ພັນລະຍາຂອງ Obamaເປີດເຜີຍຄວາມສຳພັນແຕ່ງງານກັບຜົວ
ແຫຼ່ງຂ່າວຈາກ vnnet, ວັນທີ 8 ກັນຍານີ້ ໃຫ້ຮູ້ວ່າ: ທ່ານນາງ Michelle Obamaໃນຂະນະທີ່ເວົ້າເຖິງຄວາມສຳພັນແຕ່ງງານຂອງຕົນກັບ ປະທານາທິບໍດີຄົນທີ 44 ຂອງສະຫະລັດ Barack Obama, ທ່ານນາງMichelle Obama ຍອມຮັບວ່າ: “ມີບາງຄັ້ງກໍຢາກຊຸກ ໃຫ້ Barack ຕົກລົງປ່ອງຢ້ຽມໄປພູ້ນລະ”.
ສຳນັກຂ່າວ Daily Mail ໃຫ້ຮູ້ວ່າ: ອະດີດສະຕີນໍ້າເບີ 1 Michelle Obama, ອາຍຸ 56 ປີ ເວົ້າກັບຄູ່ຮັກຊາຍໜຸ່ມຍິງສາວວ່າ: “ຖ້າຫາກວ່າສິ່ງດັ່ງກ່າວຈະເຮັດໃຫ້ຄວາມຮັກແຕກຫັກ, ຂ້ອຍ ແລະ BarackObama ແຍກທາງກັນແຕ່ດົນຫຼາຍເທື່ອແລ້ວ…ແຕ່ພວກເຮົາມີຄວາມຮັກທີ່ໝັ້ນຄົງ”.
ທ່ານນາງ Michelle Obama ໄດ້ສົມທຽບການເລືອກຜົວ, ເລືອກເມຍວ່າ ກໍຄ້າຍຄືກັນກັບການເລືອກທິມກີລາບານບ້ວງທີ່ເຮົາມັກ, ທ່ານນາງເວົ້າວ່າ: “ຂ້ອຍແຕ່ງງານໃນທຳນອງຂອງຄວາມນິຍົມ LeBron”.
“ຖ້າທ່ານຫາກເບິ່ງການແຕ່ງງານຄືກັນກັບເກມກີລາ, ທ່ານກໍຢາກໃຫ້ທິມຂອງຕົນໄດ້ຮັບໄຊຊະນະ ເຊັ່ນດຽວກັນກັບຄວາມນິຍົມ LeBron, ທ່ານອາດເຂົ້າໃຈດີ….ມີບາງຄັ້ງຂ້ອຍກໍຢາກຊຸກໃຫ້BarackObama ຕົກລົງຈາກປ່ອງຢ້ຽມພຸ້ນລະ. ທ່ານຮູ້ບໍ່ວ່າ ເວລານັ້ນ ມັນມີອາລົມຈິດທີ່ຮຸນແຮງທີ່ສຸດ. ເຖິງຢ່າງໃດກໍຕາມ, ບັນຫາດັ່ງກ່າວບໍ່ມີຄວາມໝາຍວ່າເຮົາຈະແຍກກັນ. ຄວາມງໍແງດັ່ງກ່າວອາດຈະແກ່ຍາວ ແລະ ຈະແກ່ຍາວເປັນປີ”.
ທ່ານນາງ Michelle Obama ກ່າວວ່າ: “ການແຕ່ງງານມັນຕ້ອງການຄວາມພະຍາຍາມຫຼາຍທີ່ສຸດ, ຄວາມສັດຊື່ຕໍ່ກັນ ແລະ ກັນ ກັບຄູ່ຊີວິດຂອງຕົນ”.
ວັນທີ 3 ຕຸລາທີ່ຈະມາເຖິງ, ຄູ່ຜົວເມຍອະດີດປະທານາທິບໍດີ BarackObama ຈະສະຫຼອງວັນແຕ່ງງານຄົບຮອບ 28 ປີ, ຊຶ່ງກ່ອນໜ້ານີ້ 27 ປີຜູ້ຊາຍຄົນນັ້ນໄດ້ໃຫ້ຄຳໝັ້ນສັນຍາກັບຂ້ອຍວ່າ: “ຊີວິດຈະເຕັມໄປດ້ວຍສິ່ງທ້າທາຍທົດສອບນາໆປະການ ແຕ່ມັນຈະກັບກາຍມາເປັນຄວາມຈິງ”.
ທ່ານນາງ Michelle Obama ຖືກເລືອກໃຫ້ເປັນຜູ້ຍິງທີ່ໜ້າຈັບອົກຈັບໃຈທີ່ສຸດໃນສະຫະລັດ ໃນໄລຍະ 2 ປີຕິດຕໍ່ກັນຈາກການຄັດເລືອກຂອງອົງກອນ Gallup. ປີຜ່ານມານີ້, ທ່ານນາງກໍຖືກຄັດເລືອກ ແລະ ຂະໜານນາມຄ້າຍຄືກັນກັບການຄັດເລືອກຂອງ YouGov.
ແປຂ່າວ: ລູກເມືອງພວນ.
