປັນສູນກາງເສດຖະກິດ ແລະ ສູນກາງການບິນລະດັບໂລກ ເຊິ່ງຖ້າສິງກະໂປ ແລະ ຮົງກົງເຮັດໃຫ້ ຈະເປັນແນວທາງໃຫ້ປະເທດອື່ນນຳອີກ.
ຂໍ້ຕົກລົງລະຫວ່າງຮົງກົງ ແລະ ສິງກະໂປ ເຮັດໃຫ້ລາຄາຫຸ້ນຂອງສາຍການບິນຄາເທ ປາຊີຟິກ ເພີ່ມສູງຂຶ້ນ 7,8% ເຊິ່ງຖືເປັນສັນຍານບວກຫລາຍທີ່ສຸດໃນຮອບ 7 ອາທິດ ເຊັ່ນດຽວກັບຫຸ້ນຂອງສິງກະໂປ ແອລາຍ ທີ່ປັບຂຶ້ນ 1,2%.
ກ່ອນໜ້ານີ້ມີຄວາມພະຍາຍາມຈາກຫລາຍປະເທດທີ່ຈັບຄູ່ເປີດຊາຍແດນລະຫວ່າງກັນ ເພື່ອກະຕຸ້ນເສດຖະກິດໃນສະພາບທີ່ເປີດປະເທດເສລີບໍ່ໄດ້ ຜົນຈາກການລະບາດຂອງໂຄວິດ-19 ເຊັ່ນກໍລະນີຂອງນິວຊີແລນ ແລະ ອອສເຕຣເລຍ ລວມໄປເຖິງບາງປະເທດເຊັ່ນ: ອິນເດຍ ເຖິງວ່າຈະມີການລະບາດໜັກ ແຕ່ກໍເຮັດຂໍ້ຕົກລົງກັບ 17 ປະເທດ ເປີດຊາຍແດນໃຫ້ສາມາດເດີນທາງໄປມາໄດ້ເຊັ່ນກັນ.
