ສິງກະໂປ ເພີ່ມເງິນພິເສດ ກະຕຸ້ນປະຊາຊົນມີລູກຊ່ວງໂຄວິດ
ລັດຖະບານສິງກະໂປກະຕຸ້ນໃຫ້ປະຊາຊົນມີລູກໃນຊ່ວງໂຄວິດ-19 ລະບາດ ດ້ວຍການເພີ່ມໂຄງການຈ່າຍໂບນັດເພີ່ມຂຶ້ນໃຫ້ປະຊາຊົນທີ່ມີລູກ.
ສຳນັກຂ່າວ BBC ລາຍງານວ່າ: ທ່ານ Heng Swee Keat ຮອງນາຍົກລັດຖະມົນຕີ ແລະ ລັດຖະມົນຕີກະຊວງການເງິນຂອງສິງກະໂປ ກ່າວໃນວັນທີ 5 ຕຸລາວ່າ: ໄວຣັສໂຄໂຣນາເຮັດໃຫ້ຄົນສິງກະໂປສ່ວນຫລາຍເລື່ອນແຜນມີລູກອອກໄປ ເພາະມີຄວາມຄຽດທາງການເງິນ ເນື່ອງຈາກລາຍໄດ້ຫລຸດລົງ ແລະ ບາງຄົນວ່າງວຽກ ເພາະບໍລິສັດຫລຸດຕົ້ນທຶນການຈ້າງຄົນ. ດັ່ງນັ້ນ ລັດຖະບານຈຶ່ງມີແຜນຈະເພີ່ມເງິນໂບນັດ ເພື່ອກະຕຸ້ນໃຫ້ປະຊາຊົນມີລູກເພີ່ມຂຶ້ນ.
ຂະນະທີ່ສິງກະໂປມີບັນຫາອັດຕາການເກີດຕໍ່າທີ່ສຸດໃນໂລກ ແລະ ປີນີ້ມີອັດຕາການເກີດຕໍ່າສຸດໃນຮອບ 8 ປີ ເຊິ່ງອັດຕາການເກີດໃນປີ 2018 ຄື 1,14 ຄົນຕໍ່ແມ່ຍິງ 1 ຄົນ.
ໂດຍຜ່ານມາ ລັດຖະບານພະຍາຍາມສົ່ງເສີມໃຫ້ຄົນໃນປະເທດມີລູກດ້ວຍການຈ່າຍເງິນໃຫ້ປະຊາຊົນມາຫລາຍທົດສະວັດ ເຊິ່ງປັດຈຸບັນມີການຈ່າຍເງິນໂບນັດໃຫ້ປະຊາຊົນທີ່ມີລູກສູງເຖິງ 10.000 ໂດລາສິງກະໂປ (7.330 ໂດລາສະຫະລັດ). ເຖິງຢ່າງໃດກໍຕາມ, ລາຍລະອຽດຈຳນວນເງິນ ແລະ ຮູບແບບການຈ່າຍເງິນຂອງໂຄງການໃໝ່ໃນການກະຕຸ້ນໃຫ້ປະຊາຊົນຍັງບໍ່ມີເປີດເຜີຍອອກມາ.
ທັງນີ້ ບັນຫາອັດຕາການເກີດຕໍ່າຂອງສິງກະໂປ ກົງກັນຂ້າມກັບປະເທດໃກ້ຄຽງຄື: ອິນໂດເນເຊຍ ແລະ ຟີລິບປິນ ເຊິ່ງ 2 ປະເທດນີ້ກຳລັງຜະເຊີນບັນຫາການຖືພາເພີ່ມສູງຂຶ້ນໃນຊ່ວງລັອກດາວ ໂດຍກອງທຶນປະຊາກອນແຫ່ງສະຫະປະຊາຊາດ (United Nations Population Fund – UNFPA) ຄາດຄະເນວ່າ: ຖ້າມາດຕະການລັອກດາວຢູ່ຟີລິບປິນມີຍາວໄປຮອດທ້າຍປີນີ້ ຈະເຮັດໃຫ້ມີການຖືພາໂດຍບໍ່ຕັ້ງໃຈເພີ່ມຂຶ້ນເກືອບ 50% ຫລື ຈຳນວນ 2,6 ລ້ານຄົນ.
ປັດຈຸບັນ ຟີລິບປິນມີປະຊາກອນຫລາຍເປັນອັນດັບສອງໃນອາຊີຕາເວັນອອກສຽງໃຕ້ ໂດຍມີ 108,4 ລ້ານຄົນ ແລະ ເປັນໜຶ່ງໃນປະເທດທີ່ມີສະຖານະການການແຜ່ລະບາດຂອງໄວຣັສໂຄໂຣນາຮ້າຍແຮງທີ່ສຸດໃນພາກພື້ນ ເພາະມີຜູ້ຕິດເຊື້ອຫລາຍກວ່າ 307.000 ຄົນ.
