ສະຫລຸບບັນຫາໜ້າສົນໃຈທົ່ວໂລກ ວັນທີ 29 ກັນຍາ 2020
- COVID-19 ໄດ້ຂ້າຊີວິດຜູ້ຄົນໄປຫລາຍກວ່າ 1.000.000 ຄົນຮຽບຮ້ອຍແລ້ວ ຕາມຈຳນວນຜູ້ເສຍຊີວິດທີ່ໄດ້ຮັບການຢືນຢັນ ໂດຍລາຍງານຂອງມະຫາວິທະຍາໄລ Johns Hopkins. ຂະນະທີ່ ຈຳນວນຜູ້ຕິດເຊື້ອມີຫລາຍກວ່າ 33 ລ້ານຄົນ.
ອາເມລິກາມີຜູ້ເສຍຊີວິດຫລາຍທີ່ສຸດເປັນປະຫວັດສາດ ຫລາຍກວ່າ 200.000 ຄົນ, ຖັດມາແມ່ນເບຣຊິນ 140.000 ກວ່າຄົນ, ສ່ວນອິນເດຍມີຜູ້ຕິດເຊື້ອຫລາຍກວ່າ 6 ລ້ານຄົນ ແລະ ຜູ້ເສຍຊີວິດສູງເຖິງ 95.000 ຄົນ. ຂະນະທີ່ຫລາຍປະເທດໃນເອີຣົບກຳລັງດິ້ນຮົນເພື່ອປ້ອງກັນການແຜ່ລະບາດຮອບ 2.
- ການຕໍ່ສູ້ທະວີຄວາມຮຸນແຮງຂຶ້ນລະຫວ່າງກອງກຳລັງຂອງປະເທດ Azerbaijan ແລະ Armenia ຢູ່ບໍລິເວນ Nagorno-Karabakh ເຊິ່ງເປັນດິນແດນສ່ວນໜຶ່ງຂອງ Azerbaijan ທີ່ຢູ່ພາຍໃຕ້ການປົກຄອງຂອງຕົນເອງ ໂດຍຊົນກຸ່ມນ້ອຍຊາວ Armenian.
ຫລ້າສຸດມີລາຍງານວ່າທະຫານຫລາຍ 10 ຄົນເສຍຊີວິດ. ຂະນະທີ່ຕວກກີໃຫ້ການສະໜັບສະໜູນ Azerbaijan, ສ່ວນຣັດເຊຍເຊິ່ງສະໜັບສະໜູນ Armenia ໄດ້ອອກມາຮຽກຮ້ອງໃຫ້ມີການຢຸດຍິງທັນທີ.
ຄວາມຂັດແຍ່ງດັ່ງກ່າວເປັນຜົນມາຈາກການລົ້ມສະຫລາຍຂອງສະຫະພາບໂຊວຽດ ເຖິງວ່າບັນຫາຫລາຍຢ່າງຈະໄດ້ຮັບການແກ້ໄຂມາເລື້ອຍໆ ນັບແຕ່ປີ 1994.
- ຫຸ້ນທົ່ວໂລກເພີ່ມຂຶ້ນຫລັງຈາກປັ່ນປ່ວນມາຫລາຍອາທິດ ຢູ່ອາເມລິກາ ເຊິ່ງກ່ອນໜ້ານີ້ການຫລຸດລົງຂອງຫຸ້ນເຕັກໂນໂລຊີໄດ້ດຶງໃຫ້ດັດຊະນີຫລັກໆຫລຸດລົງ, ແຕ່ຫລ້າສຸດ ຄ່າສະເລ່ຍອຸດສາຫະກຳ Dow Jones ແລະ S&P 500 ເພີ່ມຂຶ້ນຫລາຍກວ່າ 1,8% ໃນການຊື້ຂາຍ ໂດຍມີບໍລິສັດທາງດ້ານພະລັງງານ ແລະ ການເງິນຢູ່ໃນກຸ່ມທີ່ມີຜົນການດຳເນີນງານແຂງແກ່ນທີ່ສຸດ. ຂະນະທີ່ຫຸ້ນເອີຣົບປັບຂຶ້ນເຊັ່ນກັນ.
- ລັດຖະບານຂອງຝຣັ່ງ ໄດ້ສະເໜີແຜນງົບປະມານສຳລັບປີ 2021 ອອກມາແລ້ວ ໂດຍການລະບາດຂອງ COVID-19 ແລະ ການຢຸດສະງັກຕ່າງໆ ໄດ້ເຮັດໃຫ້ຂະແໜງການເງິນຂອງປະເທດມີຊ່ອງວ່າງ ແລະ ຄາດວ່າຈະຂາດດຸນ 10,2% ຂອງ GDP ໃນປີນີ້ ເຊິ່ງຖືເປັນປະຫວັດສາດ.
