ເຈົ້າໜ້າທີ່ຮຽກຮ້ອງໃຫ້ຜູ້ເສຍຫາຍທີ່ຫລົງເຊື່ອຫລິ້ນຫວຍອອນລາຍທາງເຟສບຸກນຳນາງເຈີ້ນຊ່ວຍເຂົ້າມາໃຫ້ການສະໜອງຂໍ້ມູນຫລັກຖານ

ກົມຕໍາຫລວດເສດຖະກິດ ກະຊວງປ້ອງກັນຄວາມສະຫງົບ ໄດ້ອອກແຈ້ງການໃນວັນທີ 24 ສິງຫາຜ່ານມາ, ເຖິງປະຊາຊົນທຸກຊັ້ນຄົນ ແລະ ບັນດາທ່ານຜູ້ເສຍຫາຍທີ່ໄດ້ຫລົງເຊື່ອຫລິ້ນຫວຍອອນລາຍທາງເຟສບຸກ ນໍານາງ ລັດສະນີພອນ ມະໂນລົມ (ເຈີ້ນ) ໃນຂອບເຂດທົ່ວປະເທດ, ໂດຍໃຫ້ຜູ້ເສຍຫາຍທີ່ບໍ່ທັນແຈ້ງຄວາມ ຫລື ແຈ້ງຄວາມແລ້ວຊ່ວຍເຂົ້າມາໃຫ້ການ ແລະ ສະໜອງຂໍ້ມູນຫລັກຖານຕໍ່ເຈົ້າໜ້າທີ່ກົມຕໍາຫລວດເສດຖະກິດ (ກົມໃຫ່ຍຕໍາຫລວດ) ນະຄອນຫລວງວຽງຈັນ.

ອີງຕາມກົດໝາຍວ່າດ້ວຍການດໍາເນີນຄະດີ ອາຍາ ແຫ່ງ ສປປ ລາວ, ອີງຕາມ ຄໍາສັ່ງຕໍ່ກໍານົດເວລາການ ສືບສວນ-ສອບສວນ ຕໍ່ນາງ ລັດສະນິພອນ ມະໂນລົມ ສະບັບເລກທີ່, 20/ອຍກ.ນວ, ລົງວັນທີ 19/08/2020, ອີງຕາມ ຄໍາສັ່ງຕໍ່ການກັກຂັງພາງຂອງຫົວໜ້າອົງການໄອຍະການປະຊາຊົນນະຄອນ ຫລວງວຽງຈັນ ສະບັບ ເລກທີ 16D/ອຍກ.ນວ, ລົງວັນທີ 19/08/2020, ອີງຕາມ ສະພາບຄວາມເປັນຈີງໃນການດໍາເນີນການ ສືບສວນ-ສອບສວນ ເອົາຄໍາໃຫ້ການຜູ້ເສຍຫາຍ ຕາມກົດໝາຍ.

ຜ່ານການ ສືບສວນ-ສອບສວນ, ເກັບກໍາຂໍ້ມູນຫລັກຖານ ແລະ ໄດ້ເອົາຄ່າໃຫ້ການຂອງຜູ້ເສຍຫາຍຈໍານວນໜຶ່ງ ແຕ່ຍ້ອນວ່າ: ຍັງມີຜູ້ເສຍຫາຍຈໍານວນຫລວງຫລາຍ ໃນຂອບເຂດທົ່ວປະເທດ ຍັງບໍ່ທັນເຂົ້າມາລາຍງານ ຫລື ແຈ້ງຄວາມນໍາເຈົ້າໜ້າທີ່ເທື່ອ ເພື່ອປົກປ້ອງຜົນປະໂຫຍດຂອງຜູ້ເສຍຫາຍ ແລະ ຮັບປະກັນການດໍາເນີນຄະດີໃຫ້ຖືກຕ້ອງຕາມກົດໝາຍ ຫົວໜ້າກົມຕໍາຫລວດເສດຖະກິດ ຈຶ່ງໄດ້ອອກແຈ້ງການດັ່ງນີ້:

1, ໃຫ້ຜູ້ເສຍຫາຍທີ່ໄດ້ຂຽນຄໍາຮ້ອງຟ້ອງຕໍ່ ນາງ ລັດສະນີພອນ ມະໂນລົມ (ເຈີ້ນ) ແລ້ວ ແຕ່ຍັງບໍ່ທັນໄດ້ເຂົ້າມາລາຍງານ (ໃຫ້ປາກຄໍາ) ຊ່ວຍເຂົ້າມາໃຫ້ການ ແລະ ສະໜອງຂໍ້ມູນຫລັກຖານໃຫ້ເຈົ້າໜ້າທີ່ຕໍາຫລວດ (ກົມຕໍາຫລວດເສດຖະກິດ) ເພື່ອປະກອບໃສ່ສໍານວນຄະດີໃຫ້ທັນເວລາ, ໃນໂມງລັດຖະການນັບແຕ່ມື້ໄດ້ຮັບແຈ້ງການເປັນຕົ້ນໄປ.

2, ຕໍ່ກັບຜູ້ເສຍຫາຍທີ່ໄດ້ຫລົງເຊື່ອຫລິ້ນຫວຍອອນລາຍນຳ ນາງ ລັດສະນີພອນ ມະໂນລົມ ທີ່ຍັງບໍ່ທັນໄດ້ ຂຽນຄຳຮ້ອງຟ້ອງ ຫລື ແຈ້ງຄວາມຫາເຈົ້າໜ້າທີ່ໃຫ້ຮີບຮ້ອນເຂົ້າມາຮ້ອງຟ້ອງ ຫລື ແຈ້ງຄວາມຕໍ່ເຈົ້າໜ້າທີ່ກົມຕໍາຫລວດ ເສດຖະກິດ ໂດຍດ່ວນ.

