ເສບຂ່າວປອມຈະຕົກຢູ່ໃນຂຸມຕົວະຍົວະຫລອກລວງ
ໂດຍ: ທິດກໍ່າ
ທຸກວັນນີ້ ບັນຫາການເສບຂ່າວ ຫລື ບໍລິໂພກຂ່າວ ມັນມີຫລາກຫລາຍສາລະພັດຢ່າງ ທັງຫລາຍຊ່ອງທາງ, ຫລາຍແງ່ມຸມ ແລະ ວ່ອງໄວທັນໃຈ ສຸດແລ້ວແຕ່ຜູ້ຈະເລືອກບໍລິໂພກ. ບັນດາແຫລ່ງຂ່າວທີ່ໂດດເດັ່ນວ່ອງໄວທັນໃຈ ແລະ ມາແຮງທີ່ສຸດກໍແມ່ນສື່ໃໝ່ ຫລືວ່າ ສື່ອອນລາຍ. ແຕ່ວ່າຂ່າວຄາວສາລະພັດຢ່າງທີ່ມີໃນສື່ອອນລາຍນັ້ນ ມັນກໍມີທັງອັນດີ ແລະ ອັນຮ້າຍ, ມີທັງອັນຕັ້ງໜ້າ ແລະ ຫຍໍ້ທໍ້, ມີທັງຂ່າວເທັດຂ່າວປອມ ແລະ ທັງໃສ່ຮ້າຍປ້າຍສີກັນຫລາຍສິ່ງຫລາຍແນວ. ເພາະສະນັ້ນ ຖ້າພວກເຮົາບໍ່ມີສະຕິໃນການວິເຄາະ, ວິຈາລະນາຍານໃນການບໍລິໂພກ ກໍອາດຕົກຢູ່ໃນຫລຸມເຄືອຂ່າຍເອີ້ນວ່າ ຖືກຕົວະຍົວະຫລອກລວງຢ່າງບໍ່ຕ້ອງສົງໄສ. ຕົວຢ່າງໃນອາທິດຜ່ານມາ ໄດ້ມີຂ່າວຊ່າລືກັນວ່າ ຈີນໄດ້ຍຶດເອົາເຂື່ອນລາວ ຫລືວ່າ ລັດຖະບານລາວຕິດໜີ້ຈີນຫລາຍ ບໍ່ມີເງິນໃຊ້ໜີ້ເລີຍມອບເຂື່ອນໃຫ້ຈີນຄຸ້ມຄອງ ວ່າຊັ້ນ !.
ພາຍຫລັງມີຂ່າວນີ້ເປັນກະແສອອກມາ, ຕ່າງຄົນກໍຕ່າງມີຄວາມຄິດ, ຄວາມເຫັນຕ່າງໆນາໆ ໂດຍສະເພາະບັນດາສື່ຂອງກຸ່ມຄົນທີ່ຍັງມີອະຄະຕິຢູ່ນອກປະເທດທີ່ຄອຍຈ້ອງມອງເວົ້າວ່າດ່າສຽດສີໃຫ້ ສປປ ລາວ ກໍໄດ້ອອກມາວິພາກວິຈານແບບໃສ່ຮ້າຍປ້າຍສີແນວບໍ່ດີໃສ່ກັນ, ຂອງແນວວ່າພວກນີ້ມັນຮຽນວິຊາຄົນຄູ, ເບິ່ງໝໍຄົນລະໝ້ອງ, ຢູ່ໄກກັນແສນໂຍດ, ມີອຸດົມການແຕກຕ່າງ, ເດີນທາງຄົນລະເສັ້ນຕັ້ງແຕ່ໃດມາເປັນອັນຈະແຈ້ງຢູ່ແລ້ວ. ສຸດທ້າຍຄວາມຈິງມັນກໍໄດ້ເປີດເຜີຍອອກ ໂດຍທາງບໍລິສັດໄຟຟ້າລາວໄດ້ອອກມາຢືນຢັນວ່າ: ຈີນບໍ່ໄດ້ຍຶດເຂື່ອນໄຟຟ້າ ຫລື ໂຄງການສາຍສົ່ງໄຟຟ້າລາວແຕ່ປະການໃດ ເປັນພຽງການເຂົ້າມາຂອງບໍລິສັດ ຊີເອສຈີ (CSG) ທີ່ທາງການຈີນສົ່ງລັດວິສາຫະກິດຂອງຈີນເຂົ້າມາຊ່ວຍເຫລືອລັດຖະບານລາວ ທັງໃນແງ່ເຕັກນິກ, ທຶນຮອນເຂົ້າມາລົງທຶນໃນລະບົບສາຍສົ່ງໄຟຟ້າຂອງລາວທີ່ເປັນຈຳນວນມະຫາສານ ເພື່ອສະໜອງໄຟຟ້າທີ່ນັບມື້ຂະຫຍາຍຕົວຢູ່ພາຍໃນ ແລະ ປະເທດອ້ອມຂ້າງ ເພາະໃນໄລຍະຜ່ານມາ ກໍຄືປັດຈຸບັນ, ພັກ ແລະ ລັດຖະບານເຮົາໄດ້ເປີດກວ້າງການລົງທຶນຂອງພາກເອກະຊົນໃຫ້ສຳປະທານໃນແຫລ່ງຜະລິດ, ມາຮອດປັດຈຸບັນໄດ້ເປີດໃຫ້ມີການສຳປະທານສາຍສົ່ງ ແຕ່ທຸກຢ່າງບໍລິສັດໄຟຟ້າລາວຍັງເປັນຜູ້ຄວບຄຸມດູແລເດີນເຄື່ອງໄຟຟ້າ ເພື່ອຄວາມໝັ້ນຄົງທາງດ້ານພະລັງງານຂອງຊາດ ແລະ ຕອບສະໜອງນະໂຍບາຍຂອງບັນດາປະເທດອາຊຽນໃນກອບການຮ່ວມມືທາງດ້ານພະລັງງານທີ່ສົ່ງເສີມໃຫ້ມີ (ASEAN power Grid) ຫລື ການເຊື່ອມໂຍງກັນດ້ວຍລະບົບການສົ່ງໄຟຟ້າໃນບັນດາປະເທດອາຊຽນ ເພື່ອຄວາມໝັ້ນຄົງທາງດ້ານພະລັງງານທັງໝົດໃນບັນດາປະເທດອາຊຽນ.
