ພົນລະເມືອງຫວຽດນາມຈຳນວນເກືອບ 350 ຄົນຈາກເອີຣົບ ແລະ ອາຟຣິກກາໄດ້ກັບຄືນປະເທດ
ໃນເວລາ 2 ມື້ແຕ່ວັນທີ 26 – 27 ສິງຫາ, ບັນດາອົງການທີ່ມີໜ້າທີ່ຫວຽດນາມ, ບັນດາສຳນັກງານຜູ້ຕາງໜ້າຫວຽດນາມຢູ່ເອີຣົບ ແລະ ອາຟຣິກກາ ພ້ອມກັບບໍລິສັດການບິນແຫ່ງຊາດຫວຽດນາມ ໄດ້ຮ່ວມມືກັບບັນດາອົງການທີ່ມີໜ້າທີ່ຂອງປະເທດທີ່ກ່ຽວຂ້ອງ ເພື່ອໄດ້ນຳສົ່ງພົນລະເມືອງຫວຽດນາມ ຈຳນວນເກືອບ 350 ຄົນກັບຄືນປະເທດຢ່າງປອດໄພ.
ຜູ້ໂດຍສານໃນຖ້ຽວບິນມາຈາກ 20 ກວ່າປະເທດ, ແມ່ນບັນດາຜູ້ທີ່ຖືກຕິດຄ້າງຍ້ອນການລະບາດຂອງພະຍາດ COVID-19 ແລະ ກໍລະນີທີ່ປະສົບຄວາມຫຍຸ້ງຍາກໂດຍສະເພາະ, ເຊັ່ນ: ແມ່ຍິງຖືພາ, ເດັກນ້ອຍອາຍຸຕໍ່າກວ່າ 18 ປີ, ຄົນເຈັບປ່ວຍໜັກ, ແລະ ຜູ້ອອກແຮງງານໝົດກຳນົດວີຊາ ຫຼື ສັນຍາແຮງງານ, ນັກຮຽນທີ່ບໍ່ມີບ່ອນຢູ່ອາໄສ ຍ້ອນຫໍພັກອັດປະຕູ.
ນສະພາບການລະບາດຂອງພະຍາດ COVID-19 ທີ່ເຮັດໃຫ້ການເດີນທາງໄປມາປະສົບກັບຄວາມຫຍຸ້ງຍາກ, ຄະນະຜູ້ຕາງໜ້າຫວຽດນາມ ໄດ້ແນະນຳ ພົນລະເມືອງກ່ຽວກັບລະບຽບການທີ່ຈຳເປັນ, ຮຽກຮ້ອງໃຫ້ບັນດາອົງການທີ່ມີໜ້າທີ່ທ້ອງຖິ່ນ ສ້າງເງື່ອນໄຂສະດວກເພື່ອນຳສົ່ງພົນລະເມືອງຫວຽດນາມ ໄປສະໜາມບິນ Frankfurt, ເຢຍລະມັນ. ສະຖານກົງສຸນໃຫຍ່ຫວຽດນາມ ປະຈຳນະຄອນ Frankfurt ໄດ້ສົ່ງພະນັກງານໂດຍກົງປະຕິບັດປະສານງານ ກັບສາຍການບິນແຫ່ງຊາດຫວຽດນາມ Vietnam Airlines ຢູ່ສະໜາມບິນ ເພື່ອໄດ້ສະໜັບສະໜູນຢ່າງຕັ້ງໜ້າ, ແນະນຳພົນລະເມືອງໃຫ້ສຳເລັດຂັ້ນຕອນລະບຽບການຂຶ້ນບິນ.
ດ້ວຍເປົ້າໝາຍຮັບປະກັນດ້ານສຸຂະພາບຂອງພົນລະເມືອງ, ປ້ອງກັນການແຜ່ລະບາດຂອງພະຍາດ COVID-19, ສາຍການບິນແຫ່ງຊາດຫວຽດນາມ Vietnam Airlines ໄດ້ປະຕິບັດມາດຕະການຕ່າງໆກ່ຽວກັບຄວາມປອດໄພ, ຄວາມໝັ້ນຄົງ, ປ້ອງກັນ ແລະ ຕ້ານພະຍາດລະບາດ ໃນຕະຫຼອດການບິນ. ທັນທີຫຼັງຈາກລົງຈອດຢູ່ສະໜາມບິນສາກົນ ເຕີນເຊີນຍຶດ, ຜູ້ໂດຍສານທຸກຄົນ ໄດ້ກວດສອບທາງການແພດ ແລະ ປະຕິບັດການແຍກຫ່າງ ຕາມລະບຽບການທີ່ໄດ້ກຳນົດໄວ້.
ຫວຽດນາມຈະສືບຕໍ່ປະຕິບັດບັນດາຖ້ຽວບິນ ເພື່ອນຳສົ່ງພົນລະເມືອງກັບຄືນປະເທດ, ໂດຍອີງໃສ່ການຜັນແປຂອງພະຍາດໃນປະເທດ ແລະ ທົ່ວໂລກ, ຄວາມປາຖະໜາຂອງພົນລະເມືອງ ແລະ ຄວາມສາມາດໃນການແຍກຫ່າງຂອງທ້ອງຖິ່ນ.
