ໄຟຟ້າຈະນຳພາປະເທດຊາດຈະເລີນຮັ່ງມີໃນອະນາຄົດ
ໂດຍ:ທິດກໍ່າ
ນັບແຕ່ປີ 2019 ຫາທ້າຍປີ 2020 ຖືວ່າເປັນໄລຍະທີ່ມີກະແສສັງຄົມໄດ້ຕຳນິວິຈານເລື່ອງໄຟຟ້າຢ່າງໂດດເດັ່ນຫລວງຫລາຍພໍສົມຄວນ. ບາງຄົນກໍເວົ້າວ່າ: ຄ່າກະແສໄຟຟ້ານັບມື້ແພງຂຶ້ນຕິກໆ, ບາງຫາງສຽງກໍເວົ້າວ່າ: ພະນັກງານໄຟຟ້າຈົດເລກກົງເຕີບໍ່ຖືກກັບຕົວຈິງ, ບາງຄົນກໍເວົ້າວ່າ: ໃຊ້ກະແສໄຟຟ້າໜ້ອຍແຕ່ມູນຄ່າຈ່າຍພັດເກີນຄວາມເປັນຈິງໂພດ, ຍິ່ງໄປກວ່ານັ້ນ ພັດມີຫາງສຽງວ່າ: ບໍລິສັດໄຟຟ້າແທນທີ່ຈະບໍລິການປະຊາຊົນ ຊ້ຳພັດມາໂກງກິນເງິນນຳປະຊາຊົນ ແລະ ຍັງມີຫາງສຽງອື່ນໆທີ່ຈົງໃຈຕຳນິວິຈານກັນແບບຕ່າງໆນາໆ. ທັງໝົດທີ່ກ່າວມານີ້ ຕົ້ນເຫດຂອງມັນກໍມາຈາກຄ່າກະແສໄຟຟ້ານັບມື້ທະວີຄູນສູງຂຶ້ນ ຈົນປະຊາຊົນໃນທົ່ວປະເທດບໍ່ສາມາດຍອມຮັບໄດ້. ນອກຈາກນັ້ນ ຍັງພົວພັນລາມໄປເຖິງການບໍລິຫານຈັດການຂອງລັດວິສາຫະກິດໄຟຟ້າລາວເບິ່ງຄືມີເງື່ອນງຳເຄິ່ງມືດເຄິ່ງແຈ້ງ, ເຄິ່ງເຫ້ຍເຄິ່ງແລນ ນັບທັງພະນັກງານທີ່ເກັບຄ່າໄຟ, ກວມລວມໄປເຖິງການຄິດໄລ່ທີ່ອືດອາດຍືດຍາວຊັກຊ້າປານດຶງຂາເຕົ່າຈົນເປັນເຫດໃຫ້ມີການປົດຜູ້ອຳນວຍການໃຫຍ່ບໍລິສັດໄຟຟ້າລາວຢ່າງກະທັນຫັນ ແລ້ວແຕ່ງຕັ້ງເອົາຜູ້ໃໝ່ຂຶ້ນແທນ. ຍັງບໍ່ພຽງແຕ່ເທົ່ານັ້ນ, ບັນຫາເລື່ອງໄຟຟ້າຍັງເປັນປະເດັນອັນສຳຄັນຈົນໄດ້ນຳເຂົ້າໄປປຶກສາຖົກຖຽງຄົ້ນຄວ້າແກ້ໄຂໃນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VIII ຢ່າງມີບັນຍາກາດຟົດຟື້ນພໍສົມຄວນ. ໃນໂອກາດກອງປະຊຸມສະພາຄັ້ງນີ້ ທ່ານນາຍົກລັດຖະມົນຕີ ທອງລຸນ ສີສຸລິດ ກໍໄດ້ມີຄຳເຫັນບາງຕອນວ່າ: ເທົ່າທີ່ຜ່ານມາເຫັນວ່າໄຟຟ້າລາວຍັງບໍ່ທັນໄດ້ກະຕຸກຊຸກຊູ້ເສດຖະກິດຂອງຊາດໃຫ້ເຕີບໃຫຍ່ເຂັ້ມແຂງພໍປານໃດ. ເມື່ອສະພາບດັ່ງກ່າວມັນກໍພົວພັນເຖິງການລົງທຶນຂອງພາຍໃນ ແລະ ຕ່າງປະເທດ ເປັນຕົ້ນຄືໄຟຟ້າແພງໃຜກໍບໍ່ຢາກມາລົງທຶນ ທັງມີຫາງສຽງວິພາກວິຈານໃນສັງຄົມຈຶ່ງຈຳເປັນຕ້ອງໄດ້ຄິດໄລ່ຄ່າກະແສໄຟຟ້າຄືນໃໝ່ໃຫ້ເໝາະກັບສະພາບຄວາມເປັນຈິງຢ່າງເໝາະສົມ.
