ຝົນຕົກນ້ຳຖ້ວມ, ທາງເປ່ເພ, ການໄປມາຫຍຸ້ງຍາກ
ໂດຍ:ທິດກໍ່າ
ໃນສອງອາທິດທີ່ຜ່ານມານັ້ນ ເຫັນວ່າມີຝົນຕົກຕິດຕໍ່ກັນຫລາຍວັນຢູ່ຂອບເຂດນະຄອນຫລວງວຽງຈັນ ກໍຄືໃນທົ່ວປະເທດ. ຕໍ່ສະພາບການດັ່ງກ່າວມັນກໍບໍ່ມີຫຍັງແປກປະຫລາດ ຍ້ອນວ່າຊ່ວງນີ້ມັນເປັນລະດູຝົນກາງເກົ້າກາງສິບ. ຕາມເຖົ້າແກ່ບູຮານເຄີຍເວົ້າວ່າ: ຍາມຝົນຕົກເຂົ້າກາງເກົ້າກາງສິບ ນ້ຳເຕັມຫ້ວຍຮ່ອງຄອງບຶງ, ເຕັມໄຮ່ເຕັມນາ ໄດ້ກິນປາລົງຕ້ອນ. ຖ້າຍາມຝົນແທ້ໆບໍ່ມີຝົນຕົກໂຮຍຮຳໃສ່ໄຮ່ໃສ່ນາ, ໃສ່ຜົນຜະລິດ ຍາມນີ້ກໍສະແດງວ່າເກີດໄພແຫ້ງແລ້ງ, ການຜະລິດສະບຽງອາຫານກໍບໍ່ເປັນໄປຕາມຄາດໝາຍ ສຸດທ້າຍມາກໍພາກັນອຶດຢາກຂາດເຂີນ ຍ້ອນວ່າດິນຟ້າອາກາດບໍ່ອຳນວຍໃຫ້ ເພາະໂດຍສ່ວນໃຫຍ່ປະຊາຊົນບັນດາເຜົ່າເຮົາເຮັດນາປີ, ປູກພືດຜັກຍາມນີ້ແມ່ນອາໄສນ້ຳຝົນເປັນຫລັກ.
ໃນອາທິດຜ່ານມາ, ທິດກໍ່າໄດ້ມີໂອກາດລົງໄປແຖວແຂວງຄຳມ່ວນ ແລະ ສະຫວັນນະເຂດ ນັບແຕ່ເຂດເມືອງໄຊພູທອງ, ເມືອງຈຳພອນ, ອຸທຸມພອມ, ຜ່ານຖະໜົນ 13 ໃຕ້ເມືອງເຊບັ້ງໄຟ, ທ່າແຂກ, ມະຫາໄຊ, ຍົມມະລາດ, ເມືອງຄຳເກີດ ແຂວງບໍລິຄຳໄຊ ຂຶ້ນມານະຄອນຫລວງວຽງຈັນ ເຫັນວ່າຝົນຕົກສະໝໍ່າສະເໝີກັນໝົດ ເຫັນເຂົ້ານາປະຊາຊົນພວມຂຽວງາມເປັນຕາອອນຊອນ. ສ່ວນໃນເຂດແຂວງອື່ນໆທີ່ບໍ່ໄດ້ໄປເຫັນຕົວຈິງ, ແຕ່ຜ່ານການຕິດຕາມແຫລ່ງຂ່າວຄາວກໍເຫັນວ່າຟ້າຝົນປີນີ້ອຸດົມສົມບູນດີ, ມີບ່ອນຕົກຫລາຍຕົກໜ້ອຍ ຖືວ່າຕົກສະໝໍ່າສະເໝີພໍສົມຄວນ ແລະ ຕົກຕິດຕໍ່ກັນຫລາຍວັນ ມີຜົນດີໃຫ້ການຜະລິດເຂົ້າຂອງປະຊາຊົນຢ່າງມີຄວາມຫວັງຕັ້ງໃຈ.
