ພັດທະນາເຊັນເຊີ ກວດການຕິດເຊື້ອຢ່າງວ່ອງໄວ

ຜ່ານມາໃນໄຕມາດທີ 4 ຂອງປີແລ້ວ ການລະບາດຂອງໄວຣັດ ໂຄໂຣນາ ສາຍພັນໃໝ່ ມາເຖິງປັດຈຸບັນກໍຍັງບໍ່ທັນບັນເທົາເບົາລົງ ແຕ່ຫາກຍັງມີຜູ້ຕິດເຊື້ອ ແລະ ເສຍຊີວິດເພີ່ມຂຶ້ນຢ່າງຕໍ່ເນືອງ ອັນເຮັດໃຫ້ພາກເສດຖະກິດຫົດຕົວລົງຢ່າງເຫັນໄດ້ຊັດ ສິ່ງທີ່ຍາກຕໍ່ການຄວບຄຸມພະຍາດນັ້ນກໍຄື ບາງຄົນຕິດເຊື້ອບໍ່ໄດ້ສະແດງອາການອອກມາ ແລະ ບໍ່ຮູ້ສຶກຕົວວ່າຕົນເອງຕິດເຊື້ອ ແລ້ວນຳໄປແຜ່ໃສ່ກັບຄົນອື່ນຢູ້ອ້ອມຮອບຕົວເຮົາ.

ເພື່ອເປັນການຢັບຢັ້ງການແຜ່ລະບາດຂອງໄວຣັດ ຈຶ່ງມີການພັດທະນາການທົດສອບທີ່ສາມາດບົ່ງບອກການຕິດເຊື້ອຂອງຄົນທີ່ຍັງບໍ່ທັນໄດ້ສະແດງອາການໄດ້ຢ່າງວ່ອງໄວ ເພາະເທັກໂນໂລຊີການທົດສອບໂຄວິດ-19 ທີ່ໃຊ້ກັນຢູ່ໃນຂະນະນີ້ ຈະຕ້ອງໃຊ້ເວລາຫຼາຍຊົ່ວໂມງ ຫຼື ຫຼາຍວັນກ່ວາຈະຮູ້ຜົນ ແລະ ອຸປະກອນເຫຼົ່ານີ້ຊໍ້າຍັງມີລາຄາແພງອີກດ້ວຍ. ຫຼ້າສຸດນັກວິໄຈຈາກສະຖາບັນເທັກໂນໂລຊີ ແຄລິຟໍເນຍ  ໃນສະສະຫະລັດອາເມລິກາເປີດເຜີຍວ່າ ໄດ້ພັດທະນາອຸປະກອນການທົດສອບ ແບບໃໝ່ໂດຍເຊັນເຊີ ຊຶ່ງເຮັດດ້ວຍ ກຣາຟີນ ມີລັກຊະນະຄ້ານແຜ່ນກາກບອນ.

ນັກວິໄຈຈາກ ແຄລເທັກ ຕັ້ງຊື່ອຸປະກອນທົດສອບແບບໃໝ່ນີ້ວ່າ SARS-CoV-2 RapidPlex ຊຶ່ງປະກອບດ້ວຍແອນຕີບອດ ແລະ ໂປຼຕີນ ທີ່ຊ່ວຍໃຫ້ສາມາດ ກວດຈັບ ແລະ ຊ່ວຍໃຫ້ ວິນິໄສການຕິດເຊື້ອໂຄວິດ-19 ໄດ້. ຜ່ານການວິເຄາະນໍ້າລາຍ ຫຼື ເລືອດໃນປະລິມານເລັກນ້ອຍເທົ່ານັ້ນ ແລະ ໃຊ້ເວລາບໍ່ເຖີງ 10 ນາທີ ແລະ ຕົວເຊັນເຊີຍັງມີລາຄາປະຢັດນຳອີກ.