ການຕອບໂຕ້ຕໍ່ເຊື້ອເຮສໄອວີ ຢູ່ ສປປ ລາວ ຍັງມີສິ່ງທ້າທາຍຫລາຍດ້ານ
ປັດຈຸບັນ ອົງການຈັດຕັ້ງສາກົນ, ຜູ້ໃຫ້ທຶນສະໜັບສະໜູນງົບປະມານ ເຂົ້າໃນວຽກງານຕ້ານເອດ ນັບມື້ໜ້ອຍລົງ, ເຊິ່ງເຮັດໃຫ້ ສປປ ລາວ ປະສົບຂໍ້ຫຍຸ້ງຍາກ ແລະ ສິ່ງທ້າທາຍຫລາຍດ້ານ ໂດຍສະເພາະ ດ້ານງົບປະມານ ແລະ ດ້ານການຕອບໂຕ້ຕໍ່ເຊື້ອເຮສໄອວີ/ພະຍາດເອດ ເປັນຕົ້ນ ແຮງງານເຄື່ອນຍ້າຍຍັງມີຫລາຍ, ເຮັດໃຫ້ມີຄວາມສ່ຽງຕໍ່ການຕິດເຊື້ອເຮສໄອວີ, ເຊິ່ງແຕ່ລະປີຍັງມີຜູ້ຕິດເຊື້ອຫລາຍກວ່າ 1 ພັນຄົນ, ຜູ້ຊາຍທີ່ມີເພດສຳພັນກັບຊາຍຍັງຕິດເຊື້ອສູງ, ການສົ່ງເຊື້ອຈາກແມ່ຫາລູກກໍເຫັນວ່າມີທ່າອ່ຽງສູງຂຶ້ນ, ນ້ຳຢາກວດເລືອດຊອກຫາການຕິດເຊື້ອເຮສໄອວີ ຍັງບໍ່ທັນພຽງພໍ, ຜູ້ຕິດເຊື້ອເຮສໄອວີ ແລະ ຜູ້ເປັນພະຍາດເອດ ຍັງຂາດການຕິດຕາມຫລາຍ ແລະ ການກິນຢາກໍບໍ່ທັນຕໍ່ເນື່ອງ ແລະ ເປັນປົກກະຕິ, ຍ້ອນມີຂໍ້ຫຍຸ້ງຍາກດ້ານສະພາບພະຍາດໂຄວິດ-19 ແລະ ຂາດງົບປະ ມານມາຮັບການບໍລິການກວດສຸຂະພາບ ແລະ ມາຮັບຢາ, ເຊິ່ງເຮັດໃຫ້ແຕ່ລະປີມີຜູ້ຕ້ອງການປິ່ນປົວດ້ວຍຢາ ARV (ຢາປົວເຊື້ອເຮສໄອວີ) ຫລາຍກວ່າ 7 ພັນຄົນ.
ນອກຈາກນີ້, ການເຂົ້າເຖິງກຸ່ມທີ່ມີຄວາມສ່ຽງມີຄວາມຫຍຸ້ງຍາກ, ຄວາມຮູ້ຄວາມເຂົ້າໃຈກ່ຽວກັບເຊື້ອເຮສໄອວີ ແລະ ພະຍາດເອດຂອງສັງຄົມ, ຊຸມຊົນ ແລະ ບຸກຄົນຍັງບໍ່ທັນສູງ, ການມີສ່ວນຮ່ວມຂອງພາກສ່ວນທີ່ກ່ຽວຂ້ອງ ທັງພາກລັດ ແລະ ເອກະຊົນຍັງບໍ່ທັນສູງ. ພ້ອມນີ້, ການຈໍາແນກ, ລັງກຽດຜູ້ຕິດເຊື້ອດັ່ງກ່າວ ຍັງມີຢູ່ໃນສັງຄົມ, ຊຸມຊົນ, ຜູ້ບໍລິການ ແລະ ຜູ້ຮັບບໍລິການ, ພະນັກງານທີ່ເຮັດວຽກງານຍັງບໍ່ພຽງພໍ.
ຈຳນວນສະສົມຜູ້ຕິດເຊື້ອເຮສໄອວີ ແລະ ເປັນພະຍາດເອດ ໃນທົ່ວປະເທດແຕ່ປີ 1990 ເຖິງເດືອນມິຖຸນາ 2020 ມີທັງໝົດ 20.372 ຄົນ, ໃນນີ້ຜູ້ຕິດເຊື້ອເຮສໄອວີ ມີ 14.460 ຄົນ, ຜູ້ເປັນພະ ຍາດເອດ 5.912 ຄົນ ແລະ ເສຍຊີວິດແລ້ວ 4.760 ຄົນ, ຜູ້ຕິດເຊື້ອສ່ວນຫລາຍແມ່ນອາຊີບເປັນກຳມະກອນທົ່ວໄປ, ແມ່ເຮືອນ, ຊາວນາ, ພະນັກງານ, ກຸ່ມເຄື່ອນຍ້າຍ, ຄ້າຂາຍ, ທຸລະກິດ, ນັກຮຽນ ແລະ ອື່ນໆ, ເຊິ່ງຢູ່ໃນເກນອາຍຸລະຫວ່າງ 20-50 ປີ ແລະ ແຂວງທີ່ມີຈໍານວນຜູ້ຕິດເຊື້ອຫລາຍກວ່າໝູ່ແມ່ນ ນະຄອນຫລວງວຽງຈັນ, ໄຊສົມບູນ ແລະ ແຂວງ ຫົວພັນ.
ຂໍ້ມູນດັ່ງກ່າວ, ລາຍງານໂດຍ ທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາ ທາລະນະສຸກ, ທັງເປັນປະທານຄະນະກໍາມະການແຫ່ງຊາດຕ້ານເອດ ໃນກອງປະຊຸມຄົບຄະນະ ຂອງຄະນະກຳມະການແຫ່ງຊາດຕ້ານເອດ, ເຊິ່ງໄດ້ຈັດຂຶ້ນໃນວັນທີ 27 ສິງຫາ 2020 ທີ່ໂຮງແຮມດອນຈັນພາເລດ ນະຄອນຫລວງວຽງຈັນ, ໂດຍການເປັນປະທານຮ່ວມຂອງທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ມີບັນດາຄະນະກຳມະການແຫ່ງຊາດຕ້ານເອດ ເຂົ້າຮ່ວມ. ກອງປະຊຸມຄັ້ງນີ້, ມີຈຸດປະສົງເພື່ອທົບທວນຄືນຄວາມຄືບໜ້າ ໃນການຈັດຕັ້ງປະຕິບັດວຽກງານສະກັດກັ້ນ ແລະ ຕ້ານເຊື້ອເຮສໄອວີ/ພະຍາດເອດ ໃນໄລຍະ 6 ເດືອນຕົ້ນປີ 2020 ແລະ ພ້ອມກັນຄົ້ນຄວ້າຊີ້ນໍາ-ນຳພາ ຮ່າງແຜນຍຸດທະສາດແຫ່ງຊາດ ຕ້ານເອດ 10 ປີ (2021-2030) ແລະ ແຜນ 5 ປີ (2021-2025).
