Apple ກຽມເປີດຕົວ iPhone 5G ເດືອນໜ້າ
Apple ຍັກໃຫຍ່ເຕັກໂນໂລຊີຂອງອາເມລິກາ ກຽມເປີດຕົວ iPhone ຮອງຮັບ 5G ຈຳນວນ 4 ລຸ້ນໃນເດືອນໜ້າ ໂດຍສັ່ງໃຫ້ຜູ້ສະໜອງຜະລິດສິນຄ້າສູງເຖິງ 80 ລ້ານໜ່ວຍ.
ເວັບໄຊບລູມເບິກ ລາຍງານອ້າງແຫລ່ງຂ່າວໃກ້ຊິດວ່າ: ບໍລິສັດ Apple Inc. ກຽມເປີດຕົວ iPhone ລຸ້ນຮອງຮັບ 5G ຈຳນວນ 4 ລຸ້ນໃນເດືອນຕຸລານີ້ ໂດຍຈະເປັນລຸ້ນມາດຕະຖານ 2 ລຸ້ນ, ສ່ວນອີກ 2 ລຸ້ນຈະເປັນລຸ້ນໄຮເອນ.
ຜ່ານມາ ແອັບເປິ້ນມັກເປີດຕົວ iPhone ລຸ້ນໃໝ່ ລວມທັງຜະລິດຕະພັນອື່ນໆໃນເດືອນກັນຍາ, ແຕ່ໃນປີນີ້ໄດ້ເລື່ອນເວລາອອກໄປເປັນເດືອນຕຸລາ ເນື່ອງຈາກການແຜ່ລະບາດຂອງໂຄວິດ-19 ທົ່ວໂລກ.
ສຳລັບ iPhone 5G ລຸ້ນມາດຕະຖານຂອງແອັບເປິ້ນຈະມີໜ້າຈໍ 5,4 ນິ້ວ ແລະ 6,1 ນິ້ວ, ສ່ວນລຸ້ນໄຮເອນຈະມີໜ້າຈໍໃຫຍ່ກວ່າຢູ່ທີ່ 6,1 ນິ້ວ ແລະ 6,7 ນິ້ວ.
ແຫລ່ງຂ່າວເປີດເຜີຍວ່າ: ປັດຈຸບັນ ແອັບເປິ້ນໄດ້ແຈ້ງໃຫ້ບໍລິສັດຜູ້ສະໜັບສະໜູນດຳເນີນການຜະລິດ iPhone ລຸ້ນຮອງຮັບ 5G ຈຳນວນ 75-80 ລ້ານໜ່ວຍໃນປີນີ້ ເຊິ່ງສອດຄ່ອງກັບຕົວເລກທີ່ບໍລິສັດສັ່ງຜະລິດໃນຊ່ວງຫລາຍປີຜ່ານມາ.
ເຖິງວ່າການລະບາດຂອງໂຄວິດ-19 ສ້າງຄວາມເສຍຫາຍຢ່າງໜັກຕໍ່ເສດຖະກິດ ແລະ ສ້າງຄວາມປັ່ນປ່ວນຕໍ່ຕ່ອງໂສ້ອຸປະທານ, ແຕ່ແອັບເປິ້ນຄາດວ່າ: ຜະລິດຕະພັນຄື iPhone, iPad ແລະ ຄອມພິວເຕີ Mac ຈະຍັງມີຄວາມຕ້ອງການແຂງແກ່ນຈາກກຸ່ມທີ່ເຮັດວຽກ ຫລື ຮຽນອອນລາຍຢູ່ເຮືອນ.
ນອກຈາກນີ້ ລາຍງານຍັງລະບຸວ່າ: ແອັບເປິ້ນຈະເປີດຕົວຜະລິດຕະພັນລຸ້ນໃໝ່ເຊັ່ນ: Apple Watch, iPad Air ແລະ HomePod ໃນເດືອນໜ້າເຊັ່ນກັນ.
ລາຍໄດ້ຈາກ iPhone ຍັງຄິດເປັນອັດຕາສ່ວນເກືອບເຄິ່ງໜຶ່ງຂອງຍອດຂາຍຜະລິດຕະພັນທັງໝົດຂອງແອັບເປິ້ນ ແລະ ມັກສູງເຖິງ 60% ໃນຊ່ວງເທດສະການມື້ພັກທ້າຍປີ.
ນັບແຕ່ຕົ້ນປີ 2020 ມາຮອດປັດຈຸບັນ ຫຸ້ນຂອງແອັບເປິ້ນເພີ່ມຂຶ້ນ 76% ແລ້ວ ເຮັດໃຫ້ເປັນບໍລິສັດອາເມລິກາທຳອິດທີ່ມີມູນຄ່າຕະຫລາດສູງເຖິງ 2 ຕື້ໂດລາ.
