ສະຫລຸບບັນຫາໜ້າສົນໃຈທົ່ວໂລກ ວັນທີ 28 ກັນຍາ 2020
- ປະທານາທິບໍດີ ໂດນັລ ທຣຳ ໄດ້ສະເໜີຊື່ນາງ Amy Coney Barrett ໃຫ້ເຂົ້າຮັບຕຳແໜ່ງໃນສານດີກາຂອງອາເມລິກາ ຕາມການຄາດຄະເນໄວ້ ເຊິ່ງເປັນຕຳແໜ່ງທີ່ວ່າງຂອງນາງ Ruth Bader Ginsburg ທີ່ເສຍຊີວິດໃນຕົ້ນເດືອນນີ້.
ປັດຈຸບັນນາງ Amy ອາຍຸ 48 ປີ ແລະ ນາງເປັນກຸ່ມອະນຸລັກນິຍົມທີ່ແຂງແກ່ນ ເຊິ່ງຄາດວ່າການເຂົ້າຮັບຕຳແໜ່ງຄັ້ງນີ້ຈະເຮັດໃຫ້ສານມີຄວາມໂອນອ່ຽນໄປທາງນັກການເມືອງຝ່າຍຂວາຫລາຍຂຶ້ນໃນອະນາຄົດ. ຂະນະທີ່ພັກ Democrat ຮຽກຮ້ອງໃຫ້ທ່ານ ທຣຳ ລໍຖ້າຈົນຮອດຫລັງການເລືອກຕັ້ງໃນເດືອນພະຈິກກ່ອນຈະແຕ່ງຕັ້ງຜູ້ພິພາກສາຄົນໃໝ່.
- ຕາມເອກະສານທີ່ສຳນັກຂ່າວ New York Times ໄດ້ຮັບລະບຸວ່າ: ທ່ານ ທຣຳ ຈ່າຍພາສີໃຫ້ລັດຖະບານກາງພຽງ 750 ໂດລາເທົ່ານັ້ນ ໃນປີ 2016-2017 ແລະ ທ່ານຍັງບໍ່ຕ້ອງເສຍພາສີໃດໆໃນໄລຍະ 10 ປີຜ່ານມາ (2000-2015).
ນອກຈາກນີ້ ລາຍງານຍັງລະບຸວ່າ: ທ່ານ ທຣຳ ສູນເສຍເງິນຫລາຍລ້ານໂດລາຈາກສະໜາມກ໊ອບຂອງທ່ານ ແລະ ວົງການທຸລະກິດຂອງທ່ານກໍມີໜີ້ຫລາຍຮ້ອຍລ້ານໂດລາທີ່ຈະຄົບກຳນົດໃນອີກບໍ່ເທົ່າໃດປີຂ້າງໜ້າ.
ຂະນະດຽວກັນ, ທ່ານ ທຣຳ ປະຕິເສດຢ່າງໜັກແໜ້ນທີ່ຈະເປີດເຜີຍການຄືນພາສີ (tax returns) ຂອງທ່ານ ເນື່ອງຈາກຕາມອະນຸສັນຍາ ໄດ້ຮຽກຮ້ອງສິດໃນການເປັນສ່ວນຕົວ ແລະ ແກ່ຜູ້ສະໝັກຊີງຕຳແໜ່ງປະທານາທິບໍດີ (ແລະ ປະທານາທິບໍດີ) ມາດົນແລ້ວ ໂດຍທ່ານເອີ້ນການເປີດເຜີຍຄັ້ງນີ້ວ່າ: “ຂ່າວປອມ (fake news)”.
- TikTok ໄດ້ຮັບການຫລຸດໂທດໃນນາທີສຸດທ້າຍຂອງການຕັດສິນໃຈຂອງສານ ກ່ອນຈະຮອດເສັ້ນຕາຍໃນຄຳສັ່ງຂອງທ່ານ ທຣຳ ທີ່ຈະບັງຄັບໃຫ້ຮ້ານຄ້າແອັບໃນອາເມລິກາລົບ TikTok ອອກຈາກການຂາຍ. ຜູ້ພິພາກສາຂອງລັດຖະບານກາງໄດ້ຕັດສິນວ່າ: ຄຳສັ່ງຫ້າມຂອງທ່ານ ທຣຳ ເປັນການລະເມີດສິດເສລີພາບ ແລະ ຈະຖືກໂຈະໄວ້ຊົ່ວຄາວ.
ຂະນະທີ່ Bytedance ເຈົ້າຂອງ TikTok ກຳລັງໂຕ້ຖຽງຮ່ວມກັບ Oracle ໃນບັນຫາທີ່ວ່າ: ການຖືກິດຈະການຮ່ວມກັນຂອງພວກເຂົາອາດຊ່ວຍຫລຸດຄວາມກົດດັນຕໍ່ຄວາມໝັ້ນຄົງຂອງອາເມລິກາໄດ້.
