ສະຫລຸບບັນຫາໜ້າສົນໃຈທົ່ວໂລກວັນທີ 1 ກັນຍາ 2020
- ອາເມລິກາລາຍງານຜູ້ຕິດເຊື້ອ COVID-19 ສູງເຖິງ 6 ລ້ານຄົນຮຽບຮ້ອຍແລ້ວ. ຂະນະທີ່ມີຂ່າວດີເກີດຂຶ້ນເຊັ່ນກັນ ຄືຈຳນວນຜູ້ຕິດເຊື້ອໃໝ່ຫລຸດລົງຢູ່ລັດທາງຕອນໃຕ້ ແລະ ຕາເວັນຕົກຂອງປະເທດ.
ຄ່າສະເລ່ຍຂອງຜູ້ຕິດເຊື້ອແຕ່ລະອາທິດຕໍ່າກວ່າ 42.000 ຄົນ/ວັນ ເປັນເວລາ 6 ວັນຕິດຕໍ່ກັນ ໂດຍເລີ່ມຫລຸດລົງໃນຊ່ວງມື້ພັກທ້າຍອາທິດສູ່ລະດັບຕໍ່າສຸດນັບແຕ່ທ້າຍເດືອນມິຖຸນາ.
- ເສດຖະກິດຂອງອິນເດຍຫລຸດລົງຄັ້ງປະຫວັດສາດຢູ່ລະດັບ 23,9% ເມື່ອທຽບໃສ່ປີ 2019 ໃນຊ່ວງເດືອນເມສາຫາມິຖຸນາ ໂດຍໃນໄລຍະເວລາດັ່ງກ່າວມີການປັບໃຊ້ມາດຕະການ Lockdown ຢ່າງເຂັ້ມງວດເພື່ອພະຍາຍາມຄວບຄຸມການແຜ່ລະບາດຂອງ COVID-19.
ແລະ ເຖິງວ່າ Lockdown ຄັ້ງນີ້ຈະເຮັດໃຫ້ປະເທດສູນເສຍວຽກເຖິງ 140 ລ້ານຕຳແໜ່ງ, ແຕ່ການຄວບຄຸມການລະບາດນັ້ນບໍ່ໄດ້ຜົນ ເນື່ອງຈາກປັດຈຸບັນອິນເດຍມີລາຍງານຜູ້ຕິດເຊື້ອໃໝ່ຫລາຍກວ່າປະເທດອື່ນໆ ໂດຍມີການຢືນຢັນຜູ້ຕິດເຊື້ອແຕ່ລະວັນເກືອບ 80.000 ຄົນໃນ 24 ຊົ່ວໂມງຜ່ານມາ.
- Richard Clarida ຮອງປະທານຂອງ FED ໄດ້ເຈລະຈາກັບ Peterson Institute for International Economics ຢູ່ນະຄອນຫລວງ Washington, DC. ໂດຍກ່າວວ່າ: ອັດຕາວ່າງງານທີ່ຕໍ່າອາດຈະບໍ່ພຽງພໍຈະເຮັດໃຫ້ FED ກັບມາຮັດແໜ້ນນະໂຍບາຍທາງການເງິນໃຫ້ເຂັ້ມງວດຂຶ້ນອີກ.
ນອກຈາກນີ້ ຍັງກ່າວອີກວ່າ: ແບບຈຳລອງຂອງ FED ທີ່ຄາດຄະເນວ່າອັດຕາເງິນເຟີ້ຈະເພີ່ມຂຶ້ນ ເມື່ອມີການຈ້າງງານສູງສຸດນັ້ນຜິດພາດ ໂດຍຄຳເວົ້າດັ່ງກ່າວເກີດຂຶ້ນຫລັງຈາກຄຳກ່າວຂອງ Jerome Powell ປະທານຂອງ FED ທີ່ວ່າທ່ານຍິນດີຈະຍອມໃຫ້ອັດຕາເງິນເຟີ້ເພີ່ມຂຶ້ນສູງກວ່າ 2% ໃນໄລຍະເວລາໜຶ່ງ.
- ຖ້ຽວບິນຕົງຖ້ຽວບິນທຳອິດຂອງອິດສະລາແອນຈາກເມືອງ Tel Aviv ໄປເມືອງ Abu Dhabi ໃນປະເທດສະຫະລັດອາຣັບເອມິເຣດ ໄດ້ສ້າງປະຫວັດສາດການບິນຂຶ້ນມາອີກເທື່ອໜຶ່ງ ຫລັງຈາກພວກເຂົາໄດ້ບິນຜ່ານນ່ານຟ້າຂອງປະເທດຊາອຸດິອາຣະເບຍ.
