ຊົມເຊີຍວັນຊາດທີ 2 ກັນຍາຂອງຫວຽດນາມຄົບຮອບ 75 ປີ (2/09/1945 – 2/09/2020) ຢ່າງສຸດໃຈ

ພໍເຖິງວັນທີ 2 ກັນຍາຂອງທຸກໆປີ, ປະຊາຊົນຫວຽດນາມອ້າຍນ້ອງ ໃນທົ່ວທຸກແຫ່ງຫົນຂອງປະເທດ, ໃຜໆກໍມີຕວາມເບີກບານມ່ວນຊື່ນ, ຍິ້ມແຍ້ມແຈ່ມໃສ, ພ້ອມພາກັນສະຫຼອງວັນແຫ່ງໄຊຊະນະປະຫວັດສາດດ້ວຍບັນຍາກາດທີ່ຍິ່ງໃຫ່ຍ ແລະ ເຕັມໄປດ້ວຍຄວາມຮູ້ບຸນຄຸນກະຕັນຍູຕໍ່ປະທານໂຮ່ຈິມິນຜູ້ນຳການປະຕິວັດທີ່ຍິ່ງໃຫ່ຍຂອງປະຊາຊົນຫວຽດນາມ.

ກ່ອນໜ້ານີ້ 75 ປີ, ຢູທີ່ສະໜາມຫຼວງ ບາດິງ, ປະທານໂຮ່ຈິມິນ ໄດ້ປະກາດເອກະລາດ ແລະ ສ້າງຕັ້ງລັດສາທາລະນະລັດປະຊາທິປະໄຕຂຶ້ນເປັນລັດທຳອິດຢູ່ໃນພາກພື້ນອາຊີອາຄະເນ. ປະທານໂຮ່ຈິມິນປາໄສວ່າ: “ຊາດໜຶ່ງທີ່ມີຄວາມອົງອາດກ້າຫານຕ້ານການຮຸກຮານຂອງພວກຈັກກະພັດຝຼັ່ງເປັນເວລາດົນນານເຖິງ 80 ປີທີ່ຜ່ານມາ ແລະ ໄດ້ຫັນໜ້າເຂົ້າຮ່ວມຝ່າຍພັນທະມິດ ເພື່ອຕໍ່ຕ້ານພວກຟາດຊິດໃນຫຼາຍປີມານັ້ນ, ຊາດນັ້ນຄວນມີສິດເສລີພາບ, ຄວນໄດ້ຮັບເອກະລາດ…ປະເທດຊາດຫວຽດນາມມີສິດໄດ້ຮັບສິດເສລີພາບ ແລະ ເອກະລາດ ແລະ ໃນຄວາມເປັນຈິງແລ້ວໄດ້ກາຍເປັນຊາດໜຶ່ງທີ່ມີສິດເສລີພາບ ແລະ ເອກະລາດ. ທົ່ວທັງຊາດຫວຽດນາມຈະຕັດສິນໃຈເຮັດທຸກສິ່ງທຸກຢ່າງ, ທາງດ້ານວັດຖຸ, ຈິດໃຈ ແລະ ກຳລັງວັງຊາ ແມ່ນແຕ່ຊີວິດຂອງຕົນເຂົ້າໃນການປົກປັກຮັກສາສິດເສລີພາບ ແລະ ເອກະລາດຂອງຊາດຕົນ ”

ການປະກາດເອກະລາດທີ່ອຳມະຕະໃນວັນທີ 2 ກັນຍານັ້ນ ມັນໄດ້ໄຂສັງກາດໃໝ່ໃຫ້ຫວຽດນາມເປັນຄັ້ງທຳອິດທີ່ປະຊາຊົນຫວຽດນາມມີສິດເງີຍຫົວຂຶ້ນ ແລະ ມີີຄວາມພາກພູມໃຈທີ່ໄດ້ເປັນຊາດທີ່ມີສິດເສລີພາບ ແລະ ເອກະລາດ.

75 ປີທີ່ຜ່ານມາເຕັມໄປດ້ວຍຄວາມພະຍາຍາມ ແລະ ຜ່ານຜ່ານອຸປະສັກຫຍຸ້ງຍາກນາໆປະການ ໂດຍບໍ່ໄດ້ເສຍດາຍວັດຖຸສິ່ງຂອງ ແລະ ແມ່ນແຕ່ຊີວິດຂອງຕົນ, ທັງຕໍ່ສູ້ທັງພັດທະນາເພື່ອປົກປັກຮັກສາ ແລະ ພັດທະນາປະເທດຊາດຫວຽດນາມ. ເວລານີ້ປະເທດຊາດຫວຽດນາມໄດ້ມີຄວາມເຂັ້ມແຂງຕັ້ງຫຼາຍເທົ່າ, ຫວຽດນາມໄດ້ກາຍເປັນປະເທດໜຶ່ງທີ່ມິບົດບາດໃນເວທີສາກົນ.

