5 ພຶດຕິກຳນີ້ເຮັດໃຫ້ມີພຸງ ຫລຸດເທົ່າໃດກໍບໍ່ລົງ

ເຊື່ອວ່າຫລາຍໆຄົນຍ່ອມຕ້ອງເຄີຍພົບບົນຫາພະຍາຍາມຫລຸດນຳ້ໜັກ ຫລື ອອກກຳລັງກາຍຫລຸດນຳ້ໜັກຫລາຍປານໃດ, ແຕ່ພຸງກໍບໍ່ຍອມຫລຸດ ຫລື ຍຸບລົງຈັກເທື່ອ ຫາກເປັນແບບນີ້ຕະຫລອດ ມາເບິ່ງພຶດຕິກຳຂອງຕົນເອງກັນກ່ອນດີກ່ວາວ່າກຳລັງເຮັດແບບນີ້ຢູ່ຫລືບໍ່ ? ຫາກແມ່ນ ກໍຮັບຮອງໄດ້ເລີຍວ່າ ບໍ່ມີທາງແນ່ນອນທີ່ພຸງຈະຍຸບລົງ ເຜີໆນຳ້ໜັກອາດຈະກັບມາສູງຂຶ້ນກ່ວາເກົ່າກໍມີ.

1. ກິນໂຊດຽມຫລາຍເກີນໄປ : ສາວໆສ່ວນຫລາຍມັກຈະມີພຶດຕິກຳທີ່ເຜີກິນໂຊດຽມແບບບໍ່ຮູ້ໂຕ ຈຶ່ງເຮັດໃຫ້ຮ່າງກາຍກັກນຳ້ໄວ້ ແລະ ຈະໄປຈັບຢູ່ອ້ອມຮອບແອວ, ແຂນຂາ ເຊິ່ງເຮັດໃຫ້ບໍລິເວນດັ່ງກ່າວເບິ່ງແລ້ວບວມ ຫລື ໃຫຍ່ຂຶ້ນ. ທາງທີ່ດີຄວນກິນໂຊດຽມໃນແຕ່ລະມື້ບໍ່ໃຫ້ເກີນ 2.500 ກຣາມ ເພື່ອທີ່ຮ່າງກາຍຈະໄດ້ບໍ່ເກີດອາການບວມນຳ້ນັ້ນເອງ.
2. ຕິດນຳ້ອັດລົມ : ເຖິງວ່ານຳ້ອັດລົມຈະເປັນເຄື່ອງດື່ມທີ່ດື່ມແລ້ວໃຫ້ຄວາມສົດຊື່ນຫລັງຈາກທີ່ເຮົາອິດເມື່ອຍມາ, ແຕ່ຮູ້ຫລືບໍ່ວ່າການດື່ມນຳ້ອັດລົມນັ້ນອາດຈະສົ່ງຜົນໃຫ້ເຮົາມີພຸງ ຫລື ຮອບແອວເພີ່ມຂຶ້ນໄດ້ ເພາະໃນນຳ້ອັດລົມມີປະລິມານຄາບໍເນດທີ່ຈະເຮັດໃຫ້ສາວໆເກີດອາການຍື່ງທ້ອງ ແລະ ບວມນຳ້. ທາງທີ່ດີຄວນຫັນມາດື່ມນຳ້ບໍລິສຸດ ຫລື ນຳ້ໝາກໄມ້ແທນຈະດີກ່ວາ.
3. ອອກກຳລັງກາຍ, ແຕ່ລືມບໍລິຫານໜ້າທ້ອງ : ສຳລັບສາວໆບາງຄົນທີ່ມັກອອກກຳລັງກາຍ ບາງຄົນຄົງຈະຖືເບົາທີ່ຈະບໍລິຫານໜ້າທ້ອງໄປພ້ອມໆກັນນ ຈຶ່ງສົ່ງຜົນໃຫ້ເມື່ອອອກກຳລັງກາຍແລ້ວ ພຸງກໍຍັງສວດຢູ່. ທາງທີ່ດີນອກຈາກອອກກຳລັງກາຍແບບຄາດີໂອໄປແລ້ວ ກໍຄວນບໍດີ້ເຫວດ ຫລື ອອກກຳລັງກາຍສະເພາະພາກສ່ວນ ໂດຍເນັ້ນໜ້າທ້ອງເປັນຫລັກຕາມຫລັງທຸກເທື່ອກໍຖືວ່າດີກ່ວາຫລາຍ.
4. ເຄັ່ງຄຽດເປັນປະຈຳ : ບໍ່ໜ້າເຊື່ອກໍຕ້ອງເຊື່ອວ່າຄວາມເຄັ່ງຄຽດກໍມີສ່ວນເຮັດໃຫ້ການຫລຸດນຳ້ໜັກພັງໄດ້ຢ່າງຮາບຄາບ ເພາະເມື່ອໃດທີ່ເຮົາເຄັ່ງຄຽດຈະເຮັດໃຫ້ຮ່າງກາຍຜະລິດສານຄໍຕິໂຊນຂຶ້ນມາ ເຊິ່ງສານຊະນິດນີ້ຈະມີຜົນກະຕຸ້ນໃຫ້ເຮົາຢາກກິນອາຫານກາລໍຣີຫລາຍ ໂດຍສະເພາະອາຫານຫວານໆ ເພື່ອຫລຸດຄວາມເຄັ່ງຄຽດ ຕະຫລອດຈົນອາຫານຈືນມັນໆ ແນ່ນອນວ່າຫລາຍເທື່ອທີ່ເຮົາເຄັ່ງຄຽດ ກໍມັກຈະຈັບຂອງຫວານໆມາກິນຢູ່ສະເໝີ. ດັ່ງນັ້ນ, ພະຍາຍາມປ່ອຍວາງ ຫາກິດຈະກຳເຮັດໃຫ້ຜ່ອນຄາຍ, ບໍ່ເຄັ່ງຄຽດຈະດີກ່ວາ ເມື່ອອາລົມດີ ຈິດໃຈແຈ່ມໃສ ສະພາບອາລົມປົກກະຕິ ອາການຫິວຈຸກຈິກ ຫລື ຫິວໂຫຍກໍຈະບໍ່ມາຢາມທ່ານຢ່າງແນ່ນອນ.
5. ປ່ອຍໃຫ້ເກີດບັນຫາການຂັບຖ່າຍຍາກ : ອີກໜຶ່ງສາເຫດທີ່ເຮັດໃຫ້ສາວໆຫລຸດລົງບໍ່ເຄີຍສຳເລັດກໍຄື ການປ່ອຍໃຫ້ຕົນເອງເກີດອາການຖ່າຍຍາກເປັນປະຈຳນັ້ນເອງ. ດັ່ງນັ້ນ, ຕ້ອງຫັນມາກິນໄຟເບີໃຫ້ຫລາຍພຽງພໍ, ດື່ມນຳ້ຫລາຍໆ ແລະ ໝັ່ນຂັບຖ່າຍເປັນເວລາທຸກມື້ ເພື່ອຊ່ວຍແກ້ອາການຖ່າຍຍາກບໍ່ໃຫ້ມາກວນໃຈທ່ານໄດ້ອີກ.

