ຫວຽດນາມສົ່ງອອກເຂົ້າ 8 ເດືອນທຳອິດປີນີ້ ເພີ່ມຂຶ້ນ 4,5 ລ້ານໂຕນ ກວາດລາຍໄດ້ 2.200 ລ້ານໂດລາ
ວັນທີ 8 ກັນຍານີ້, ສຳນັກງານສະຖິຕິທົ່ວໄປຂອງຫວຽດນາມເປີດເຜີຍວ່າ: ຫວຽດນາມມີລາຍໄດ້ປະມານ 2.200 ລ້ານໂດລາສະຫະລັດ ຈາກການສົ່ງອອກເຂົ້າ 4,5 ລ້ານກວ່າໂຕນ ໃນໄລຍະ 8 ເດືອນທຳອິດຂອງປີ 2020 ເຊິ່ງຫລຸດລົງ 1,7% ເມື່ອທຽບໃສ່ປີຕໍ່ປີ.
ຖ້າໄລ່ສະເພາະເດືອນສິງຫາ ຫວຽດນາມສົ່ງອອກເຂົ້າໄປຕ່າງປະເທດ 5 ແສນໂຕນ ສ້າງລາຍໄດ້ລວມ 251 ລ້ານໂດລາສະຫະລັດ ເຊິ່ງຫລຸດລົງ 16,9% ໃນດ້ານປະລິມານ ແລະ 6,8% ໃນດ້ານມູນຄ່າ ໂດຍຈີນ, ມາເລເຊຍ ແລະ ຟີລິບປິນ ຖືເປັນຕະຫລາດສົ່ງອອກເຂົ້າລາຍໃຫຍ່ຂອງປະເທດ.
ກະຊວງກະສິກຳ ແລະ ການພັດທະນາຊົນນະບົດຂອງຫວຽດນາມ ລາຍງານວ່າ: ໄລຍະ 8 ເດືອນທຳອິດຂອງປີ 2020 ປະລິມານການສົ່ງອອກເຂົ້າຂອງຫວຽດນາມຫລຸດລົງ ເນື່ອງຈາກການລະບາດໃຫຍ່ຂອງໂຄວິດ-19 ແຕ່ມູນຄ່າການສົ່ງອອກເພີ່ມຂຶ້ນ ເນື່ອງຈາກລາຄາເຂົ້າສູງຂຶ້ນ ເຊິ່ງສະເລ່ຍປະມານ 488 ໂດລາສະຫະລັດຕໍ່ໂຕນ.
ທັງນີ້ ຫວຽດນາມກັບມາສົ່ງອອກເຂົ້າຕາມປົກກະຕິອີກໃນເດືອນພຶດສະພາຜ່ານມາ ຫລັງຈາກເຄີຍຫ້າມສົ່ງອອກເຂົ້າຊົ່ວຄາວໃນເດືອນມີນາ ເພື່ອຮັບປະກັນຄວາມໝັ້ນຄົງທາງອາຫານຂອງປະເທດ ຍາມເກີດການແຜ່ລະບາດຂອງໂຄວິດ-19.
ສ່ວນສະມາຄົມອາຫານຂອງຫວຽດນາມ (VFA) ເປີດເຜີຍວ່າ: ຫວຽດນາມໄດ້ສົ່ງອອກເຂົ້າ 6,3 ລ້ານໂຕນ ໃນປີ 2019 ສ້າງລາຍໄດ້ລວມ 2.800 ລ້ານໂດລາສະຫະລັດ ແລະ ຄາດວ່າປະລິມານສົ່ງອອກເຂົ້າໃນປີ 2020 ຈະລວມມີ 6,7 ລ້ານໂຕນ.
