ຣັດເຊຍ ປະກາດສົ່ງວັກຊີນໂຄວິດຊ່ວຍ ອິນເດຍ
ຣັດເຊຍ ກຽມສົ່ງວັກຊີນຕ້ານໂຄວິດ-19 ຊ່ວຍ ອິນເດຍ ມີຜູ້ຕິດເຊື້ອໄວຣັສເຖິງ 5 ລ້ານຄົນ ແລະ ເສຍຊີວິດເພີ່ມເກືອບ 8,5 ໝື່ນຄົນ.
ກອງທຶນຄວາມໝັ້ນຄົງແຫ່ງຊາດຂອງຣັດເຊຍ (RDIF) ເປີດເຜີຍຂໍ້ຕົກລົງທີ່ເຮັດຮ່ວມກັບບໍລິສັດ ດ໊ອກເຕີ ເຣດດີ ແລບບໍຣາທໍຣີ ຈຳກັດ ເພື່ອສົ່ງມອບ Sputnik V ວັກຊີນປ້ອງກັນໂຄວິດ-19 ຝີມືຣັດເຊຍໃຫ້ບໍລິສັດຢາຂອງອິນເດຍຈຳນວນ 100 ລ້ານໂດສ.
ຖະແຫລງການຂອງ RDIF ລະບຸວ່າ: ການສົ່ງມອບວັກຊີນອາດເລີ່ມຂຶ້ນທ້າຍປີນີ້ ຂຶ້ນກັບຄວາມສົມບູນ ແລະ ຜົນສຳເລັດຂອງການທົດລອງ ແລະ ການຂຶ້ນທະບຽນວັກຊີນໂດຍໜ່ວຍງານເບິ່ງແຍງຢູ່ອິນເດຍ.
ມີລາຍງານຈາກກະຊວງສາທາລະນະສຸກອິນເດຍເປີດເຜີຍວ່າ: ໃນຮອບ 24 ຊົ່ວໂມງຜ່ານມາ ອິນເດຍພົບຜູ້ຕິດເຊື້ອໂຄວິດ-19 ເພີ່ມອີກ 96.424 ຄົນ ເຮັດໃຫ້ຈຳນວນລວມຜູ້ຕິດເຊື້ອສະສົມໃນປະເທດເພີ່ມຂຶ້ນຢູ່ລະດັບ 5.214.677 ຄົນ. ຂະນະດຽວກັນ ພົບຜູ້ເສຍຊີວິດເພີ່ມອີກ 1.174 ຄົນ ສົ່ງຜົນໃຫ້ຈຳນວນລວມຜູ້ເສຍຊີວິດເພີ່ມຂຶ້ນເປັນ 84.372 ຄົນ.
ສຳລັບຜູ້ທີ່ໄດ້ຮັບອະນຸຍາດໃຫ້ອອກໂຮງໝໍຫລັງໄດ້ຮັບການປິ່ນປົວຫາຍດີແລ້ວມີ 4.112.551 ຄົນ, ສ່ວນຜູ້ທີ່ຍັງປິ່ນປົວຢູ່ໂຮງໝໍມີ 1.017.754 ຄົນ.
ສຳນັກຂ່າວຊິນຮົວລາຍງານວ່າ: ຂໍ້ມູນຈາກສະພາວິໄຈທາງການແພດແຫ່ງອິນເດຍ (ICMR) ລະບຸວ່າ: ຮອດວັນທີ 17 ກັນຍາ ອິນເດຍໄດ້ກວດຫາເຊື້ອໂຄວິດ-19 ໃຫ້ປະຊາຊົນທົ່ວປະເທດແລ້ວ 61.572.343 ຄົນ ແລະ ສະເພາະວັນທີ 17 ກັນຍາ ພຽງມື້ດຽວ ມີຜູ້ເຂົ້າຮັບການກວດຫາເຊື້ອສູງເຖິງ 1.006.615 ຄົນ. ເຖິງຢ່າງໃດກໍຕາມ, ອິນເດຍເປັນປະເທດທີ່ມີຈຳນວນຜູ້ຕິດເຊື້ອໂຄວິດ-19 ຫລາຍເປັນອັນດັບ 2 ຂອງໂລກຮອງຈາກອາເມລິກາ.