ສະຫລຸບແລ້ວ, ນັບແຕ່ມີການປ່ຽນແປງຜູ້ອຳນວຍການໃໝ່ ແລະ ນຳເອົາເນື້ອໃນຈິດໃຈຂອງສະພາໄປຈັດຕັ້ງປະຕິບັດບັນຫາເລື່ອງໄຟຟ້າມາຮອດປັດຈຸບັນກໍເຫັນວ່າມີຄວາມສະຫງົບລົງໂດຍພື້ນຖານ ອັນທີ່ສະແດງອອກກໍຄື ບໍ່ມີຫາງສຽງຕຳນິວິຈານ ແລະ ທາງເບື້ອງລັດວິສາຫະກິດໄຟຟ້າເອງກໍມີການປັບປຸງລະບົບການຈັດຕັ້ງ ນັບທັງມີການບໍລິຫານຈັດການທີ່ດີ ແລະ ເຂັ້ມງວດຕໍ່ຈັນຍາບັນ ທັງມີການໂຄສະນາຜ່ານສື່ສັງຄົມໃຫ້ເຫັນແຈ້ງຕໍ່ພາລະບົດບາດ, ໜ້າທີ່ຂອງລັດວິສາຫະກິດໄຟຟ້າລາວ ກໍຄືການບໍລິການປະຊາຊົນ, ຮັບໃຊ້ປະຊາຊົນເໝືອນດັ່ງໄມ້ຄ້ຳກ້ວຍກັບກ້ວຍຄ້ຳໄມ້ ຫລືວ່າ ນ້ຳເພິ່ງເຮືອ ເສືອເພິ່ງປາ.
ແນວໃດກໍຕາມ, ອີງໃສ່ແນວທາງນະໂຍບາຍຂອງພັກ ແລະ ລັດຖະບານເຮົາ ກໍຄືແຜນພັດທະນາເສດຖະກິດ-ສັງຄົມແຫ່ງລັດໃນຜ່ານມາ ກໍຄືປັດຈຸບັນ ແລະ ອະນາຄົດໄດ້ຖືເອົາການຂະຫຍາຍຕາໜ່າງໄຟຟ້າເປັນໜຶ່ງໃນແຜນຍຸດທະສາດເສດຖະກິດຂອງຊາດ ເພາະປະເທດເຮົາບໍ່ມີທາງອອກສູ່ທະເລ, ແຕ່ມີແມ່ນ້ຳລຳເຊ, ພູຜາປ່າໄມ້, ຮ່ອມຫ້ວຍພູເຂົາທີ່ອຸດົມສົມບູນ ແລະ ອັນສຳຄັນທີ່ສຸດແມ່ນປະເທດລາວເຮົາມີເງື່ອນໄຂໃນການກໍ່ສ້າງເຂື່ອນໄຟຟ້າດ້ວຍພະລັງນ້ຳໄດ້ຢ່າງຫລວງຫລາຍ ຈຶ່ງໄດ້ຖືເອົາໂຄງການນີ້ເປັນພະລັງແຮງທາງດ້ານເສດຖະກິດຂອງຊາດ. ປັດຈຸບັນ ປະເທດລາວຂອງພວກເຮົາມີເຂື່ອນໄຟຟ້າທັງເກົ່າ ແລະ ໃໝ່ທີ່ໄດ້ກໍ່ສ້າງສຳເລັດໄປແລ້ວຈຳນວນ 78 ແຫ່ງ, ມີກຳລັງຕິດຕັ້ງທັງໝົດ 9.972 ເມກາວັດ ແລະ ສາມາດຜະລິດກະແສໄຟຟ້າໄດ້ 52.211 ລ້ານກິໂລວັດໂມງ. ຄາດກະວ່າໃນຕໍ່ໜ້າ ແລະ ຍາວນານ ປະເທດຊາດຂອງພວກເຮົາຈະໃຫ້ມີເຂື່ອນໄຟຟ້າທັງໝົດ 100 ກວ່າແຫ່ງ.
