ທົ່ວປະເທດມີຜູ້ຕິດເຊື້ອໄຂ້ຍຸງລາຍເພີ່ມຂຶ້ນ 48 ກໍລະນີ
ໃນວັນທີ 6 ຕຸລານີ້, ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃຫ້ຮູ້ວ່າ: ສະເພາະວັນທີ 5 ຕຸລານີ້ ສປປ ລາວ ມີຜູ້ຕິດເຊື້ອໄຂ້ຍຸງລາຍທັງໝົດ 48 ກໍລະນີ ເຊິ່ງເຮັດໃຫ້ຈຳນວນຜູ້ຕິດເຊື້ອພະຍາດດັ່ງກ່າວນັບແຕ່ວັນທີ 1/1/-5/10/2020 ເພີ່ມຂຶ້ນ 6.966 ຄົນ, ໃນນັ້ນ ແຂວງທີ່ມີກໍລະນີຜູ້ຕິດເຊື້ອຫລາຍກວ່າໝູ່ແມ່ນ ນະຄອນຫລວງວຽງຈັນມີເຖິງ 1.603 ຄົນ, ຖັດລົງມາແມ່ນບໍລິຄຳໄຊມີ 776 ຄົນ, ບໍ່ແກ້ວ 689 ຄົນ ແລະ ວຽງຈັນ 671 ຄົນ. ສ່ວນຈຳນວນຜູ້ເສຍຊີວິດຍ້ອນພະຍາດໄຂ້ຍຸງລາຍມີ 12 ຄົນ, ໃນນັ້ນ ນະຄອນຫລວງມີ 4 ຄົນ, ບໍລິຄຳໄຊ ແລະ ຄຳມ່ວນມີແຂວງລະ 2 ຄົນ, ໄຊຍະບູລີ, ຊຽງຂວາງ, ສະຫວັນນະເຂດ ແລະ ຜົ້ງສາລີ ແຂວງລະ 1 ຄົນ.
ຍ້ອນສະພາບດັ່ງກ່າວ ກະຊວງສາທາລະນະສຸກຈຶ່ງຂໍຮຽກຮ້ອງມາຍັງປະຊາຊົນ, ຊຸມຊົນ ແລະ ອຳນາດການປົກຄອງທຸກຂັ້ນ ຮ່ວມແຮງຮ່ວມໃຈກັນປະຕິບັດ 5.ປ ຢ່າງເຄັ່ງຄັດໃຫ້ເປັນປະຈຳຄື: ປິດຝາພາຊະນະທີ່ເກັບນ້ຳໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງລາຍມາໄຂ່ໃສ່, ປ່ຽນນ້ຳໃນພາຊະນະ ເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖ້ານຮອງຈອກນ້ຳ, ປ່ອຍປາຫາງນົກຍຸງ ເພື່ອກິນໜອນນ້ຳ, ປັບປຸງການອະນາໄມສິ່ງແວດລ້ອມອ້ອມເຮືອນ ບໍ່ໃຫ້ມີກະໂປະ-ກະປ໋ອງ, ຢາງຕີນລົດເກົ່າທີ່ມີນ້ຳຂັງ, ປະຕິບັດໃຫ້ເປັນນິໄສປະຈຳທຸກໆອາທິດ. ຖ້າເປັນໄຂ້ໃຫ້ຮີບຮ້ອນໄປພົບແພດໝໍ ບໍ່ໃຫ້ຊື້ຢາມາກິນເອງ ເພື່ອຈະໄດ້ຮັບການປິ່ນປົວທັນການ.
