ວັງວຽງອອກແຈ້ງການໃຫ້ຮື້ຖອນສິ່ງກໍ່ສ້າງທີ່ກວມ ພື້ນທີ່ສາທາລະນະ ແລະ ຢຸດປ່ອຍນ້ຳເປື້ອນລົງນໍ້າຊອງ
September 17, 2020 - 5:19 PM
ໃນວັນທີ 17 ກັນຍານີ້, ຄະນະສະເພາະກິດແກ້ໄຂປາກົດການຫຍໍ້ທໍ້ ເມືອງວັງວຽງ ແຂວງວຽງຈັນ ໄດ້ອອກໜັງສືແຈ້ງການ ສະບັບເລກທີ 050/ຈມ.ວວ ເຖິງຜູ້ປະກອບການທຸລະກິດ, ພໍ່ຄ້າຊາວຂາຍທົ່ວເມືອງວັງວຽງໃຫ້ຄວາມຮ່ວມມືໃນການແກ້ໄຂປາກົດການຫຍໍ້ທໍ້ຕ່າງໆພາຍໃນເມືອງຂອງຕົນ ໂດຍມີເນື້ອໃນລະອຽດວ່າ:
- ໃຫ້ປະຊາຊົນ, ຜູ້ປະກອບການທຸລະກິດ ພໍ່ຄ້າຊາວຂາຍໃນເຂດເທດສະບານ ກໍຄືທົ່ວເມືອງອໍານວຍຄວາມສະດວກ ແລະ ໃຫ້ຄວາມຮ່ວມມືໃນການລົງເຮັດວຽກຂອງຄະນະສະເພາະກິດແກ້ໄຂສິ່ງກີດຂວາງຕາມເຂດສະຫງວນທາງຍ່າງ ແລະ ທ້ອງຖະໜົນຕ່າງໆ.
- ໃຫ້ຕື່ນຕົວ ແລະ ເປັນເຈົ້າການໃນການກວດກາເບິ່ງສິ່ງປຸກສ້າງ, ການຕໍ່ເທີບ, ຕໍ່ເຕີມ, ການກໍ່ສ້າງເພື່ອເຮັດການບໍລິການ, ທຸລະກິດ ແລະ ປ້າຍໂຄສະນາ ທີ່ກວມເອົາເຂດສະຫງວນທາງຍ່າງ, ແຄມນ້ຳຊອງ ແລະ ບ່ອນອື່ນໆ ທີ່ເປັນເຂດສະຫງວນຂອງສາທາລະນະ ແມ່ນໃຫ້ຮື້ຖອນ, ຍົກຍ້າຍອອກພາຍໃນເວລາ 15 ວັນ ນັບແຕ່ມື້ອອກແຈ້ງການສະບັບນີ້ (16 ກັນຍາ ຫາ ວັນທີ 30 ກັນຍາ 2020) ໃຫ້ສໍາເລັດ, ຖ້າບໍ່ ແມ່ນຈະຖືກກ່າວເຕືອນ ພ້ອມທັງປັບໄໝເປັນຈຳນວນເງິນ 10 ລ້ານກີບ.
- ໃຫ້ຕື່ນຕົວ ແລະ ເປັນເຈົ້າການໃນການເກັບມ້ຽນຂີ້ເຫຍື້ອ, ສິ່ງເສດເຫຼືອຈາກການກໍ່ສ້າງ, ການປ່ອຍນ້ຳເປື້ອນລົງນໍ້າຊອງ ໂດຍບໍ່ຜ່ານການບໍາບັດ ແລ້ວປ່ອຍອອກສູ່ຮ່ອງລະບາຍນໍ້າທໍາມະຊາດແມ່ນຢຸດເຊົາ ຫລື ຊອກຫາວິທີແກ້ໄຂໂດຍດ່ວນ.
- ສໍາລັບການສັນຈອນພາຍໃນຕົວເມືອງແມ່ນໃຫ້ປະຕິບັດຕາມປ້າຍຊີ້ບອກທາງຂຶ້ນ, ທາງລົງ ທີ່ທາງພາກສ່ວນກ່ຽວຂ້ອງໄດ້ກໍານົດໄວ້ ເຊິ່ງມີປ້າຍຕິດຕັ້ງຢູ່ຕາມຈຸດຕ່າງໆແລ້ວ ແລະ ໃຫ້ປະຕິບັດລະບຽບຈາລະຈອນຢ່າງເຂັ້ມງວດ ຖ້າຜູ້ໃດຝ່າຝືນຈະຖືກກ່າວເຕືອນ ພ້ອມທັງປັບໄໝຕາມລະບຽບຈາລະຈອນ.
- ໃຫ້ອົງການປົກຄອງບ້ານເກັບກໍາສະຖິຕິຫົວໜ່ວຍທຸລະກິດພັກແຮມ, ຮ້ານອາຫານ, ກິນດື່ມ, ບັນເທິງ, ອົບນວດ, ການບໍລິການຂາຍປີ້ລົດ, ປີ້ທົວແບບຊະຊາຍ, ບໍລິສັດທ່ອງທ່ຽວ, ໜ່ວຍບໍລິການທ່ອງທ່ຽວ ແລະ ກິດຈະກໍາທາງດ້ານການທ່ອງທ່ຽວປະເພດຕ່າງໆ ແລະ ຮ້ານເກມອອນລາຍ ຫລື ອິນເຕີເນັດຄາເຝ່ ແລະ ອື່ນໆ ທີ່ບໍ່ທັນໄດ້ມີອະນຸຍາດ ແລະ ເຄື່ອນໄຫວບໍ່ຖືກຕ້ອງ ເພື່ອກະກຽມລາຍງານຕໍ່ຄະນະສະເພາະກິດດັ່ງກ່າວ ພ້ອມທັງຊອກຫາວິທີປັບປຸງ ແລະ ແກ້ໄຂໃຫ້ຖືກຕ້ອງຕາມລະບຽບກົດໝາຍ.