ລັດຖະບານລາວຄາດໝາຍວ່າ ການຮ່ວມມືລະຫວ່າງ ລາວ ແລະ ຈີນ ຈະສ້າງໂອກາດທາງດ້ານການຕະຫລາດໃຫ້ເພີ່ມຂຶ້ນ ໂດຍການຂະຫຍາຍໄຟຟ້າເຂົ້າສູ່ຈີນ ແລະ ກຸ່ມປະເທດ CLMV ເພີ່ມຕື່ມ. ຫາກລະບົບສາຍສົ່ງໄຟຟ້າສາມາດເຊື່ອມໂຍງກັນໄດ້ທັງໝົດ. ໃນທີ່ສຸດແລ້ວ ພາຍໃຕ້ຮູບແບບການສຳປະທານ ທັງລະບົບສາຍສົ່ງ ແລະ ເຂື່ອນພະລັງງານທັງໝົດທີ່ໄດ້ກໍ່ສ້າງ ແລະ ຈັດຕັ້ງປະຕິບັດໃນປະເທດລາວໄປແລ້ວ ຕໍ່ໄປໃນອະນາຄົດຈະຖືກໂອນເປັນຊັບສິນຂອງລັດຖະບານລາວທັງໝົດຕາມສັນຍາ BOT ເຊິ່ງເປັນຮູບແບບການລົງທຶນ ຫລື ເປັນມາດຕະຖານສາກົນ ແລະ ໝາຍຄວາມວ່າ ມູນຄ່າຊັບສິນທັງໝົດທີ່ຈະໂອນເປັນຂອງລັດຖະບານລາວຈະມີມູນຄ່າມະຫາສານ. ນີ້ຄືຄຳຢືນຢັນຂອງບໍລິສັດໄຟຟ້າອອກມາໃຫ້ຂໍ້ມູນເປັນລາຍລະອຽດຕໍ່ສັງຄົມໃນບັນຫາທີ່ມີບາງແຫລ່ງສື່ກ່າວຫາວ່າຈີນຍຶດເຂື່ອນໄຟຟ້າ ຫລື ສາຍສົ່ງໄຟຟ້າລາວນັ້ນມັນບໍ່ເປັນຄວາມຈິງແຕ່ປະການໃດ.
ນອກຈາກແຫລ່ງຂ່າວເລື່ອງໄຟຟ້າລາວ ຍັງມີຫລາຍແຫລ່ງຂ່າວອື່ນໆທີ່ພວກເຮົາຕ້ອງໄດ້ພາກັນຄົ້ນຄິດ ແລະ ພິຈາລະນາເຖິງມູນເຫດ, ທີ່ໄປທີ່ມາຂອງຄວາມຈິງ ເພື່ອບໍ່ໃຫ້ຕົກຢູ່ໃນເຄືອຂ່າຍຂອງຄຳວ່າ ຂ່າວເທັດ ຫລືວ່າ ຂ່າວປອມ. ໃນຂະບວນວິວັດຂອງໂລກທີ່ພວມນັບມື້ປ່ຽນແປງຢ່າງໄວວາ ບັນດາຂໍ້ມູນຂ່າວສານກໍນັບມື້ກ້າວໜ້າລ້ຳຍຸກ ມີຫລາຍຮູບຫລາຍສີ ທັງອັນດີ ແລະ ອັນຮ້າຍ, ທັງຕົວແທ້ ແລະ ຕົວປອມ ເພື່ອຊວນເຊື່ອໃຫ້ຄົນທັງຫລາຍເຫີນຫ່າງຈາກຄວາມຈິງ. ດັ່ງແຫລ່ງຂ່າວຂອງພວກປະຕິການຂາຍຊາດຊ້າງສາມຫົວ ເຊິ່ງຍາມໃດກໍຈ້ອງມອງລໍຖ້າສວຍໂອກາດຕ່າວໂຈມຕີ ສປປ ລາວ ຂອງພວກເຮົາ ຍ້ອນພວກມັນຍາມໃດກໍກົ້ມເບິ່ງແຕ່ຫົວເຂົ່າໜ້າແຂ່ງ, ບໍ່ເບິ່ງໂລກກວ້າງ, ບໍ່ເບິ່ງເຫດຜົນ ແລະ ເບິ່ງໂລກແບບສັດຈະທຳ ຈຶ່ງຂໍໃຫ້ຄົນລາວທຸກຄົນເສບຂ່າວຢ່າງມີສະຕິ, ມີສະມາທິ ເພື່ອບໍ່ໃຫ້ຕົກຫລຸມຂອງການຕົວະຍົວະຫລອກລວງ.
