IMF ກ່າວເຕືອນວ່າ ເສດຖະກິດຈະວິກິດການເພາະການລະບາດຂອງໂຄວິດ-19 ຈະແກ່ຍາວຫຼາຍປີ
ສຳນັກຂ່າວ Reuters ລາຍງານເມື່ອວັນທີ 30 ກັນຍາຜ່ານມາ, ໂດຍອ້າງອີງຄຳເຫັນຂອງ ຮອງຫົວໜ້າອົງການກອງທຶນລະຫວ່າງຊາດ(IMF) ທ່ານ Geoffrey Okamoto ທີ່ພະຍາກອນວ່າ: ການສົ່ງຜົນກະທົບຂອງໂຄວິດ-19 ນັ້ນ ຈະແກ່ຍາວກ່ວາທີ່ໄດ້ຄາດຄະເນໄວ້ກ່ອນໜ້ານີ້ ແລະ ມີບາງປະເທດອາດຈະເສຍເວລາຫຼາຍປີຈຶ່ງຈະຟື້ນຕົວໄດ້.
ນັບຕັ້ງແຕ່ມື້ໂຄວິດ-19 ລະບາດຂຶ້ນມາ, IMF ໄດ້ໜູນເງິນໃຫ້ 79 ປະເທດແລ້ວ ຈຳນວນ 90 ຕື້ ໂດລາ, ໃນນັ້ນມີປະເທດໃນອາເມລິກາລາຕິນ 20 ປະເທດ.
ການພົບປະທາງໄກ ໂດຍສູນຄົ້ນຄ້ວາຍຸດທະສາດສາກົນ(CSIS) ຂອງສະຫະລັດຈັດຂຶ້ນ, ທ່ານ Okamoto ໃຫ້ຮູ້ວ່າ: IMFກຳລັງສົມທົບກັບບັນດາປະຊາຊາດສະມາຊິກ ສືບຕໍ່ຮັບມືກັບໂຄວິດ-19 ເພື່ອໃຫ້ໄດ້ຮັບຜົນກະທົບທາງເສດຖະກິດໜ້ອຍທີ່ສຸດຈາກໂຄວິດ-19.
ຊຶ່ງຂະນະນີ້ ຂົງເຂດທີ່ໄດ້ຮັບຜົນກະທົບທາງດ້ານເສດຖະກິດໜັກສູດໃນໂລກໄດ້ແກ່ ອາເມລິກາລາຕິນ, ຂົງເຂດທະເລກາຣີບຽນ. ມີປະມານ 8,4 ລ້ານຄົນຕິດເຊື້ອໂຄວິດ-19ແລະ ຫຼາຍກ່ວາ 314.000 ຄົນເສຍຊີວິດ.
