ນິວຊີແລນກຽມຫລຸດລະດັບການເຕືອນໄພໂຄວິດ-19 ທົ່ວປະເທດ ຫລັງພົບສັນຍານບວກ ບໍ່ພົບຜູ້ຕິດເຊື້ອເພີ່ມ
ວັນທີ 21 ກັນຍາ, ນາຍົກລັດຖະມົນຕີ ຈາຊິນດາ ອາເດິນ ຂອງນິວຊີແລນ ກ່າວວ່າ: ທາງການກຽມປະກາດຫລຸດລະດັບການເຕືອນໄພສະຖານະການໂຄວິດ-19 ຢູ່ໂອ໊ກແລນທີ່ກັບມາລະບາດຮອບໃໝ່ໃນເດືອນສິງຫາຜ່ານມາ ຈາກລະດັບ 2,5 ມາເປັນລະດັບ 2 ຫລັງສະຖານະການໂດຍລວມເລີ່ມມີສັນຍານທີ່ດີ. ຂະນະທີ່ພື້ນທີ່ອື່ນໆຂອງນິວຊີແລນຫລຸດເຫລືອພຽງລະດັບ 1 ເທົ່ານັ້ນ ໂດຍຈະເລີ່ມຕົ້ນແຕ່ທ່ຽງຄືນວັນທີ 21 ກັນຍານີ້ເປັນຕົ້ນໄປ.
ການປະກາດຫລຸດລະດັບຢູ່ໂອ໊ກແລນຈະເລີ່ມແຕ່ທ່ຽງຄືນຂອງວັນທີ 23 ກັນຍາເປັນຕົ້ນໄປ ໂດຍຊາວເມືອງໂອ໊ກແລນຈະມາສາມາດລວມຕົວກັນໃນພື້ນທີ່ສາທາລະນະ, ຮ່ວມພິທີສົບໄດ້ຈາກ 10 ຄົນເປັນ 100 ຄົນ, ພ້ອມທັງເນັ້ນວ່າ: ໂອ໊ກແລນຍັງຈຳເປັນຈະຕ້ອງໃຊ້ເວລາເພື່ອຢຸດການແຜ່ລະບາດຂອງໂຄວິດ-19 ໃນພື້ນທີ່.
ທັງນີ້ ທາງການໄດ້ປະກາດເຕືອນເຖິງຄວາມເປັນໄປໄດ້ທີ່ອາດຈະກວດພົບຜູ້ຕິດເຊື້ອເພີ່ມຂຶ້ນອີກ ຫລັງຈາກທີ່ມີການຜ່ອນຄາຍມາດຕະການຮັບມືໂຄວິດ-19 ໂດຍເບື້ອງຕົ້ນການປະກາດລະດັບການເຕືອນໄພໃໝ່ນີ້ຈະມີໄລຍະເວລາປະມານ 2 ອາທິດ ກ່ອນລັດຖະບານຈະປະເມີນສະຖານະການລວມໃໝ່ອີກໃນຕົ້ນເດືອນຕຸລານີ້. ທັງເນັ້ນໃຫ້ພົນລະເມືອງເວັ້ນໄລຍະຫ່າງທາງສັງຄົມ ແລະ ໃສ່ຜ້າປິດປາກ-ດັງໃນເວລາເດີນທາງ.
ຫລ້າສຸດ ນິວຊີແລນບໍ່ພົບຜູ້ຕິດເຊື້ອ ແລະ ຜູ້ເສຍຊີວິດໃໝ່ເພີ່ມໃນວັນທີ 21 ກັນຍານີ້ ສົ່ງຜົນໃຫ້ຈຳນວນຜູ້ຕິດເຊື້ອສະສົມມີ 1.815 ຄົນ, ເສຍຊີວິດ 25 ຄົນ, ອັດຕາການປິ່ນປົວຫາຍດີ 95,2% ຖືເປັນອີກໜຶ່ງປະເທດທີ່ຮັກສາມາດຕະຖານການຮັບມືໂຄວິດ-19 ໄດ້ເປັນຢ່າງດີ ຫລັງການແຜ່ລະບາດຜ່ານມາເກືອບຈະ 9 ເດືອນແລ້ວ.
