ໂຄວິດ-19 ເລີ່ມລະບາດໜັກຢູ່ມຽນມາ ພົບຜູ້ຕິດເຊື້ອໃໝ່ເພີ່ມເກືອບ 100 ຄົນໃນມື້ດຽວ
ໃນວັນທີ 9 ກັນຍານີ້, ມຽນມາກຳລັງຜະເຊີນສະຖານະການການແຜ່ລະບາດຂອງໂຄວິດ-19 ໃນປະເທດ ທີ່ມີທ່າອ່ຽງຮຸນແຮງຂຶ້ນ ຫລັງຈາກໄລຍະ 2 ອາທິດຜ່ານມາ ພົບຜູ້ຕິດເຊື້ອໃໝ່ເພີ່ມສູງຂຶ້ນຢ່າງຕໍ່ເນື່ອງ ໂດຍໃນວັນທີ 9 ກັນຍານີ້ ພົບຜູ້ຕິດເຊື້ອເພີ່ມອີກ 98 ຄົນ ໜຶ່ງໃນນັ້ນຄືລັດຖະກອນອາວຸໂສໃນທຳນຽບປະທານາທິບໍດີຢູ່ນະຄອນຫລວງເນປີດໍ.
ສົ່ງຜົນໃຫ້ຈຳນວນຜູ້ຕິດເຊື້ອສະສົມຢູ່ມຽນມາມີ 1.807 ຄົນ, ເສຍຊີວິດແລ້ວ 12 ຄົນ ໂດຍລັດຍະໄຂ່ ແລະ ຢາງກຸ້ງ ອະດີດເມືອງຫລວງເກົ່າຂອງມຽນມາ ເປັນພື້ນທີ່ທີ່ພົບການແຜ່ລະບາດຂອງໂຄວິດ-19 ຮຸນແຮງທີ່ສຸດໃນປະເທດ, ສ່ວນສາທາລະນະສຸກມຽນມາເປີດເຜີຍວ່າ: ກວດຫາເຊື້ອໄປແລ້ວເຖິງ 179.471 ຕົວຢ່າງ ໃນຫລາຍເດືອນຜ່ານມາ.
ຂະນະທີ່ສະຖານະການໂຄວິດ-19 ຢູ່ອາຊີຕາເວັນອອກສຽງໃຕ້ ຟີລິບປິນຍັງເປັນປະເທດທີ່ມີຜູ້ຕິດເຊື້ອສະສົມສູງເຖິງ 241.987 ຄົນ ຫລາຍທີ່ສຸດໃນອາຊຽນ, ຮອງລົງມາແມ່ນອິນໂດເນເຊຍ 200.035 ຄົນ ມີຜູ້ເສຍຊີວິດຫລາຍທີ່ສຸດເຖິງ 8.230 ຄົນ, ສິງກະໂປ 57.091 ຄົນ, ມາເລເຊຍ 9.559 ຄົນ ແລະ ໄທ 3.447 ຄົນ.