ແນວໃດກໍຕາມ, ຖ້າມາເບິ່ງໃນດ້ານຜົນກະທົບຕໍ່ການໄປມາກໍເຫັນວ່າມີຄວາມຫຍຸ້ງຍາກພໍສົມຄວນ ເພາະວ່າເສັ້ນທາງຢູ່ບ້ານເຮົາຍັງມີຫລາຍບ່ອນມັນບໍ່ທັນໄດ້ມາດຖານ ທັງເປ່ເພມາແຕ່ຊ່ວງຍາມແລ້ງຕົກເຂົ້າຍາມຝົນນ້ຳຖ້ວມອັ່ງຍິ່ງເປັນບວກຂຸມ ເຮັດໃຫ້ເສັ້ນທາງເປ່ເພຊ້ຳຕື່ມ. ຕົວຢ່າງເຂດນະຄອນຫລວງວຽງຈັນເຮົາກໍແມ່ນທາງໄປ 13 ເໜືອ ແຕ່ຈຸດບ້ານສີເກີດ, ຜາງແຫ້ງຫານາຊາຍທອງ ຫລື ຂຶ້ນໄປຮອດຫລັກ 52 ຕໍ່ໃສ່ແຂວງວຽງຈັນເສັ້ນທາງຂ້ອນຂ້າງໄປມາຫຍຸ້ງຍາກ ຍ້ອນພວມຢູ່ໃນໄລຍະການລົງມືສ້ອມແປງ ແລະ ກໍ່ສ້າງຄືນໃໝ່. ນອກນັ້ນ ກໍຍັງມີເຂດບ້ານຕານມີໄຊໄປຫາໂນນແສງຈັນຕັດໄປໃສ່ທ່າງ່ອນກໍເຫັນວ່າມີຫລາຍຈຸດເປ່ເພ ເຮັດໃຫ້ການໄປມາແອອັດ, ອັ່ງອໍ ແລະ ຫຍຸ້ງຍາກສັບສົນ. ນອກຈາກບັນດາຈຸດທີ່ກ່າວມານີ້ແລ້ວ ໃນກະໂຕໃຈກາງນະຄອນຫລວງກໍຍັງມີຫລາຍເມືອງ, ຫລາຍບ້ານ ແລະ ຫລາຍຈຸດເສັ້ນທາງໄປມາໄດ້ເປ່ເພໃນຊ່ວງລະດູຝົນປີນີ້. ສ່ວນວ່າຢູ່ທາງຕ່າງແຂວງ ເທົ່າທີ່ທິດກໍ່າໄດ້ໄປສຳຜັດຕາມເສັ້ນທາງຫລັກໆແມ່ນຍັງຢູ່ໃນສະພາບດີ ການໄປມາສະດວກ ເປັນຕົ້ນເສັ້ນທາງ 13 ໃຕ້, ເສັ້ນທາງເລກ 8, ເລກ 9 ຕໍ່ໃສ່ຊາຍແດນຫວຽດນາມ, ເວັ້ນເສຍແຕ່ເສັ້ນທາງຊອຍ, ເສັ້ນທາງສາຂາທີ່ເປັນທາງດິນແດງເຊື່ອມຕໍ່ເມືອງຕໍ່ເມືອງ, ບ້ານຕໍ່ບ້ານຍັງເປັນບວກຂຸມ, ເປ່ເພໃນບາງຈຸດບາງບ່ອນ.
