ສ້າງພາບ ເພື່ອອ້າງເປັນຜົນງານ
ໂດຍ: ລູກເມືອງພວນ
ການສ້າງພາບ ເພື່ອອ້າງເປັນຜົນງານ ແມ່ນການກະທຳທີ່ເຄີຍພົບເຫັນຢູ່ກັບພະນັກງານຂອງລັດເປັນສ່ວນໃຫ່ຍ ເພື່ອເປັນການລວງຕາຜູ້ໃຫ່ຍ ຫຼື ຂັ້ນເທິງຂອງຕົນ, ຈຸດປະສົງແມ່ນເພື່ອແອບອ້າງວ່າເປັນຜົນງານສິ້ນໂບແດງ ສະແດງໃຫ້ຂັ້ນເທິງເຫັນວ່າ ຕົນມີຜົນເອງງານ, ເຮັດແທ້ທຳຈິງ, ລົງແທດເຖິງຮາກຖານ, ໃກ້ສິດຕິດແທດກັບປະຊາຊົນຢ່າງແທ້ຈິງ.
ປາກົດການດັ່ງກ່າວ ມັກຈະເຫັນໃນໄລຍະຊ່ວງໃດທີ່ຈະໄຂກອງປະຊຸມໃຫ່ຍຂອງອົງຄະນະພັກຂັ້ນຕ່າງໆ ຫຼື ໃກ້ຈະມີການປັບປຸງຊັບຊ້ອນ, ຍົກຍ້າຍໜ້າທີ່ຕຳແໜ່ງຂອງພະນັກງານ. ທັງນີ້ກໍເພື່ອເປັນການອວດອ້າງຕໍ່ຂັ້ນເທິງວ່າຕົນເອງມີຜົນງານ ເພື່ອໃຫ້ໄດ້ເລື່ອນຊັ້ນ, ຂັ້ນຕຳແໜ່ງທີ່ສູງກ່ວາ ຫຼື ຖືກຊັບຊ້ອນໄປບ່ອນທີ່ຕົນເອງເຫັນວ່າ ຈະສາມາດໃຊ້ສິດອຳນາດໄດ້ຢ່າງເຕັມທີ່. ພະນັກງານພວກນີ້ກໍຈະພະຍາຍາມສ້າງແຜນຫຼາຍຢ່າງຂຶ້ນມາ ເພື່ອໄປຢ້ຽມຢາມຮາກຖານພໍ່ແມ່ປະຊາຊົນທີ່ພົບຄວາມຫຍຸ້ງຍາກຢູ່ບ່ອນຫັ້ນ ບ່ອນນີ້, ນຳເອົາວັດຖຸສິງຂອງ, ເງິນຄຳໄປມອບໃຫ້ປະຊາຊົນ, ໃຫ້ຄຳໝັ້ນສັນຍາວ່າຈະເຮັດອັນນັ້ນ ສ້າງອັນນີ້ໃຫ້ປະຊາຊົນ…ປົກກະຕິແລ້ວ ແມ່ນພວກເຂົາຈະບໍ່ເຮັດຄືແນວນີ້ຈັກເທື່ອ, ມີແຕ່ໃກ້ຈະຮອດກອງປະຊຸມໃຫ່ຍອົງຄະນະພັກຂັ້ນຕ່າງໆ ກໍຟ້າວເລັ່ງສ້າງພາບເພື່ອອ້າງເປັນຜົນງານ. ປາກົດການດັ່ງກ່າວເອີ້ນວ່າ “ສ້າງພາບ ເພື່ອອ້າງເປັນຜົນງານ”.
ໃນຄວາມເປັນຈິງແລ້ວ, ພະນັກງານແບບນັ້ນ ສ່ວນຫຼາຍແມ່ນພະນັກງານໄວ້ໜ້າຫຼັງຫຼອກ ຊອກຫາທຸກວິທີທາງໃຫ້ໄດ້ເປັນໃຫ່ຍ, ເປັນໂຕໃນການຈັດຕັ້ງຂອງພັກ ແລະ ລັດ. ນີ້ ເປັນພຶດຕິກຳທີ່ຈອມປອມ ບໍ່ແທດເໝາະກັບທາດແທ້ຂອງພວກເຂົາ.
ດັ່ງນັ້ນ, ກ່ອນຈະເອົາພະນັກງານເຂົ້າມານັ່ງໃນຕຳແໜ່ງໃດໜຶ່ງ, ກຳວຽກງານໃດໜຶ່ງ ຈຶ່ງມີຄວາມຈຳເປັນທີ່ຈະຕ້ອງໄດ້ເບິ່ງໃຫ້ເຖິງຖອງທາດແທ້ຂອງບຸກຄົນນັ້ນ, ຢ່າເຫັນໄດ້ແຕ່ຮູບການເບື້ອງນອກ ຖ້າບໍ່ດັ່ງນັ້ນກໍຈະຖືກຫຼອກ ຈະໄດ້ຂອງປອມ. ເມື່ອໄດ້ເຂົາເຂົ້າມາກໍຈະສ້າງຄວາມເສຍຫາຍໃຫ້ແກ່ປະເທດຊາດບ້ານເມືອງ. ຈົ່ງເລືອກເອົາຄົນດີ ຄົນເກັ່ງ ທີ່ມີຄວາມຮູ້ ຄວາມສາມາດທີ່ແທ້ຈິງ ມາຮັບໃຊ້ຊາດຮັບໃຊ້ປະຊາຊົນ, ພັດທະນາປະເທດຊາດໃຫ້ຈະເລີນຮຸ່ງເຮືອງ ກ້າວໜ້າ ເໝືອນບ້ານເພີ່ນເມືອງທ່ານ.
