ທຣຳ ຈະບໍ່ຈ່າຍເງິນ 62 ລ້ານໂດລາ ທີ່ຕິດຄ້າງໃຫ້ອົງການອະນາໄມໂລກ

ທາງ​ການ​ອາ​ເມ​ລິ​ກາ​ປະກາດຈະ​ບໍ່​ຈ່າຍ​ເງິນ​ສະໜັບສະໜູນ 62 ລ້ານ​ໂດ​ລາ​ສະຫະລັດ ທີ່​ຕິດ​ຄ້າງ​ຂອງ​ປີ​ນີ້​ໃຫ້​ອົງການ​ອະນາ​ໄມ​ໂລກ (WHO) ​ໂດຍ​ຈະ​ເອົາ​ເງິນ​ຈຳນວນ​ນີ້​ໄປ​ບໍລິຈາກ​ໃຫ້​ໂຄງການ​ອື່ນ​ຂອງ​ອົງການ​ສະຫະ​ປະຊາ​ຊາດ (UN).

ການ​ຕັດສິນ​ໃຈຄັ້ງນີ້​ເກີດ​ຂຶ້ນ 1 ວັນ​ຫລັງ​ຈາກ​ທ່ານ ທຣຳ ປະກາດ​ຈະ​ບໍ່​ຮ່ວມ​ໂຄງການ​ພັດທະນາ​ວັກ​ຊີ​ນກັບ WHO ​ແລະ ​ເປັນ​ສ່ວນ​ໜຶ່ງ​ໃນ​ແຜນການ​ຖອນ​ຕົວ​ອອກ​ຈາກ WHO ຫລັງ​ຈາກ​ທ່ານ ທຣຳ ກ່າວ​ຫາ​ວ່າ​ອົງການ​ດັ່ງກ່າວ​ຢູ່​ພາຍ​ໃຕ້​ອິດ​ທິພົນ​ຂອງ​ຈີນ.

​ເຖິງ​ຢ່າງ​ໃດ​ກໍ​ດີ, ​ເຈົ້າໜ້າ​ທີ່​ໃນ​ລັດຖະບານ​ເປີດ​ເຜີຍ​ວ່າ: ລະຫວ່າງ​ດຳ​ເນີນ​ການ​ຖອນ​ຕົວ ​ເຊິ່ງຈະ​ມີ​ຜົນ​ໃນ​ເດືອນ​ກໍລະກົດ 2021 ອາ​ເມ​ລິ​ກາ​ຈະ​ຍັງ​ເຂົ້າຮ່ວມ​ກອງ​ປະຊຸມ​ຂອງ WHO ບາງ​ກອງ​ປະຊຸມ ​ແລະ ຈະ​ບໍລິຈາກ​ເງິນ​ໃຫ້​ບາງ​ໂຄງການ​ເຊັ່ນ: ​ໂຄງການ​ກຳຈັດ​ໂປ​ລິ​ໂອ​ຢູ່​ອັບ​ກາ​ນິດ​ສະຖານ ​ແລະ ປາ​ກິດ​ສະຖານ ລວມທັງ​ໂຄງການ​ໃຫ້ການ​ຊ່ວຍ​ເຫລືອ​ດ້ານ​ມະນຸດສະທຳ​ຢູ່​ລີ​ບີ, ຊີຣີ.

ທັງ​ນີ້, ທ່ານ ທຣຳ ປະກາດ​ຖອນ​ຕົວ​ຈາກ WHO ​​ໃນ​ເດືອນ​ກໍລະກົດ​ຜ່ານ​ມາ, ອາ​ເມ​ລິ​ກາ​ຈ່າຍ​ເງິນ​ສະໜັບສະໜູນ​ໃຫ້ WHO ປະຈຳ​ປີ 2020 ​ແລ້ວ 52 ລ້ານ​ໂດ​ລາ​ສະຫະລັດ ຈາກ​ທີ່​ຕ້ອງ​ຈ່າຍ​ທັງ​ໝົດ 120 ລ້ານ​ໂດ​ລາ​ສະຫະລັດ.