ເຊວຊີ ຄວ້າຕົວ ເບນ ຊິວເວວ ດ້ວຍຄ່າຕົວ 50 ລ້ານປອນເຂົ້າຮ່ວມທັບ

ສິງໂຕນຳເງິນຄາມ ເຊວຊີ ທີມຍັກໃຫຍ່ແຫ່ງເວທີພຣິີເມຍລີກອັງກິດ ໄດ້ຄວ້າຕົວ ເບນ ຊິວເວວ ໄວ 23 ປີແບັກຊ້າຍທີມຊາດອັງກິດ ຈາກ ເລສເຕີ້ ຊິຕີ້ ດ້ວຍຄ່າຕົວສູງເຖີງ 50 ລ້ານປອນ ພ້ອມສັນຍາຍາວ 5 ປີເຖີງ 2025. ຫຼັງຈາກຈົບການແຂ່ງຂັນພຣີເມຍລີກອັງກິດລະດູການ 2019-20 ເຊວຊີສາມາດຍາດໄດ້ອັນດັບ 4 ມີສິດໄປແຂ່ງຂັນຢູຟ້າແຊ້ມປ້ຽນລີກ ລະດູການໜ້າເຮັດໃຫ້ ແຟງແລມພາດ ຄູຝຶກຂອງທີມຕ້ອງໄດ້ເສີມນັກເຕະເພື່ອຍົກລະດັບໃຫ້ປະສົບຜົນສຳເລັດໃນລະດູການທີ່ຈະມາເຖິງນີ້.

ຫຼັງຈາກຈົບການແຂ່ງຂັນພຣີເມຍລີກອັງກິດເຊວຊີກໍ່ເດີນໜ້າເສີມທັບຊື້ນັກເຕະໃໝ່ເຂົ້າທີມໄດ້ 3 ຄົນເຊັ່ນ: ຮາຄິມ ຊິເຍັກ,ຕິໂມ ເເວເນີ ແລະ ຄົນຫຼ້າສຸດຄື ເບນ ຊິວເວວ. ບໍ່ພໍພຽງເທົ່ານັ້ນ ເຊວຊີຍັງມີຂ່າວວ່າໃກ້ຈະຄວ້າຕົວນັກເຕະໃໝ່ຄື ໄຄ ຮາເວິດ ກອງໜ້າຂອງ ໄບເອີ ເລເວີຄູເຊນ ດ້ວຍຄ່າຕົວລວມຫຼາຍກວ່າຮ້ອຍລ້ານເອີໂຣ ແລະ ຕິອາໂກ ຊິນວາ ກອງຫຼັງປະສົບການສູງທີ່ຫາກໍ່ໝົດສັນຍາກັບ ປາຣີສ ແຊງແຊ໋ກແມງ ຫຼັງຈາກຈົບການແຂ່ງຂັນຢູຟ້າແຊ້ມປ້ຽນລີກທີ່ຜ່ານມາ