ຈີນເດີນໜ້າພັດທະນາເຊມິຄອນດັດເຕີເອງ ຫລັງຖືກອາເມລິກາຈໍາກັດການສົ່ງອອກ
ລັດຖະບານຈີນມີແຜນສະໜັບສະໜູນການຜະລິດເຊມິຄອນດັດເຕີເອງໃນປະເທດຕອບໂຕ້ມາດຕະການຈຳກັດການສົ່ງອອກຂອງອາເມລິກາ.
ສຳນັກຂ່າວບລູມເບິກລາຍງານໂດຍອ້າງແຫລ່ງຂ່າວວ່າ: ລັດຖະບານຈີນກຽມສະໜັບສະໜູນການຜະລິດເຊມິຄອນດັດເຕີລຸ້ນທີສາມຢ່າງເຕັມສ່ວນ ເປັນເວລາ 5 ປີຈົນຮອດປີ 2025 ໂດຍໄດ້ບັນຈຸມາດຕະການສົ່ງເສີມການວິໄຈ, ສຶກສາ ແລະ ການສະໜັບສະໜູນທາງການເງິນໄວ້ໃນແຜນພັດທະນາປະເທດ 5 ປີ ສະບັບທີ 14 ເຊິ່ງຈະນຳສະເໜີຕໍ່ກອງປະຊຸມຄະນະຜູ້ບໍລິຫານປະເທດໃນເດືອນຕຸລານີ້.
ຂະນະທີ່ ປະທານປະເທດ ສີຈິ້ນຜິງ ຈະທຸ້ມງົບປະມານ ປະມານ 1,4 ຕື້ໂດລາສະຫະລັດ ສຳລັບພັດທະນາເຕັກໂນໂລຊີ ນັບແຕ່ເຄືອຂ່າຍໄຮ້ສາຍໄປຈົນເຖິງປັນຍາປະດິດຕະຫລອດ 5 ປີຂອງແຜນພັດທະນາສະບັບດັ່ງກ່າວ.
ເຊມິຄອນດັດເຕີເປັນອົງປະກອບສຳຄັນໃນການຜະລິດ ແລະ ພັດທະນາເຕັກໂນໂລຊີຂອງຈີນ, ແຕ່ລະປີຈີນນຳເຂົ້າແຜງວົງຈອນຫລາຍກວ່າ 300.000 ລ້ານໂດລາສະຫະລັດ ໂດຍຜູ້ຜະລິດເຊມິຄອນດັດເຕີຢູ່ຈີນຕ້ອງອາໄສຊິບຈາກອາເມລິກາ, ແຕ່ຫລັງຈາກອາເມລິກາຂຶ້ນບັນຊີດຳ ບໍລິສັດເຕັກໂນໂລຊີຈາກຈີນ ເຮັດໃຫ້ບໍລິສັດເຫລົ່ານີ້ບໍ່ສາມາດນຳເຂົ້າຊິບຈາກອາເມລິກາອີກຕໍ່ໄປ.
