ສູນເລືອດແຫ່ງຊາດຈັດກິດຈະກຳບໍລິຈາກເລືອດ
ໃນວັນທີ 18 ກັນຍານີ້, ສູນເລືອດແຫ່ງຊາດ ຮ່ວມກັບ ອົງການກາແດງລາວ, ບໍລິສັດເບຍລາວ ຈຳກັດ ໄດ້ຈັດກິດຈະກໍາບໍລິຈາກເລືອດຊ່ວຍເຫລືອສັງຄົມແບບເປີດກວ້າງຂຶ້ນ ທີ່ນະຄອນຫລວງວຽງຈັນ ໂດຍໄດ້ຮັບຄວາມສົນໃຈຈາກນັກຮຽນຊັ້ນມັດທະຍົມ ແລະ ສັງຄົມເປັນຈຳນວນຫລາຍ ຄາດວ່າຈະໄດ້ຮັບເລືອດຢ່າງໜ້ອຍ 500 ຖົງ.
ທ່ານ ຈັນທະລາ ສຸກສາຄອນ ຫົວໜ້າສູນເລືອດແຫ່ງຊາດ ກ່າວວ່າ: ປັດຈຸບັນຄວາມຕ້ອງການເລືອດນັບມື້ເພີ່ມຂຶ້ນ ຄືສະເພາະນະຄອນຫລວງວຽງຈັນມີໜຶ່ງມີຄວາມຕ້ອງການເລືອດບໍ່ຕໍ່າກວ່າ 150 ຖົງແຕ່ການຕອບສະໜອງເລືອດຍັງບໍ່ຫລາຍເທົ່າຄວນ ຄືໃນໄລຍະ 8 ເດືອນຜ່ານມານີ້ ທົ່ວປະເທດສາມາດຮັບບໍລິຈາກເລືອດໄດ້ພຽງ 37.000 ກວ່າຖົງ ໄດ້ພຽງ 61,24% ຂອງແຜນການປີເທົ່ານັ້ນ. ທັງນີ້ ກໍຍ້ອນຜົນກະທົບຈາກການແຜ່ລະບາດຂອງພະຍາດໂຄວິດ-19 ແລະ ການລະບາດຂອງພະຍາດໄຂ້ຍຸງລາຍ ເຮັດໃຫ້ບໍ່ສາມາດປຸກລະດົມ ແລະ ຮັບບໍລິຈາກເລືອດໄດ້ຕາມແຜນທີ່ວາງໄວ. ແຕ່ແນວໃດກໍຕາມ ສູນເລືອດແຫ່ງຊາດຈະສືບຕໍ່ຮ່ວມກັບຫລາຍພາກສ່ວນຈັດກິດຈະກຳບໍລິຈາກເລືອດໃນຂອບເຂດທົ່ວປະເທດ ເພື່ອບຸກບືນໃຫ້ບັນລຸຕາມແຜນທີ່ວາງໄວ້ໃຫ້ໄດ້ເລືອດ 60.700 ຖົງໃນປີ 2020 ນີ້.
ໃນໂອກາດນີ້, ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ໄດ້ມີຄຳເຫັນຝາກເຖິງຜູ້ທີ່ມີເງື່ອນໄຂນັບແຕ່ອາຍຸ 17 ປີຂຶ້ນໄປ, ນໍ້າໜັກ 45 ກິໂລຂຶ້ນໄປ ແລະ ມີສຸຂະພາບແຂງແຮງ ຈົ່ງປະກອບສ່ວນບໍລິຈາກເລືອດຊ່ວຍເຫລືອສັງຄົມ ກໍຄືຊີວິດຂອງຜູ້ຕ້ອງການເລືອດທີ່ຍັງລໍຖ້າຢູ່.