ທີ່ກ່າວມານັ້ນແມ່ນ 5 ພຶດຕິກຳທີ່ເຮັດໃຫ້ການຫລຸດນຳ້ໜັກບໍ່ເປັນຜົນສຳເລັດ ທັງຍັງເຮັດໃຫ້ສາວໆຍັງຄົງມີພຸງສວດໆໄວ້ກວນໃຈນຳອີກ ໃຜທີ່ຢາກຈະມີໜ້າທ້ອງແປໆ ໝົດບັນຫາພຸງສວດໆ ຈາກນີ້ກໍຕ້ອງຫລີກເວັ້ນພຶດຕິກຳເຫລົ່ານີ້ກັນໂດຍໄວ ແລ້ວຫັນມາອອກກຳລັງກາຍ, ກິນອາຫານທີ່ມີປະໂຫຍດ ໂດຍສະເພາະຜັກ – ໝາກໄມ້, ຫລີກເວັ້ນອາຫານທີ່ສ່ຽງເຮັດໃຫ້ຕຸ້ຍທຸກປະເພດ ພຽງເທົ່ານີ້ການຫລຸດພຸງເພື່ອຮູບຮ່າງທີ່ງາມສົມສ່ວນກໍບໍ່ແມ່ນເລື່ອງເຮັດຍາກອີກຕໍ່ໄປ.