3, ກໍານົດເວລາຮັບບັນທຶກຄໍາໃຫ້ການ, ຮັບຄໍາຮ້ອງຟ້ອງ ແລະ ຮັບແຈ້ງຄວາມ ແມ່ນບໍ່ໃຫ້ກາຍ ວັນທີ 16 ກັນຍາ 2020 ເພື່ອໃຫ້ເຈົ້າໜ້າທີ່ກົມຕໍາຫລວດເສດຖະກິດ ທີ່ຮັບແຈ້ງຄວາມໄດ້ສັງລວມເຂົ້າໃນບົດສະຫລຸບຄະດີໃຫ້ທັນຕາມກໍານົດເວລາ.

ດັ່ງນັ້ນ; ກົມຕໍາຫລວດເສດຖະກິດ ຈຶ່ງອອກແຈ້ງການມາຍັງຜູ້ເສຍຫາຍທີ່ໄດ້ຫຼົງເຊື່ອຫລິ້ນຫວຍອອນລາຍ ລົງທາງເຟສບຸກ ນໍານາງ ລັດສະນິພອນ ມະໂນລົມ ໃນຂອບເຂດທົ່ວປະເທດ ເພື່ອຊາບ ແລະ ຈັດຕັ້ງປະຕິບັດຕາມ ແຈ້ງການນີ້ຢ່າງເຂັ້ມງວດ.

ເຊິ່ງໃນເດືອນຕົ້ນເດືອນມິຖຸນາຜ່ານມາ, ຮອງຫົວໜ້າກອງບັນຊາການ ປກສ ເມືອງສີໂຄດຕະບອງ ນະຄອນຫລວງວຽງຈັນ ໃຫ້ຮູ້ວ່າ: ພາຍຫລັງໄດ້ຮັບຄໍາຮ້ອງຟ້ອງຈາກປະຊາຊົນຈໍານວນໜຶ່ງ ເລື່ອງການສໍ້ໂກງຊັບພົນລະເມືອງ, ຈາກນັ້ນເຈົ້າໜ້າຈຶ່ງໄດ້ລົງກວດກາ ແລະ ເກັບກໍາຂໍ້ມູນຫລັກຖານຕົວຈິງ ເຊິ່ງເຫັນວ່າຄົບອົງປະກອບໃນການດຳເນີນຄະດີ ຈຶ່ງໄດ້ກັກຕົວນາງ ລັດສະນິພອນ (ເຈີ້ນ) ອາຍຸ 30 ປີ, ອາຊີບຄ້າຂາຍ ຢູ່ບ້ານ ໂພນຄໍາ ເມືອງສີໂຄດຕະບອງ ນະຄອນຫລວງວຽງຈັນ ມາດໍາເນີນຄະດີ, ຊຶ່ງຜ່ານການສືບສວນ-ສອບສວນນາງ ລັດສະນີພອນ ຮັບສາລະພາບວ່າ: ໄດ້ສໍ້ໂກງຊັບພົນລະເມືອງແທ້ ດ້ວຍການເປີດໂຄສະນາຫລິ້ນຫວຍທາງອອນລາຍຜ່ານເຟສບຸກມາແຕ່ຕົ້ນເດືອນ ພະຈິກ 2019, ເພື່ອ ດຶງດູດຄົນມາຫລິ້ນ ນັບແຕ່ 25 ລ້ານກີບ, 50 ລ້ານກີບ ແລະ 100 ລ້ານກີບ ໂດຍຈະໄດ້ຮັບເງິນກຳໄລສູງເຮັດໃຫ້ມີປະຊາຊົນຫລົງເຊື່ອມາຫລິ້ນເປັນຈໍານວນຫລາຍ ແລະ ໄດ້ໂອນເງິນເຂົ້າບັນຊີທະນາຄານຂອງຜູ້ກ່ຽວ. ຈາກນັ້ນ, ກໍໃຫ້ລູກຫວຍເປຍຫວຍໃສ່ດອກເບ້ຍ, ເມື່ອລູກຫວຍເປຍໄດ້ ຜູ້ກ່ຽວພັດບໍ່ຈ່າຍເງິນໃຫ້ລູກຫວຍ; ເຊິ່ງລວມມີຍອດເງິນທີ່ຜູ້ກ່ຽວໂກງໄປຫລາຍກ່ວາ 1.500 ລ້ານກີບ.

ພັນໂທ ສອນເພັດ ວິຈິດ ຮອງຫົວໜ້າ ປກສ ເມືອງໃຫ້ຮູ້ຕື່ມວ່າ: ປັດຈຸບັນຜູ້ເສຍຫາຍໄດ້ເຂົ້າມາແຈ້ງຄວາມແລ້ວ 7 ຄົນ ໃນຈໍານວນຜູ້ຕົກເປັນເຫຍື່ອນັບຫລາຍຮ້ອຍຄົນ ສ່ວນຜົນເສຍຫາຍທັງຫມົດຍັງຢູ່ໃນການສືບສວນ-ສອບສວນຂອງເຈົ້າໜ້າທີ່ ແລະ ກຳລັງ ສືບຕໍ່ຂະຫຍາຍຜົນ ຫາກຸ່ມແກ້ງພວກຮ່ວມຂະບວນການ ມາດໍາເນີນຄະດີຕາມລະບຽບກົດໝາຍ.