ຍີ່ປຸ່ນກຽມພິຈາລະນາສະເໜີວັກຊີນໂຄວິດ-19 ໃຫ້ພົນລະເມືອງທຸກຄົນໃນປະເທດເປັນ “ສະຫວັດດີການຟຣີ”
ສຳນັກຂ່າວ Kyodo ຂອງຍີ່ປຸ່ນ ລາຍງານໃນວັນທີ 2 ກັນຍາວ່າ: ລັດຖະບານຍີ່ປຸ່ນກຳລັງຢູ່ລະຫວ່າງການພິຈາລະນາສະເໜີວັກຊີນປ້ອງກັນໂຄວິດ-19 ໃຫ້ພົນລະເມືອງໃນປະເທດທຸກຄົນໃນຮູບແບບ “ສະຫວັດດີການຟຣີ” ເພື່ອຄວບຄຸມການແຜ່ລະບາດຂອງໄວຣັສໂຄໂຣນາ 2019 ແລະ ປ້ອງກັນບໍ່ໃຫ້ມີຜູ້ຕິດເຊື້ອ ແລະ ຜູ້ເສຍຊີວິດຈາກພະຍາດລະບາດດັ່ງກ່າວເພີ່ມຂຶ້ນ.
ໂດຍລັດຖະບານຕັ້ງເປົ້າໝາຍໄວ້ວ່າ: ແຜນການສະເໜີວັກຊີນປ້ອງກັນໂຄວິດ-19 ທີ່ຈະເກີດຂຶ້ນໃນອະນາຄົດອັນໃກ້ນີ້ຈະຕ້ອງເປັນສະຫວັດພິການຟຣີທີ່ສາມາດເຂົ້າເຖິງພົນລະເມືອງຍີ່ປຸ່ນໃນຈຳນວນຫລາຍທີ່ສຸດເທົ່າທີ່ຈະເຮັດໄດ້ ເນື່ອງຈາກພະຍາດລະບາດດັ່ງກ່າວສາມາດແຜ່ລະບາດໄດ້ຢ່າງວ່ອງໄວ.
ສອດຄ່ອງກັບໃນອາທິດຜ່ານມາ ອະດີດນາຍົກລັດຖະມົນຕີ ຊິນໂຊ ອາເບະ ໄດ້ກ່າວໄວ້ວ່າ: ລັດຖະບານຍີ່ປຸ່ນຄາດຫວັງຈະໃຫ້ວັກຊີນໂຄວິດ-19 ຕໍ່ພົນລະເມືອງທຸກຄົນພາຍໃນ 6 ເດືອນຕົ້ນປີ 2021 ເຊິ່ງຖືເປັນສ່ວນໜຶ່ງຂອງມາດຕະການປ້ອງກັນການລະບາດຂອງໂຄວິດ-19 ໂດຍຈະສະເໜີການສັກວັກຊີນໃຫ້ບຸກຄະລາກອນການແພດ, ຜູ້ອາຍຸສູງ ແລະ ຜູ້ທີ່ມີພະຍາດແຊກຊ້ອນ ເປັນອັນດັບຕົ້ນໆ.
ປັດຈຸບັນ ຍີ່ປຸ່ນມີຜູ້ຕິດເຊື້ອສະສົມທັງໝົດ 68.392 ຄົນ ໃນຈຳນວນນີ້ເປັນຜູ້ຕິດເຊື້ອຢູ່ລະຫວ່າງການປິ່ນປົວ 9.273 ຄົນ ແລະ ເສຍຊີວິດ 1.296 ຄົນ ເຊິ່ງໃນໄລຍະ 3 ວັນຜ່ານມາ, ນະຄອນຫລວງໂຕກຽວພົບຜູ້ຕິດເຊື້ອໂຄວິດ-19 ເພີ່ມມື້ລະບໍ່ໜ້ອຍກວ່າ 100 ຄົນມາໂດຍຕະຫລອດ ເລີ່ມແຕ່ວັນທີ 31 ສິງຫາ ທີ່ພົບຜູ້ຕິດເຊື້ອ 100 ຄົນ, ວັນທີ 1 ກັນຍາ ພົບຜູ້ຕິດເຊື້ອ 170 ຄົນ ແລະ ວັນທີ 2 ກັນຍາ ພົບຜູ້ຕິດເຊື້ອໃໝ່ 141 ຄົນ.
ຂະນະທີ່ປັດຈຸບັນ ໜ່ວຍງານດ້ານການແພດ ແລະ ບໍລິສັດຜູ້ຜະລິດຢາທົ່ວໂລກກຳລັງຢູ່ລະຫວ່າງການພັດທະນາວັກຊີນຕ້ານໂຄວິດ-19 ຢ່າງຕໍ່ເນື່ອງ ໂດຍຄາດວ່າປັດຈຸບັນວັກຊີນບາງຊະນິດຢູ່ໃນຂັ້ນຕອນການທົດລອງທາງຄລີນິກຮຽບຮ້ອຍແລ້ວ.