ຄຳປະກາດເອກະລາດຂອງປະທານໂຮ່ຈິມິນເຖິງຈະສັ້ນ ແຕ່ເຕັມໄປດ້ວຍເນື້ອໃນທີ່ເປັນອຳມະຕະ, ບໍ່ສະເພາະແຕ່ມີຄຸນຄ່າທາງດ້ານປະຫວັດສາດຂອງຫວຽດນມເທົ່ານັ້ນ ແຕ່ຫາກຍັງມີຄວາມໝາຍທາງດ້ານຍຸກສະໄໝທີ່ເລິກເຊິ່ງອີກດ້ວຍ.

ຕະຫຼອດໄລຍະ 75 ປີທີ່ຜ່ານມາ, ແນວຄິດຂອງປະທານໂຮ່ຈິມິນໃນບົດຖະແຫຼງການປະກາດເອກະລາດໃນວັນທີ 2 ກັນຍານັ້ນ ໄດ້ກາຍເປັນພະລັງແຮງໃຫ້ແກ່ທົ່ວທັງຊາດຫວຽດນາມ, ປະເທດຊາດໄດ້ຜ່ານຂ້າມຄວາມຫຍຸ້ງຍາກຫຼາຍປະການເຕັມໄປດ້ວຍຄວາມທົດສອບທ້າທາຍ ເພື່ອປົກປັກຮັກສາເອກະລາດອະທິປະໄຕ, ສ້າງສາພັດທະນາປະເທດຊາດ ແລະ ມີຜົນສຳເລັດຫຼາຍດ້ານທີ່ສຳຄັນໃນທຸກໆຂົງເຂດວຽກງານ.

ປັດຈຸບັນຫວຽດນາມມີບົດບາດອິດທິພົນນັບມື້ສູງເດັ່ນຂຶ້ນໃນເວທີພາກພື້ນ ແລະ ສາກົນ, ໄດ້ເປັນປະທານອາຊຽນໝູນວຽນປີ 2020, ໄດ້ຮັບຂັດເລືອກໃຫ້ເປັນສະມາຊິກສະພາຄວາມໝັ້ນຄົງບໍ່ປະຈຳການຂອງສະຫະປະຊາຊາດ, ຫວຽດນາມໄດ້ກາຍເປັນຕົວແບບທີ່ດີໃຫ້ແກ່ໂລກໃນການຕ້ານ ແລະ ສະກັດກັ້ນໂລກລະບາດຂອງພະຍາດໂຄວິດ-19, ມີເສດຖະກິດທີ່ເຂັ້ມແຂງ, ຊີວິດການເປັນຢູ່ຂອງປະຊາຊົນທາງດ້ານວັດຖຸ ແລະ ຈິດໃຈນັບມື້ສູງຂຶ້ນເປັນກ້າວໆ.

ໃນນາມປະຊາຊົນອ້າຍນ້ອງຂອງຫວຽດນາມ, ໃນນາມເປັນເພື່ອນມິດສະຫາຍທີ່ໃກ້ຄຽງ ແລະ ຮັກແພງສະໜິດສະໜົມ. ປະຊາຊົນລາວຂໍສະແດງຄວາມເບີກບານມ່ວນຊື່ນຮ່ວມກັບປະຊາຊົນຫວຽດນາມອ້າຍນ້ອງໃນການສະເຫຼີມສະຫຼອງວັນຊາດທີ 2 ກັນຍາຄົບຮອບ 75 ປີໃນປີນີ້ຢ່າງສຸດໃຈ, ອວຍພອນໃຫ້ຊາດຫວຽດນາມຈົ່ງໄດ້ຮັບໄຊຊະນະເປັນກ້າວໆໃນການສ້າງສາພັດທະນາປະເທດຊາດ, ມີຜົນສຳເລັດໃນການສ້າງເສດຖະກິດ-ວັດທະນະທຳສັງຄົມ ເພື່ອຈຸດໝາຍປະເທດຊາດເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມຍຸຕິທຳສີວິໄລ.

ຂ່າວ: ລູກເມືອງພວນ.