ແຕ່ແນວໃດກໍດີ, ເຖິງວ່າໃນປັດຈຸບັນ ມີເຂື່ອນໄຟຟ້າຈຳນວນໜຶ່ງຍັງມີການຮ່ວມທຶນກັບຕ່າງປະເທດ ຫລືວ່າ ມີການສຳປະທານຈາກຕ່າງປະເທດ, ແຕ່ໃນອະນາຄົດຕໍ່ໜ້າອີກ 30-50 ປີ ໂຄງການຕ່າງໆຫາກໝົດອາຍຸການຮ່ວມທຶນ ຫລື ສຳປະທານ, ເຂື່ອນຕ່າງໆເຫລົ່ານັ້ນຈະຕົກເປັນກຳມະສິດຂອງລັດຖະບານເຮົາ ແລ້ວທຸກສິ່ງທຸກຢ່າງເລື່ອງໄຟຟ້າກໍຈະເດີນໜ້າ ແລະ ມີລາຍຮັບຢ່າງມະຫາສານໃຫ້ແກ່ປະເທດຊາດ. ແນ່ນອນໃນອະນາຄົດພາຍພາກໜ້າ ຄວາມສຸກ, ຄວາມມັ່ງຄັ່ງ, ຄວາມຈະເລີນຮັ່ງມີກໍຈະຕົກຢູ່ນຳລູກຫລານຜູ້ເກີດໃໝ່ໃຫຍ່ລຸນຢ່າງແທ້ຈິງ. ຄິດໄປຄິດມາແລ້ວ ມັນກໍບໍ່ຕ່າງຫຍັງກັບພວກເຮົາເຮັດການປະຕິວັດໃນເມື່ອກ່ອນ. ໃນສະໄໝເຮັດການປະຕິວັດຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານ ຄົນຮຸ້ນກ່ອນໄດ້ເສຍສະຫລະເພື່ອປະເທດຊາດ, ພ້ອມກັນຢູ່ປ່າຢູ່ດົງ, ຢູ່ຖ້ຳຮູພູເຂົາ, ມີຜູ້ເຈັບຜູ້ເປັນ, ມີຜູ້ຕາຍຜູ້ຍັງ ສືບທອດກັນມາຮອດຍຸກນີ້. ຕະຫລອດ 40 ກວ່າປີ ປະເທດຊາດມີຄວາມສະຫງົບ, ສັງຄົມນັບມື້ສີວິໄລ ແລະ ພວມພັດທະນາໃຫ້ຈະເລີນກ້າວໜ້າໄປຕິກໆ. ພວກລູກຫລານທີ່ເກີດມາໃນຍຸກນີ້ ເຂົາກໍມີຄວາມສຸກ, ບາງຄົນອາດບໍ່ຮູ້ຮອດສົງຄາມຂ້າຟັນລັນແທງສັງຫານກັນຕາຍ ເພື່ອຄວາມເປັນເອກະລາດ, ອິດສະຫລະພາບ, ຄວາມສົມບູນພູນສຸກນັ້ນຍາກງ່າຍພຽງໃດ. ຂໍຊົມເຊີຍພັກ ແລະ ລັດຖະບານລາວທີ່ນຳເອົາປະເທດຊາດກ້າວສູ່ຍຸກໃໝ່. ການເປັນຂ້າທາດ ແລະ ຫົວເມືອງຂຶ້ນຂອງຕ່າງຊາດນັ້ນມັນເປັນພຽງອະດີດທີ່ບັນທຶກໃນປຶ້ມປະຫວັດສາດຂອງຊາດລາວ ເພື່ອໃຫ້ລູກຫລານຜູ້ເກີດໃໝ່ໃຫຍ່ລຸນໄດ້ສຶກສາຄົ້ນຄວ້າ. ຂໍໃຫ້ປະເທດລາວເປັນໝໍ້ໄຟອາຊຽນ ແລະ ວຽງຈັນກາຍເປັນມະຫານະຄອນທີ່ສວຍງາມຕາມອຸດົມການຂອງປະທານໄກສອນ ພົມວິຫານ ແລະ ຂໍໃຫ້ໄຟຟ້າລາວຈົ່ງເປັນຂຸມຊັບອັນມະຫາສານຂອງຊາດລາວ, ປະຊາຊົນລາວຢ່າງແທ້ຈິງ.