- Semiconductor Manufacturing International Corporation. (SMIC) ບໍລິສັດຜູ້ຜະລິດຊິບລາຍໃຫຍ່ທີ່ສຸດຂອງຈີນ ອອກມາຢືນຢັນວ່າພວກເຂົາບໍ່ມີການເຊື່ອມໂຍງກັບກອງທັບຂອງຈີນ ຫລັງຈາກຝ່າຍບໍລິຫານຂອງທ່ານ ທຣຳ ກຳນົດມາດຕະການຂວ້ຳບາດໃໝ່ຕໍ່ບໍລິສັດ.
ຝ່າຍການຄ້າຂອງອາເມລິກາ ໄດ້ສົ່ງຈົດໝາຍໄປຫາບໍລິສັດຕ່າງໆ ໃນວັນທີ 25 ກັນຍາຜ່ານມາ ເຊິ່ງມີການເຕືອນວ່າ ການສົ່ງອອກອຸປະກອນໄປໃຫ້ SMIC ອາດຖືກບິດເບືອນເພື່ອໄປໃຊ້ໃນການທະຫານ ແລະ ຫລັງຈາກນີ້ ບໍລິສັດສັນຊາດອາເມລິກາຕ້ອງການຂາຍໃຫ້ SMIC ຈະຕ້ອງໄດ້ຮັບໃບອະນຸຍາດຈາກລັດຖະບານອາເມລິກາກ່ອນ.
- ປະເທດ Armenia ແລະ Azerbaija ໄດ້ເກີດການປະທະກັນໃນພື້ນທີ່ຂັດແຍ່ງຊື່ວ່າ Nagorno-Karabakh ໂດຍ Armenia ກ່າວຫາວ່າ Azerbaija ຍິງປືນໃຫຍ່ທາງອາກາດ ແລະ ໂຈມຕີພື້ນທີ່ພົນລະເຮືອນພາຍໃຕ້ການຄວບຄຸມຂອງ Armenia. ຂະນະທີ່ Azerbaija ກ່າວວ່າພວກເຂົາກຳລັງຕອບສະໜອງຕໍ່ການຍິງລູກປືນຈາກ Armenia.
ປັດຈຸບັນ ມີລາຍງານຜູ້ເສຍຊີວິດຫລາຍກວ່າ 20 ຄົນ ເຊິ່ງທັງ 2 ປະເທດໄດ້ປະກາດກົດໄອຍະການເສິກ ແລະ ລະດົມພົນລະເມືອງຂອງຕົນອອກຈາກພື້ນທີ່ໃກ້ຄຽງ. ຂະນະທີ່ຣັດເຊຍໄດ້ອອກມາຮຽກຮ້ອງໃຫ້ພວກເຂົາຢຸດການຍິງໂດຍທັນທີ.
- ລັດຖະບານເຢເມນ ເຊິ່ງໄດ້ຮັບການສະໜັບສະໜູນຈາກຊາອຸດິອາຣະເບຍ ແລະ ກຸ່ມກະບົດ Houthi ໄດ້ບັນລຸຂໍ້ຕົກລົງຈະແລກປ່ຽນນັກໂທດຫລາຍກວ່າ 1.000 ຄົນຂອງພວກເຂົາທັງ 2 ຝ່າຍ ທ່າມກາງຄວາມຂັດແຍ່ງຕະຫລອດ 5 ປີ ເຊິ່ງມີຜູ້ເສຍຊີວິດໄປຫລາຍໝື່ນຄົນ ແລະ ປັດຈຸບັນ ໄດ້ມາເຖິງທາງຕັນ. ຂະນະທີ່ ສະຫະປະຊາຊາດຫວັງວ່າການແລກປ່ຽນນັກໂທດຈະເປັນການເລີ່ມຕົ້ນເສັ້ນທາງຂອງການເຈລະຈາຫລາຍຂຶ້ນ ເພື່ອໃຫ້ສົງຄາມຢຸດຕິລົງ.
- ຜູ້ມີສິດເລືອກຕັ້ງຢູ່ສະວິດເຊີແລນ ໄດ້ປະຕິເສດແຜນການຈະຢຸດການເດີນທາງຢ່າງເສລີກັບສະຫະພາບເອີຣົບ ຂໍ້ສະເໜີດັ່ງກ່າວໄດ້ຮັບການສະໜັບສະໜູນຈາກພັກປະຊານິຍົມຝ່າຍຂວາ ຊື່ວ່າ Swiss People’s Party ເຊິ່ງຕ້ອງການການຄວບຄຸມການອົບພະຍົບທີ່ເຂັ້ມງວດຂຶ້ນ.
ນອກຈາກນີ້ ຊາວສະວິດຍັງໄດ້ອະນຸມັດແຜນການຊື້ເຮືອບິນຮົບລຸ້ນໃໝ່ຢ່າງຈຳກັດ ແລະ ປະຕິເສດກົດໝາຍຈະຊ່ວຍໃຫ້ນາຍພານໃນປະເທດສາມາດລ່າໝາປ່າໄດ້ງ່າຍຂຶ້ນ.
