ຜູ້ສົ່ງອອກກາເຟປະສົບບັນຫາຍ້ອນໂຄວິດ-19 ແລະ ລາຄາຕົກຕໍ່າ
ປັດຈຸບັນບັນດາຜູ້ປະກອບການທຸລະກິດກາເຟຫລາຍບໍລິສັດກຳລັງປະສົບບັນຫາການສົ່ງອອກຜະລິດຕະພັນກາເຟ ເນື່ອງຈາກການແຜ່ລະບາດຂອງພະຍາດໂຄວິດ-19 ແລະ ເຮັດໃຫ້ລາຄາກາເຟຕົກຕໍ່າຄື: ບໍລິສັດເພັດສະຫວ່າງ ຮ່ວມພັດທະນາກາເຟຈຳກັດ ກໍເປັນໜຶ່ງໃນບໍລິສັດທີ່ໄດ້ຮັບຜົນກະທົບຈາກທີ່ເຄີຍສົ່ງອອກໝາກກາເຟແຫ້ງປີໜຶ່ງປະມານ 7.000-8.000 ໂຕນ, ແຕ່ປີນີ້ສົ່ງອອກໄດ້ປະມານ 2.000-3.000 ໂຕນເທົ່ານັ້ນ, ສ່ວນໃຫຍ່ມີແຕ່ຈຳໜ່າຍຢູ່ພາຍໃນປະເທດ, ແຕ່ກໍບໍ່ໄດ້ພໍເທົ່າໃດ.
ທ່ານ ນາງ ລັດສະໜີ ວົງພັກດີ ປະທານບໍລິສັດດັ່ງກ່າວ ໃຫ້ຮູ້ວ່າ: ນັບແຕ່ມີການແຜ່ລະບາດຂອງພະຍາດໂຄວິດ-19 ນີ້, ທາງບໍລິສັດແມ່ນໄດ້ຮັບຜົນກະທົບຢ່າງໜັກໜ່ວງ ບໍ່ສາມາດສົ່ງອອກກາເຟໄດ້ ມີແຕ່ຈຳໜ່າຍຢູ່ພາຍໃນປະເທດ ປະມານ 500 ກິໂລ ຫາ 1 ໂຕນເທົ່ານັ້ນ, ບວກກັບລາຄາກາເຟໃນຕະຫລາດໂລກກໍຕົກຕໍ່າຫລາຍ ເຮັດໃຫ້ການສົ່ງອອກຍິ່ງພົບຄວາມຫຍຸ້ງຍາກ ແລະ ເຮັດໃຫ້ຊາວສວນກາເຟພົບຄວາມເດືອດຮ້ອນ, ລາຍຮັບບໍ່ກຸ້ມກິນ, ໄດ້ເຮັດໃຫ້ປະຊາຊົນຈຳນວນໜຶ່ງຖາງສວນກາເຟຫັນໄປປູກມັນຕົ້ນແທນ.
ຕໍ່ສະພາບດັ່ງກ່າວ, ທ່ານ ນາງ ລັດສະໜີ ໄດ້ຮຽກຮ້ອງມາຍັງພາກລັດໃຫ້ເຂົ້າມາຊ່ວຍເຫລືອປະຊາຊົນ ຖ້າເປັນໄປໄດ້ເມື່ອລາຄາກາເຟຕົກຕໍ່າ ແມ່ນຢາກໃຫ້ມີເງິນກ້ອນໃດກ້ອນໜຶ່ງມາຊື້ກາເຟໄວ້ ຫລື ຊື້ເຄື່ອງຈັກຂະໜາດນ້ອຍມາຊ່ວຍປະຊາຊົນແປຮູບກາເຟ ເພື່ອສ້າງມູນຄ່າເພີ່ມ.
ໂອກາດດຽວກັນ, ທ່ານ ສີສຸກ ວົງພັກດີ ຜູ້ອຳນວຍການບໍລິສັດເພັດສະຫວ່າງ ຮ່ວມພັດທະນາກາເຟຈຳກັດ ກໍໄດ້ໃຫ້ຮູ້ວ່າ: ໄລຍະການລະບາດຂອງພະຍາດໂຄວິດ-19 ນີ້, ບໍລິສັດ ແລະ ຊາວສວນກາເຟແມ່ນປະສົບບັນຫາຫລາຍ, ລາຄາກາເຟປັດຈຸບັນກໍບໍ່ແນ່ນອນຂຶ້ນໆລົງໆ ເຊິ່ງປັດຈຸບັນບໍລິສັດພວກເຮົາແມ່ນສົ່ງອອກຕະຫລາດຂົງເຂດອາຊຽນຄື: ກຳປູເຈຍ, ຫວຽດນາມ ແລະ ໄທ ເຊິ່ງເປັນການແກ້ໄຂບັນຫາສະເພາະໜ້າໃນໄລຍະທີ່ມີການລະບາດຂອງພະຍາດໂຄວິດ-19 ແລະ ລາຄາກາເຟຕະຫລາດໂລກກໍປັ່ນປ່ວນ.
