ກອງບັນຊາການທະຫານແຂວງໄຊສົມບູນ ປັບປຸງການຈັດຕັ້ງຂອງຕົນ

ໃນວັນທີ 2 ຕຸລານີ້, ກອງບັນຊາການທະຫານແຂວງໄຊສົມບູນ ໄດ້ຈັດພິທີປະກາດການຈັດຕັ້ງ ຄະນະພັກ, ໂດຍການເຂົ້າຮ່ວມ ຂອງ ສະຫາຍ ພົທ ສຸວອນ ເລືອງບຸນມີ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ມີສະຫາຍ ບຸນສຸກ ຈອມວິສານ, ຮອງເລຂາພັກແຂວງ ປະທານສະພາປະຊາຊົນແຂວງ.

ໃນພິທີ ສະຫາຍ ທອງວັນ ທຳມະວົງ ຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຂອງຄະນະເລຂາທິການສູນກາງພັກວ່າດ້ວຍການບົງຕົວແຕ່ງຕັ້ງເພີ່ມເຕີມ ສະຫາຍ ພັອ ຄໍາອິ້ງ ກິ່ງແກ້ວ ເປັນກໍາມະການຄະນະບໍລິຫານງານພັກແຂວງໄຊສົມບູນ, ເປັນຮອງເລຂາຄະນະພັກກອງບັນຊາການ, ຫົວໜ້າການທະຫານກອງບັນຊາການທະຫານແຂວງ ຂຶ້ນເປັນ ເລຂາ, ແຕ່ງຕັ້ງ ສະຫາຍ ພັອ ໝອນຄໍາ ດວງສະຫວັນ, ຄະນະປະຈໍາກອງບັນຊາການ, ຮອງຫົວໜ້າການເມືອງ ຂຶ້ນເປັນຮອງເລຂາຄະນະພັກກອງບັນຊາການທະຫານແຂວງ ແລະ ຜ່ານຂໍ້ຕົກລົງ ຂອງກະຊວງປ້ອງກັນປະເທດ ວ່າດ້ວຍການແຕ່ງຕັ້ງຄະນະກອງບັນຊາການທະຫານແຂວງ ແລະ ກົມກອງສໍາຄັັນອື່ນໆອີກ ທັງນີ້ ກໍເພື່ອເຮັດຄະນະພັກ-ຄະນະບັນຊາ ກອງບັນຊາການທະຫານແຂວງ ໃຫ້ມີຄວາມເຂັ້ມແຂງ ແລະ ທັງເປັນການປັບປຸງການຈັດຕັ້ງ, ແບບແຜນວິທີເຮັດວຽກ ຂອງກອງບັນຊາການທະຫານແຂວງໄຊສົມບູນ ໃຫ້ເຕີບໃຫຍ່ຂະຫຍາຍຕົວ.