ໂຄວິດເຮັດໃຫ້ເສດຖະກິດອາຊີຫລຸດລົງຄັ້ງທຳອິດໃນຮອບ 58 ປີ
ເສດຖະກິດປະເທດກຳລັງພັດທະນາໃນອາຊີຫລຸດລົງຄັ້ງທຳອິດໃນຮອບ 58 ປີ, ຄາດປີໜ້າຍັງເຕີບໃຫຍ່ຕໍ່າກວ່າການຄາດຄະເນໄວ້ກ່ອນການແຜ່ລະບາດຂອງ Covid-19 ເຖິງວ່າເສດຖະກິດຈະຟື້ນຕົວກໍຕາມ.
ທ່ານ ຢາຊຸຢູກິ ຊາວາດະ ຫົວໜ້ານັກເສດຖະສາດຂອງທະນາຄານເພື່ອການພັດທະນາອາຊີ (ADB) ເປີດເຜີຍວ່າ: ປີນີ້ລວມຍອດຜະລິດຕະພັນພາຍໃນ ຫລື GDP ຂອງອາຊີຈະຫລຸດລົງ 0,7% ເຊິ່ງຕໍ່າກວ່າການຄາດຄະເນໄວ້ໃນເດືອນມິຖຸນາວ່າຈະຂະຫຍາຍຕົວ 0,1% ຖືເປັນການຫລຸດລົງຄັ້ງທຳອິດນັບແຕ່ປີ 1962.
ທ່ານ ຊາວາດະ ຍັງກ່າວອີກວ່າ: “ຜົນກະທົບຕໍ່ເສດຖະກິດຈາກການແຜ່ລະບາດຂອງ Covid-19 ຍັງຮຸນແຮງ ເນື່ອງຈາກການລະບາດຮອບທຳອິດທີ່ຍືດເຍື້ອ ຫລື ການລະບາດໃນຮອບທີ 2 ອາດເຮັດໃຫ້ຕ້ອງກັບມາໃຊ້ມາດຕະການຄວບຄຸມການແຜ່ເຊື້ອອີກ” ການຫລຸດລົງຂອງເສດຖະກິດໃນປະເທດກຳລັງພັດທະນາຂອງອາຊີເກີດຂຶ້ນເປັນວົງກວ້າງກວ່າວິກິດຄັ້ງກ່ອນໜ້າ ໂດຍຄັ້ງນີ້ເສດຖະກິດ 3 ໄຕມາດຂອງປີນີ້ມີທ່າອ່ຽງຫລຸດລົງ.
ຂະນະທີ່ຈີນທວນກະແສຂອງພາກພື້ນ ໂດຍ ADB ຄາດວ່າເສດຖະກິດຈີນຈະເຕີບໃຫຍ່ 1,8% ໃນປີນີ້ ເນື່ອງຈາກຜົນສຳເລັດໃນການຄວບຄຸມການແຜ່ລະບາດ ເຊິ່ງກົງກັບການຄາດຄະເນໄວ້ໃນເດືອນມິຖຸນາ, ສ່ວນໃນປີ 2021 ຄາດວ່າເສດຖະກິດຈີນຈະຂະຫຍາຍຕົວ 7,7% ຈາກການຄາດຄະເນໄວ້ກ່ອນໜ້ານີ້ 7,4%.
ສ່ວນອິນເດຍ ເຊິ່ງມາດຕະການລັອກດາວສົ່ງຜົນກະທົບຕໍ່ການໃຊ້ຈ່າຍຢ່າງຮຸນແຮງ ADB ຄາດການວ່າ: GDP ຈະຫລຸດລົງເຖິງ 9%, ຟີລິບປິນຫລຸດລົງ 7,3% ແລະ ໄທຫລຸດລົງ 8%.
ທັງນີ້ ການຫລຸດລົງນີ້ ADB ພິຈາລະນາລວມເຖິງການແຜ່ລະບາດຂອງ Covid-19 ຮ້າຍແຮງກວ່າການຄາດຄະເນໄວ້ໃນຕອນທຳອິດ ແລະ ຕັ້ງຢູ່ສົມມຸດທີ່ວ່າ ສາມາດຄວບຄຸມການແຜ່ລະບາດໄດ້ກາຍໃນປີນີ້.
ທ່ານ ຊາວາດະ ຍັງກ່າວອີກວ່າ: ເງິນກະຕຸ້ນເສດຖະກິດກ້ອນໃຫຍ່ສາມາດບັນເທົາຜົນກະທົບ ແລະ ເປັນຖານສຳລັບການຟື້ນຕົວຂອງເສດຖະກິດໄດ້.
ADB ຄາດຄະເນວ່າ: ການເຕີບໃຫຍ່ຂອງເສດຖະກິດໃນປະເທດອາຊີທີ່ກຳລັງພັດທະນາ ເຊິ່ງບໍ່ລວມປະເທດທີ່ພັດທະນາໄປໄກແລ້ວ ຄືຍີ່ປຸ່ນ, ອົດສະຕຣາລີ ແລະ ນິວຊີແລນ ຈະຟື້ນຕົວກັບມາເຕີບໃຫຍ່ໃນລະດັບ 6,8% ໃນປີ 2021, ແຕ່ເຖິງຢ່າງໃດກໍຕາມ, ການຂະຫຍາຍຕົວຂອງເສດຖະກິດຍັງຕໍ່າກວ່າການຄາດຄະເນໄວ້ກ່ອນຈະເກີດການແຜ່ລະບາດ ເຊິ່ງບົ່ງບອກວ່າເສດຖະກິດຍັງຟື້ນຕົວໄດ້ບໍ່ເຕັມສ່ວນ.