ຖ້ຽວບິນຄັ້ງນີ້ ເກີດຂຶ້ນຫລັງຈາກອິດສະລາແອນ ແລະ ສະຫະລັດອາຣັບເອມິເຣດ ໄດ້ສ້າງການພົວພັນທາງການທູດຢ່າງເປັນທາງການຄັ້ງທຳອິດເມື່ອເດືອນສິງຫາຜ່ານມາ ແລະ ທ່າອ່ຽງຂອງການພົວພັນລະຫວ່າງອິດສະລາແອນ ແລະ ທັງ 2 ປະເທດຈະອົບອຸ່ນຂຶ້ນໃນໄລຍະບໍ່ເທົ່າໃດປີຜ່ານມາ.
- ປະເທດ Estonia, Latvia ແລະ Lithuania ໄດ້ກຳນົດຂໍ້ຫ້າມໃນການເດີນທາງເຂົ້າປະເທດຂອງປະທານາທິບໍດີ Alexander Lukashenko ແລະ ເຈົ້າໜ້າທີ່ຂອງປະເທດເບລາຣຸສອີກ 29 ຄົນ ເນື່ອງຈາກຂໍ້ຂັດແຍ່ງເລື່ອງທີ່ທ່ານຖືກກ່າວຫາວ່າສໍ້ໂກງຜົນການເລືອກຕັ້ງເມື່ອເດືອນຜ່ານມາ.
ການເຄື່ອນໄຫວດັ່ງກ່າວສະແດງໃຫ້ເຫັນເຖິງຄວາມບໍ່ຍິນຍອມຂອງທັງ 3 ປະເທດໃນເຂດ Baltic ເຊິ່ງເປັນແນວທາງທີ່ເຫັນຮ່ວມກັນກັບປະເທດຜູ້ນຳອື່ນໆທາງຝັ່ງຕາເວັນຕົກ ໂດຍພວກເຂົາຕ້ອງການກົດດັນໃຫ້ Lukashenko ລາອອກຈາກຕຳແໜ່ງ.
ເຖິງຢ່າງໃດກໍຕາມ, ຈົນຮອດປັດຈຸບັນນີ້ຍັງມີປະເທດອື່ນໆໃນສະຫະພາບເອີຣົບທີ່ບໍ່ເຕັມໃຈຈະຕໍ່ຕ້ານ Lukashenko ເປັນການສ່ວນຕົວ.
- ພັກການເມືອງຝ່າຍສະໜັບສະໜູນພູມປັນຍາທາງຝັ່ງຕາເວັນຕົກຂອງປະເທດ Montenegro ອາດຖືກຂັບໄລ່ອອກຈາກອຳນາດເປັນຄັ້ງທຳອິດໃນຮອບ 30 ປີ ຫລັງຈາກການເລືອກຕັ້ງລັດຖະສະພາໃນວັນທີ 31 ສິງຫາ ພັກຝ່າຍສັງຄົມນິຍົມປະຊາທິປະໄຕໄດ້ຮັບຄະແນນພຽງ 35% ເຊິ່ງເປັນຜົນທີ່ຮ້າຍແຮງທີ່ສຸດນັບແຕ່ປະເທດໄດ້ຮັບເອກະລາດໃນປີ 2006.
ຂະນະດຽວກັນ, ພັນທະມິດຝ່າຍຄ້ານທີ່ສະໜັບສະໜູນປະເທດເຊີເບຍ ເຊິ່ງໄດ້ຮັບຄະແນນສຽງ 32,5% ຈະສາມາດຈັດຕັ້ງລັດຖະບານໄດ້ທັນທີ ຖ້າພວກເຂົາສາມາດບັນລຸຂໍ້ຕົກລົງກັບສະມາຊິກຜູ້ແທນອີກ 2 ຄົນຂອງປະເທດ ເຊິ່ງເປັນຝ່າຍຄ້ານເຊັ່ນກັນ.
- ການແຂ່ງຂັນຊີງແຊ້ມໝາກລຸກສາກົນໂອລິມປຽດ (Chess Olympiad Championship) ເຊິ່ງຈັດຂຶ້ນທາງອອນລາຍໃນປີນີ້ ຈະຕ້ອງມີການແບ່ງປັນຕຳແໜ່ງແຊ້ມລະຫວ່າງປະເທດອິນເດຍ ແລະ ຣັດເຊຍ ຫລັງຈາກເກີດບັນຫາເຄືອຂ່າຍອິນເຕີເນັດລົ້ມໃນອິນເດຍ ເຮັດໃຫ້ຜູ້ຫລິ້ນຂອງພວກເຂົາ 2 ຄົນຖືກຕັດສິນໃຫ້ເສຍໃນເກມເມື່ອໝົດເວລາ ເຊິ່ງເຮັດໃຫ້ຣັດເຊຍຊະນະໃນຮອບຊີງຊະນະເລີດໄປທັນທີ.
ເຖິງຢ່າງໃດກໍຕາມ, ຫລັງຈາກການຍື່ນຄຳຮ້ອງຕໍ່ສະຫະພັນໝາກລຸກນາໆຊາດ ຄະນະກຳມາທິການໄດ້ປະກາດໃຫ້ທັງ 2 ປະເທດເປັນຜູ້ຊະນະຮ່ວມກັນ.
