ຜ່ອນຜັນມາດຕະການສຳລັບຜູ້ທີ່ເດີນທາງມາຈາກປະເທດທີ່ບໍ່ມີການລະບາດຂອງ COVID-19 ໃນຊຸມຊົນ
ໃນວັນທີ 14 ຕຸລານີ້, ໂດຍອີງຕາມ ຄໍາສັ່ງຂອງທ່ານນາຍົກລັດຖະມົນຕີ ວ່າດ້ວຍການເພີ່ມທະວີມາດຕະການສະກັດກັ້ນກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ COVID-19, ສະບັບເລກ ທີ 06/ນຍ, ລົງວັນທີ 29 ມີນາ 2020; ອີງຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ, ສະບັບເລກທີ 1049/ຫສນຍ, ລົງວັນທີ 30 ກັນຍາ 2020; ອີງຕາມຜົນກອງປະຊຸມຂອງກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19, ຄັ້ງວັນທີ 7 ຕຸລາ 2020; ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ອອກຄໍາແນະນໍາ ສໍາລັບຜູ້ທີ່ຈະເດີນທາງມາຈາກປະເທດທີ່ບໍ່ມີການລະບາດຂອງພະຍາດ COVID-19 ໃນຊຸມຊົນຄື:
ຕ້ອງມີໃບຢັ້ງຢືນຜົນກວດ COVID-19 ພາຍໃນ 72 ຊົ່ວໂມງ ກ່ອນການເດີນທາງ, ເວລາເຂົ້າມາຕ້ອງໄດ້ກວດຫາເຊື້ອ ແລະ ຈໍາກັດບໍລິເວນຢູ່ສະຖານທີ່ ທີ່ຄະນະສະເພາະກິດກໍານົດໄວ້ ເພື່ອລໍຖ້າຜົນກວດ 48 ຊົ່ວໂມງ ຫລື ຈົນກວ່າໄດ້ຮັບຜົນກວດ. ຄະນະສະເພາະກິດຈະພິຈາລະນາ ຕາມສະພາບການລະບາດຂອງປະເທດຕົ້ນທາງ ເພື່ອ ອະນຸຍາດໃຫ້ໄປສືບຕໍ່ຈໍາກັດບໍລິເວນຢູ່ເຮືອນ, ສະຖານທີ່ເຮັດວຽກ ຫລື ໂຮງແຮມ ຈົນຄົບ 14 ວັນ.
ກໍລະນີບໍ່ພົບເຊື້ອ: ສໍາລັບພົນລະເມືອງລາວ ເມື່ອໄດ້ຮັບອະນຸຍາດໃຫ້ໄປສືບຕໍ່ຈໍາກັດບໍລິເວນຢູ່ເຮືອນຂອງຕົນແລ້ວ ມອບໃຫ້ອົງການປົກຄອງທ້ອງຖິ່ນ, ຄອບຄົວຮັບຜິດຊອບຕິດຕາມໃຫ້ຜູ້ກ່ຽວປະຕິບັດຕາມຄໍາແນະນໍາ ຂອງຄະນະສະເພາະກິດວາງອອກຢ່າງຖືກຕ້ອງ ແລະ ເຂັ້ມງວດ ຈົນຄົບ 14 ວັນ ເພື່ອ ຕິດຕາມແທກ ອຸນຫະພູມແຕ່ລະວັນ, ບໍ່ໃຫ້ອອກໄປຂ້າງນອກ, ບໍ່ໃຫ້ໃກ້ຊິດກັບຄົນອື່ນ, ຮັກສາມາລະຍາດໃນການໄອ ແລະ ຈາມ, ຖ້າຮູ້ສຶກບໍ່ສະບາຍ ໃຫ້ໂທຫາສາຍດ່ວນ 165, 166;
ສໍາລັບຄົນຕ່າງປະເທດ: ເມື່ອໄດ້ຮັບອະນຸຍາດໃຫ້ໄປສືບຕໍ່ຈໍາກັດບໍລິເວນຢູ່ເຮືອນພັກຂອງຕົນ, ສະຖານທີ່ສໍາລັບຄົນຕ່າງປະເທດ ຫລື ໂຮງແຮມ ແລະ ຖ້າບ່ອນເຮັດວຽກບໍ່ແອອັດ ແມ່ນອະນຸຍາດໃຫ້ເຮັດວຽກໄດ້ມອບໂດຍໃຫ້ບໍລິສັດ ຮັບຜິດຊອບຕິດຕາມ ແລະ ລາຍງານໃຫ້ອົງການປົກຄອງທ້ອງຖິ່ນ ເປັນແຕ່ລະໄລຍະ, ໃຫ້ປະຕິບັດຕາມຄໍາແນະນໍາ ຂອງຄະນະສະເພາະກິດວາງອອກຢ່າງຖືກຕ້ອງ ແລະ ເຂັ້ມງວດຈົນຄົບ 14 ວັນ ຖ້າວ່າຮູ້ສຶກບໍ່ສະບາຍ ໃຫ້ໂທຫາສາຍດ່ວນ 165, 166.
ສໍາລັບນັກທ່ອງທ່ຽວເປັນກຸ່ມ: ຕ້ອງມີເອກະສານຢັ້ງຢືນການຈໍາກັດບໍລິເວນ 14 ວັນ ແລະ ໃບຢັ້ງຢືນຜົນ ກວດ COVID-19 ພາຍໃນ 72 ຊົ່ວໂມງ ກ່ອນການເດີນທາງຈາກປະເທດຕົ້ນທາງ, ຖ້າກວດບໍ່ພົບເຊື້ອ ສາມາດໄປເຄື່ອນໄຫວຕາມແຜນການທ່ອງທ່ຽວທີ່ໄດ້ກໍານົດໄວ້ ໂດຍມອບໃຫ້ສະມາຄົມ ແລະ ບໍລິສັດ ທ່ອງທ່ຽວ ຕິດຕາມ ໃຫ້ພວກກ່ຽວປະຕິບັດຕາມຄໍາແນະນໍາ ຂອງຄະນະສະເພາະກິດວາງອອກຢ່າງຖືກຕ້ອງ ແລະ ເຂັ້ມງວດ.
ກໍລະນີພົບເຊື້ອ: ທຸກຄົນທີ່ເດີນທາງເຂົ້າມາ ສປປ ລາວ ຖ້າກວດພົບເຊື້ອ ຈະຖືກນໍາສົ່ງໄປແຍກປ່ຽວ ແລະ ປິ່ນປົວ ຢູ່ໂຮງຫມໍທີ່ໄດ້ກໍານົດໄວ້.
ສ່ວນຜູ້ເດີນທາງຈາກປະເທດ ທີ່ມີລາຍງານການລະບາດຂອງ COVID-19 ໃນຊຸມຊົນ ແມ່ນໃຫ້ຈໍາກັດບໍລິເວນຢູ່ສະຖານທີ່ຄະນະສະເພາະກິດໄດ້ກໍານົດໄວ້ຈົນຄົບ 14 ວັນ.