Bruno Le Maire ລັດຖະມົນຕີວ່າການກະຊວງການເງິນ ວາງແຜນຈະໃຊ້ຈ່າຍເພື່ອຟື້ນຟູເສດຖະກິດ ມູນຄ່າ 4,2 ໝື່ນລ້ານເອີຣົບ (4,9 ໝື່ນລ້ານໂດລາ) ຈາກແຜນການທັງໝົດທີ່ມີມູນຄ່າ 100.000 ລ້ານເອີໂຣ ໃນປີໜ້າ.
- Uber ຊະນະການຕໍ່ສູ້ເລື່ອງໃບອະນຸຍາດກັບໜ່ວຍງານຂົນສົ່ງສາທາລະນະຂອງລອນດອນ ໂດຍສານຕັດສິນວ່າ ບໍລິສັດເປັນຜູ້ດຳເນີນການທີ່ “ເໝາະສົມ ແລະ ຖືກຕ້ອງຕາມກົດໝາຍ” ຫລັງຈາກໃບອະນຸຍາດຂອງພວກເຂົາຖືກຖອດອອກຄັ້ງທຳອິດໃນປີ 2017 ດ້ວຍເຫດຜົນດ້ານຄວາມປອດໄພ. ຈາກນັ້ນ ຖືກຖອນອີກໃນເດືອນພະຈິກປີຜ່ານມາ.
ເຫດການທັງໝົດເກີດຂຶ້ນມີຜູ້ຂັບຂີ່ທີ່ບໍ່ໄດ້ລົງທະບຽນຢ່າງຖືກຕ້ອງ ໄດ້ສວມຮອຍເປັນຜູ້ໄດ້ຮັບອະນຸ ຍາດຈາກບໍລິສັດ ໂດຍຫລ້າສຸດ Sadiq Khan ເຈົ້າຄອງນະຄອນຫລວງລອນດອນ ສັນຍາວ່າຈະກວດ ສອບບໍລິສັດຢ່າງໃກ້ຊິດ ເພື່ອໃຫ້ໝັ້ນໃຈວ່າຈະຮັກສາມາດຕະຖານໄວ້ໄດ້.
- ປະທານາທິບໍດີ ໂດນັລ ທຣຳ ຫວັງວ່າການອະພິປາຍທາງໂທລະພາບກັບທ່ານ ໂຈໄບເດັນ ໃນຄືນນີ້ຈະຊ່ວຍໃຫ້ທ່ານໄດ້ຖານສຽງເພີ່ມຂຶ້ນ, ທ່ານໄດ້ຮັບຄະແນນຈາກແບບສຳຫລວດເບື້ອງຕົ້ນໂດຍສະເລ່ຍພຽງ 43% ເມື່ອທຽບໃສ່ 50% ສຳລັບ Jod Biden ທີ່ເປັນຄູ່ແຂ່ງຝ່າຍປະຊາທິປະໄຕ.
- ຝ່າຍບໍລິຫານຂອງທ່ານ ທຣຳ ກຳລັງພິຈາລະນາມາດຕະການຂວ້ຳບາດສະບັບໃໝ່ ເພື່ອທຳລາຍເສດຖະກິດຂອງອີຣານຈາກໂລກພາຍນອກ ໂດຍການກຳນົດເປົ້າໝາຍທີ່ທະນາຄານຫລາຍກວ່າ 12 ແຫ່ງ ແລະ ຕິດປ້າຍວ່າ ຂະແໜງການເງິນທັງໝົດເຫລົ່ານັ້ນຢູ່ນອກເໜືອການເຮັດທຸລະກຳຮ່ວມກັບອາເມລິກາ.
ການເຄື່ອນໄຫວດັ່ງກ່າວຖືເປັນການກີດກັນອີຣານຢ່າງມີປະສິດທິພາບ ເຊິ່ງພວກເຂົາເຄີຍໄດ້ເຫັນເສດຖະກິດຂອງຕົນຖືກຢຽບຢຳຈາກການສູນເສຍຄວາມສາມາດໃນການຂາຍນ້ຳມັນ ແລະ ການຄ້າອື່ນໆ ສ່ວນຫລາຍຂອງປະເທດ ເນື່ອງຈາກມາດຕະການຂວ້ຳບາດຂອງອາເມລິກາ ເຊິ່ງແຍກອີຣານອອກຈາກລະບົບການເງິນໂລກ ແລະ ຫລຸດການເຊື່ອມໂຍງທາງກົດໝາຍລະຫວ່າງປະເທດຕ່າງທໃນພື້ນທີ່ທີ່ອາເມລິກາມີອຳນາດຄວບຄຸມ ແລະ ເຮັດໃຫ້ພວກເຂົາຕ້ອງອາໄສຫລາຍຂຶ້ນ ເຊິ່ງລວມທັງການຄ້ານອກລະບົບ ຫລື ການກະທຳທີ່ຜິດກົດໝາຍສາກົນ.
