ພາຍຸໂນອຶນຖະຫລົ່ມພາກກາງຂອງຫວຽດນາມ ມີຜູ້ເສຍຊີວິດແລ້ວ 1 ຄົນ
ພາຍຸໝູນເຂດຮ້ອນໂນອຶນເຄື່ອນທີ່ພັດຜ່ານພາກກາງຂອງຫວຽດນາມ ເຖິງວ່າຄວາມໄວລົມຫລຸດລົງເມື່ອເຂົ້າສູ່ແຜ່ນດິນ ແຕ່ຍັງສົ່ງຜົນໃຫ້ເກີດຝົນຕົກໜັກ ແລະ ມີຜູ້ເສຍຊີວິດຢ່າງໜ້ອຍ 1 ຄົນ.
ກົມອຸຕຸນິຍົມວິທະຍາແຫ່ງຊາດຂອງຫວຽດນາມ ລາຍງານວ່າ: ພາຍຸໝູນເຂດຮ້ອນໂນອຶນ ຫລື ພາຍຸໝາຍເລກ 5 ຕາມການນັບຂອງຊາວຫວຽດນາມ ຂຶ້ນຝັ່ງຢູ່ເມືອງດານັງ ເຊິ່ງເປັນເມືອງແຄມຝັ່ງທາງຕອນກາງຂອງປະເທດ ໃນຕອນສວຍຂອງວັນທີ 18 ກັນຍານີ້ ຕາມເວລາທ້ອງຖິ່ນ ຫລັງຈາກນັ້ນເຄື່ອນທີ່ໄປແຂວງເທື່ອທຽນເຫວ້ຢູ່ທາງເໜືອ ແລ້ວມຸ້ງໜ້າຕໍ່ມາລາວ.
ເບື້ອງຕົ້ນມີລາຍງານຜູ້ເສຍຊີວິດຢ່າງໜ້ອຍ 1 ຄົນ ແລະ ໄດ້ຮັບບາດເຈັບຢ່າງໜ້ອຍ 1 ຄົນ. ນອກຈາກນີ້ ມີລາຍງານເຮືອນໄດ້ຮັບຄວາມເສຍຫາຍຈາກກະແສລົມແຮງ ແລະ ຝົນຕົກລົງມາຢ່າງໜັກ.
ເຖິງຢ່າງໃດກໍຕາມ, ພາຍຸອ່ອນກຳລັງລົງເມື່ອເຄື່ອນທີ່ເຂົ້າສູ່ແຜ່ນດິນ ໂດຍກົມອຸຕຸນິຍົມວິທະຍາແຫ່ງຊາດຂອງຫວຽດນາມຫລຸດລະດັບຄວາມຮຸນແຮງຂອງພາຍຸໂນອຶນເຫລືອພຽງຄວາມກົດດັນອາກາດຕໍ່າ ດ້ວຍຄວາມໄວລົມສູງສຸດໃກ້ສູນກາງລະຫວ່າງ 40 ເຖິງ 60 ກິໂລແມັດຕໍ່ຊົ່ວໂມງ.
ທາງການຍັງຄົງລະດັບຄວາມເຂັ້ມງວດຂອງຄຳເຕືອນ ໃຫ້ປະຊາຊົນໃນພາກກາງກຽມຮັບມືກັບນ້ຳຖ້ວມກະທັນຫັນທີ່ອາດເກີດຂຶ້ນໃນບາງພື້ນທີ່ ເພາະອິດທິພົນຂອງພາຍຸຍັງມີຢູ່ ອາດມີປະລິມານຝົນຕົກສະສົມສູງເຖິງ 250 ມິນລີແມັດໃນຫລາຍພື້ນທີ່ ໂດຍສະເພາະເຂດພາກກາງອາດຜະເຊີນຝົນຕົກໜັກ ແລະ ມີປະລິມານນ້ຳຝົນສະສົມ 100 ມິນລີແມັດ.
