ອາເມລິກາປະກາດເຕືອນປະຊາຊົນ 8 ເມືອງໃນລັດເທັກຊັສ ຫລັງພົບເຊື້ອອະມີບາໃນແຫລ່ງນ້ຳ ອັນຕະລາຍເຖິງຊີວິດ
ລັດເທັກຊັສພົບເຊື້ອອະມີບາໃນແຫລ່ງນ້ຳ ປະກາດເຕືອນປະຊາຊົນ 8 ເມືອງລະວັງການໃຊ້ນ້ຳ ພ້ອມແນະນຳຄວນຕົ້ມກ່ອນດື່ມ.
ສຳນັກຂ່າວ BBC ແລະ CNN ລາຍງານວ່າ: ຄະນະກຳມະການດ້ານສິ່ງແວດລ້ອມຂອງເທັກຊັສ (Texas Commission on Environmental Quality) ສະຫະລັດອາເມລິກາ ໄດ້ປະກາດ ປະຊາຊົນທີ່ອາໄສຢູ່ໃນ 8 ເມືອງໃຫຍ່ ໃຫ້ເຝົ້າລະວັງການໃຊ້ນ້ຳ ຫລັງເຈົ້າໜ້າທີ່ກວດພົບເຊື້ອອະມີບາ (Naegleria fowleri) ໃນແຫລ່ງນ້ຳຈືດຫລາຍແຫ່ງທົ່ວລັດ ໂດຍເຊື້ອດັ່ງກ່າວອາດສົ່ງຜົນໃຫ້ເກີດພະຍາດອະມີບາກິນສະໝອງ ຫລື ພະຍາດເຍື່ອຫຸ້ມສະໝອງອັກເສບຈາກອະມີບາ ເຊິ່ງມີອັນຕະລາຍເຖິງຊີວິດ. ເບື້ອງຕົ້ນມີ 1 ໃນ 8 ເມືອງໄດ້ປະກາດເປັນໄພພິບັດແລ້ວ.
ໃນທ້າຍອາທິດຜ່ານມາ, ເຈົ້າໜ້າທີ່ເຕືອນບໍ່ໃຫ້ປະຊາຊົນໃຊ້ນ້ຳປະປາໂດຍເດັດຂາດ ບໍ່ວ່າຈະດ້ວຍເຫດຜົນໃດໆ ຍົກເວັ້ນການລ້າງຫ້ອງນ້ຳ ກ່ອນເຈົ້າໜ້າທີ່ຈະອະນຸຍາດໃຫ້ປະຊາຊົນສາມາດກັບມາໃຊ້ນ້ຳໄດ້ອີກ ແຕ່ຈະຕ້ອງຕົ້ມກ່ອນ. ຂະນະທີ່ເດັກນ້ອຍ, ຜູ້ອາຍຸສູງ ແລະ ຜູ້ທີ່ມີລະບົບພູມຄຸ້ມກັນອ່ອນແອຕ້ອງລະມັດລະວັງເປັນພິເສດ. ເຖິງຢ່າງໃດກໍຕາມ ປະຊາຊົນໃນພື້ນທີ່ທະເລສາບແຈັກສັນມີຜູ້ຢູ່ອາໄສຫລາຍກວ່າ 27.000 ຄົນ ຍັງຈັດຢູ່ໃນພື້ນທີ່ສ່ຽງຕໍ່ໄປ.
ທັງນີ້ ເຈົ້າໜ້າທີ່ຢູ່ລະຫວ່າງການກວດສອບຄວາມສະອາດຂອງລະບົບການຈ່າຍນ້ຳໃນລັດ ແລະ ກຽມທົດສອບມາດຕະຖານດ້ານຄວາມປອດໄພ. ສູນຄວບຄຸມ ແລະ ປ້ອງກັນພະຍາດແຫ່ງຊາດຂອງເມລິກາ (CDC) ກ່າວວ່າ: ອະມີບາ Naegleria fowleri ສ່ວນຫລາຍຈະພົບໄດ້ໃນແຫລ່ງນ້ຳທີ່ມີອຸນຫະພູມສູງ ຫລື ສະລອຍນ້ຳທີ່ມີການຮັກສາຄວາມສະອາດບໍ່ໄດ້ມາດຕະຖານ. ນອກຈາກນີ້ ຍັງສັ່ງຫ້າມບໍ່ໃຫ້ປະຊາຊົນໃຊ້ນ້ຳ ຫລື ລົງຫລິ້ນນ້ຳໃນທະເລສາບ ແລະ ແຫລ່ງນ້ຳຈືດ 8 ແຫ່ງ.
ໂດຍສື່ທ້ອງຖິ່ນລາຍງານວ່າ: ໃນຕົ້ນເດືອນກັນຍາຜ່ານມາ, ພົບເດັກນ້ອຍອາຍຸ 6 ປີ ຕິດເຊື້ອພະຍາດອະມີບາກິນສະໝອງ ແລະ ເສຍຊີວິດໃນເວລາຕໍ່ມາ. ຈາກເຫດການດັ່ງກ່າວເຮັດໃຫ້ເຈົ້າໜ້າທີ່ເລີ່ມມີການກວດສອບແຫລ່ງທີ່ມາຈົນພົບວ່າມີຄວາມເປັນໄປໄດ້ທີ່ເດັກຄົນດັ່ງກ່າວອາດຕິດເຊື້ອອະມີບາຈາກນ້ຳພຸບໍລິເວນໜ້າ Lake Jackson Civic Center ຫລື ອາດຕິດມາຈາກນ້ຳເປື້ອນທີ່ປ່ອຍອອກມາຈາກເຮືອນຂອງລາວ.
