ເກີດການລະບາດຂອງພະຍາດອະຫິວາໝູອາຟຣິກາຢູ່ເມືອງຊຽງຮ່ອນ
ໃນວັນທີ 21-23 ກັນຍານີ້, ພະແນກກະສິກໍາ ແລະ ປ່າໄມ້ ແຂວງໄຊຍະບູລີ ໄດ້ສົມທົບກັບເມືອງຊຽງຮ່ອນ ລົງເກັບກຳສະພາບການລະບາດພະຍາດອະຫິວາໝູອາຟຣິກາຢູ່ 2 ບ້ານຄື: ບ້ານແກ່ນ ແລະ ບ້ານສາມັກຄີໄຊ ເມືອງຊຽງຮ່ອນ ເຊິ່ງພົບເຫັນການລະບາດຂອງພະຍາດດັ່ງກ່າວຄັ້ງວັນທີ 16 ກັນຍາຜ່ານມາ ແລະ ໄດ້ແຜ່ລາມອອກສູ່ 13 ບ້ານຄື: ບ້ານແກ່ນ, ບ້ານສາມັກຄີໄຊ, ບ້ານດອນເຟືອງ, ບ້ານຂິ່ງ, ບ້ານລາວສະໂນ, ບ້ານນໍ້າກອກ, ບ້ານນາອອນ, ບ້ານຫົວນາ, ບ້ານດົງ, ບ້ານຫ້ວຍຮາກ, ບ້ານຊ້າງ, ບ້ານຄໍ້າ ແລະ ບ້ານນ້ຳຄ່ອມ ມີໝູຕາຍທັງໝົດ 195 ໂຕ, ປັດຈຸບັນທາງວິຊາການສັດຕະແພດ ແລະ ການນຳເມືອງ ໄດ້ລົງລະດົມແນວຄິດຜູ້ລ້ຽງໝູໃຫ້ການຮ່ວມມືກັບວິຊາການ ເພື່ອສະກັດກັ້ນການແຜ່ລາມອອກເປັນວົງກວ້າງ ພ້ອມທັງທຳລາຍໝູທີ່ຕິດເຊື້ອຢູ່ບ້ານແກ່ນ ຈຳນວນ 216 ໂຕ ແລະ ບ້ານສາມັກຄີໄຊ 31 ໂຕ ລວມມູນຄ່າໝູເສຍຫາຍທັງໝົດ 200 ລ້ານກວ່າກີບ.
ຫ້ອງການກະສິກຳ ແລະ ປ່າໄມ້ເມືອງ ໃຫ້ຮູ້ວ່າ: ການລະບາດຂອງພະຍາດອະຫິວາໝູຄັ້ງນີ້ອາດຍ້ອນສະພາບດິນຟ້າອາກາດມີການປ່ຽນແປງກະທັນຫັນ, ເຈົ້າຂອງສັດຈຳນວນໜຶ່ງຍັງຖືເບົາຕໍ່ການຮັກສາສຸຂະພາບສັດຂອງຕົນເອງ, ຜູ້ປະກອບການບາງພາກສ່ວນບໍ່ໄດ້ເອົາໃຈໃສ່ປະຕິບັດຕາມການຄຸ້ມຄອງການເຄື່ອນຍ້າຍສັດ ແລະ ຜະລິດຕະພັນສັດທີ່ວາງອອກ, ຍັງມີການຊື້ສັດມາຈາກບ່ອນທີ່ມີການລະບາດຂອງພະຍາດ ຈຶ່ງເປັນສາເຫດໃຫ້ມີການລະບາດຂອງພະຍາດອະຫິວາໝູຄັ້ງນີ້.