ຈາກສິ່ງທີ່ກ່າວມານີ້ ມັນໄດ້ສ້າງຄວາມຫຍຸ້ງຍາກບໍ່ໜ້ອຍແກ່ການໄປມາຫາສູ່ກັນ, ການແລກປ່ຽນສິນຄ້າລະຫວ່າງຕົວເມືອງ ແລະ ຊົນນະບົດ ຫລື ລະຫວ່າງຊົນນະບົດເຂົ້າສູ່ຕົວເມືອງ. ໃນຍຸກສະໄໝນີ້ ຖະໜົນຫົນທາງມັນເປັນສິ່ງສຳຄັນປຽບເໝືອນສາຍເລືອດໃນຮ່າງຂອງຄົນເຮົາ. ດັ່ງສຸພາສິດໄດ້ເວົ້າວ່າ: ນ້ຳໃສ ໄຟສະຫວ່າງ ທາງດີ ມັນສະແດງເຖິງຄວາມຈະເລີນຂອງຊາດບ້ານເມືອງ, ເສດຖະກິດຂອງຊາດຈະຮັ່ງມີເຂັ້ມແຂງ, ການບໍລິການຂົນສົ່ງສິນຄ້າສະດວກສະບາຍພາຍໃນ-ພາຍນອກເປັນໜຶ່ງໃນຂະແໜງການເສດຖະກິດທີ່ຈະພາໃຫ້ປະເທດຊາດຫລຸດພົ້ນອອກຈາກຄວາມທຸກຍາກ. ໃນເງື່ອນໄຂທີ່ປະເທດເຮົາບໍ່ມີຊາຍແດນໃດຕິດກັບທະເລ ບັນຫາການຄົມມະນາຄົມຂົນສົ່ງຍິ່ງມີບົດບາດສຳຄັນຕໍ່ເສດຖະກິດຂອງຊາດ, ແຕ່ບັນຫາເສັ້ນທາງບໍ່ບຸກທະລຸກໍສະແດງວ່າຄວາມຫຍຸ້ງຍາກໃນການໄປມາ, ການຈໍລະຈອນແຈກຢາຍສິນຄ້າມັນກໍຊັກຊ້າອືດອາດປານດຶງຂາເຕົ່າ, ເສັ້ນທາງຄົມມະນາຄົມຍັງເປັນສິ່ງດຶງດູດໃຫ້ປະຊາຊົນບັນດາເຜົ່າທຳການຜະລິດສິນຄ້າເພື່ອຈຳໜ່າຍສູ່ທ້ອງຕະຫລາດພາຍໃນ ແລະ ຕ່າງປະເທດ. ເປັນການດຶງດູດການທ່ອງທ່ຽວໃຫ້ມີການພັດທະນາໄປຢ່າງວ່ອງໄວ ແລະ ອຸດົມສົມບູນ.
ເຖິງຢ່າງໃດກໍດີ, ຖ້າທຽບໃສ່ສະໄໝປະຫວັດສາດກ່ອນໜ້ານີ້ຫລາຍຮ້ອຍປີ ຫລືວ່າ ຍຸກເກົ່າ, ລະບອບເກົ່າມັນກໍລື່ນກັນຕັ້ງຫລາຍຮ້ອຍເທົ່າ. ປັດຈຸບັນເວົ້າເຖິງຄວາມຈະເລີນຂອງຊາດໃນໄລຍະ 40 ກວ່າປີມານີ້ ແມ່ນໄດ້ມີການພັດທະນາແບບກ້າວກະໂດດຂັ້ນ, ປະຊາຊົນໄດ້ຊົມໃຊ້ໄຟຟ້າທຸກບ້ານ, ທຸກຄົວເຮືອນ, ຖະໜົນຫົນທາງໄດ້ເຊື່ອມຕໍ່ທຸກບ້ານ, ທຸກເມືອງ, ທຸກແຂວງໃນທົ່ວປະເທດ. ນອກຈາກນັ້ນ ຍັງໄດ້ເຊື່ອມຈອດໄປຍັງປະເທດອ້ອມຂ້າງໃນທຸກປະເທດ. ສະເພາະເສັ້ນທາງທີ່ມີຢູ່ພາຍໃນປະເທດເຖິງວ່າບາງບ່ອນມັນຍັງມີການໄປມາຫຍຸ້ງຍາກແດ່ ມັນກໍເປັນພຽງບັນຫາຊົ່ວຄາວ, ຄາດວ່າຕົກລະດູແລ້ງ ແລະ ອີກບໍ່ດົນກໍຈະໄດ້ຮັບການສ້ອມແປງໃຫ້ການໄປມາໂລ່ງລ່ຽນສະດວກດີກວ່າເກົ່າ ຈຶ່ງຂໍໃຫ້ພວກເຮົາທຸກຄົນເຂົ້າໃຈ ແລະ ມີສະຕິໃນການໄປມາ ແລະ ນຳໃຊ້ລົດນຳໃຊ້ຖະໜົນຢ່າງມີຄວາມປອດໄພ. ສິ່ງສຳຄັນຢ່າແລ່ນລົດໄວ, ແລ່ນແຊງກັນ, ຊີງກັນ, ແລ່ນຢຽບຂີ້ຕົມຟົ້ງໃສ່ຜູ້ຍ່າງ, ຜູ້ຂີ່ລົດຈັກລົດຖີບອັນຈະເກີດຄວາມຮູ້ສຶກໂກດເຄື່ອງກັນໃນສັງຄົມບ້ານເມືອງ.
