4 ປີ ຜ່ານມາ ມີຜູ້ຊົມໃຊ້ສິນຄ້າ ແລະ ບໍລິການສະເໜີຮ້ອງທຸກ 265 ກໍລະນີ

ໜ່ວຍງານປົກປ້ອງຜູ້ຊົມໃຊ້ຂອງກະຊວງອຸດສາຫະກຳ ແລະ ການຄ້າ ມີບົດບົດສຳຄັນໃນການປົກປ້ອງຮັບປະກັນຄວາມປອດໄພ, ເປັນທຳ ເພື່ອບໍ່ໃຫ້ຜູ້ສະໜອງເອົາລັດເອົາປຽບ ແລະ ເກີດຄວາມເປັນທຳລະຫວ່າງຜູ້ຊື້ ກັບຜູ້ຂາຍ, ບໍ່ໃຫ້ຕົກເປັນເຫຍື່ອຂອງການໂຄສະນາແບບຊວນເຊື່ອເກີນຄວາມເປັນຈິງ, ນຳເຂົ້າສິນຄ້າທີ່ບໍ່ມີຄຸນນະພາບ, ບໍ່ໄດ້ມາດຕະຖານ ແລະ ບໍ່ມີຄວາມປອດໄພ, ທັງເປັນການປົກປ້ອງສິດ ແລະ ຜົນປະໂຫຍດອັບຊອບທຳຂອງຜູ້ຊົມໃຊ້ທີ່ໄດ້ຮັບຜົນກະທົບທາງລົບຕໍ່ຊີວິດ, ສຸຂະພາບ ແລະ ຊັບສິນ ຈາກການຊົມໃຊ້ສິນຄ້າ ແລະ ບບໍລິການທີ່ບໍ່ມີຄຸນນະພາບດັ່ງກ່າວ.

ທ່ານ ຂວັນໃຈ ອ່ຽມສຸທິ ຮອງຫົວໜ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ທັງເປັນຜູ້ຮັບຜິດໜ່ວຍງານປົກປ້ອງຜູ້ຊົມໃຊ້ ໃຫ້ສຳພາດຕໍ່ໜັງສືພິມ ລາວພັດທະນາວ່າ: ໃນໄລຍະຜ່ານມາອົງຂອງຕົນໄດ້ຮັບຄຳຮ້ອງທຸກ/ຄຳສະເໜີ ແລະ ການແຈ້ງຜູ້ຕ້ອງຫາເປັນຈຳນວນຫລາຍຄື: ນັບແຕ່ປີ 2016-2019 ມີ 265 ກໍລະນີ, ໃນນັ້ນຫລາຍກວ່າໝູ່ແມ່ນປີ 2017 ມີ 87 ກໍລະນີ, ແກ້ໄຂໄດ້ 50, ແກ້ໄຂບໍ່ໄດ້ 38 ກໍລະນີ, ຖັດລົງມາແມ່ນ ປີ 2016 ມີ 68 ກໍລະນີ, ແກ້ໄຂໄດ້ 39 ກໍລະນີ, ປີ 2018 ມີ 48 ກໍລະນີ, ແກ້ໄຂໄດ້ 40 ກໍລະນີ ແລະ ປີ 2019 ມີ 62 ກໍລະນີ, ແກ້ໄຂໄດ້ 42 ກໍລະນີ.

ສາເຫດໃນການຮ້ອງທຸກສ່ວນຫລາຍແມ່ນບັນຫາເອົາລັດເອົາປຽບກັນດ້ານລາຄາສິນຄ້າ ແລະ ການບໍລິການ, ເຊິ່ງການຮ້ອງທຸກ ແລະ ສະເໜີດັ່ງກ່າວແມ່ນ ຜ່ານທາງສາຍດ່ວນ 1510, ເຟສບຸກເພຈ ຫລື ເວບໄຊ lcp.moic.gov.la ແລະ ສາຍດ່ວນ 1516 ຂອງຫ້ອງວ່າການສໍານັກງານນາຍົກລັດຖະມົນຕີເປັນຕົ້ນຕໍ.