ຂ່າວເສົ້າ! ຖືກຫຼອກຂ້າເອົາລູກໃນທ້ອງ

ຂ່າວ nld, ວັນທີ 3 ກັນຍານີ້ ໃຫ້ຮູ້ວ່າ: ແມ່ມານຄົນໜຶ່ງໃນ ບຣາຊີລ ຖືກເພື່ອນເກົ່າຫຼອກຂ້າຢ່າງໜ້າສັງເວດ ເພື່ອປາດເອົາລູກໃນທ້ອງ.

ໜັງສຶພິມ New York Postໃຫ້ຮູ້ວ່າ: ຜູ້ເຄາະຮ້າຍຊື່ວ່າ ນາງ Flavia Godinho Mafra, ອາຍຸ 24 ປີ, ຢູ່ທີ່ລັດ Santa Catarina ບຣາຊີລ, ນາງ Flaviaຖືພາໄດ້ 36 ອາທິດ, ຖືກເພື່ອນເກົ່າຄົນໜຶ່ງຫຼອກໃຫ້ໄປຮ່ວມງານລ້ຽງແຫ່ງໜຶ່ງ ເພື່ອສະຫຼອງງານເກີດແອນ້ອຍໃໝ່ຂອງເພື່ອນ. ໃນນັ້ນມີເພື່ອນອີກສອງຄົນກໍຖືກເຊີນໃຫ້ໄປຮ່ວມເຊັ່ນດຽວກັນ, ແຕ່ພາຍຫຼັງມາພວກເຂົາໄດ້ຮັບແຈ້ງຄືນວ່າ ງານຖືກໂຈະແລ້ວ.

ຫຼັງຈາກນັ້ນFlaviaກໍຖືກເພື່ອນເກົ່າຫຼອກອອກໄປຂ້າງນອກ, ແລ້ວເອົາກ້ອນດິນຈີ່ທຸບຫົວຈົນຕາຍ ແລະ ປາດເອົາລູກໃນທ້ອງໄປ.

ທ່ານ Paulo Alexandre Freyesleben e Silvaຜູ້ສືບສວນສອບສວນຄະດີ. ໃຫ້ການຕໍ່ໜັງສືພິມ Daily Mailວ່າ: ສາເຫດການຕາຍຂອງເຂົາແມ່ນຍ້ອນບາດແຜໃນທ້ອງ ແລະ ຖືກທຸບທຸບດ້ວຍກ້ອນດິນຈີ່. ສົບຂອງເຂົາໄດ້ພົບເຫັນຢູ່ໃນເດີ່ນດິນແດງແຫ່ງໜຶ່ງທີ່ເປັນເດີ່ນເຮື້ອ ໃນວັນທີ 28 ສິງຫາຈາກຜົວຂອງເຂົາເອງ. ສ່ວນລູກໃນທ້ອງຖືກປາດເອົາອອກໄປແລ້ວ.

ຫຼັງຈາກນັ້ນເຈົ້າໜ້າທີ່ຕຳຫຼວດກໍໄດ້ພົບເຫັນເດັກແດງຄົນນັ້ນ ຊຶ່ງຜູ້ກໍ່ເຫດ ພ້ອມກັບ ຜົວຂອງເຂົາໄດ້ເອົາເດັກໄປໂຮງໝໍ, ເຈົ້າໜ້າທີ່ຈຶ່ງພົບເຫັນ. ແຕ່ກໍເປັນຈັ່ງບຸນທີ່ເດັກຄົນນັ້ນບໍ່ໄດ້ເປັນຫຍັງຮ້າຍແຮງ ພຽງແຕ່ມີບາດແຜເລັກນ້ອຍ ແລະ ມີສຸຂະພາບແຂງແຮງດີ. ເດັກຄົນດັ່ງກ່າວໄດ້ຮັບການເບິ່ງແຍງດູແລຢູ່ໃນໂຮງໝໍເດັກ Florianopolis ເປັນທີ່ຮຽບຮ້ອຍແລ້ວ.

ຂ່າວ: ລູກເມືອງພວນ.