ລັດຖະມົນຕີ ມາເລເຊຍ ຖືກປັບໃໝ ຍ້ອນບໍ່ຮັກສາໄລຍະຫ່າງທາງສັງຄົມ
ແຫຼ່ງຂ່າວຈາກ vietnamnet, ໂດຍອ້າງອີງແຫຼ່ງຂ່າວຈາກ ໜັງສືພິມ ໄປສະນີພາກໃຕ້ຂອງຈີນ, ວັນທີ 23 ສິງຫານີ້ໃຫ້ຮູ້ວ່າ: ລັດຖະມົນຕີອຸດສາຫະກຳການປູກຝັງ ແລະ ສິນຄ້າຂອງມາເລເຊຍ, ທ່ານ Khairuddin Aman Razali, ຖືກປັບໃໝພຽງແຕ່ 1.000 ຣິງກິດ(ສະກຸນເງິນມາເລເຊຍ) ຫຼື ປະມານ 2 ລ້ານກີບ ຊຶ່ງເປັນອັດຕາການປັບໃໝໜ້ອຍກ່ວາປະຊາຊົນທຳມະດາ.
ທ່ານ Razali ໄປປະຊຸມຢູ່ຕຸກກີ ເປັນເວລາ 5 ວັນ ກັບຄືນມາໃນວັນທີ 7 ກໍລະກົດ ແຕ່ບໍ່ຖືກກັກຕົວໃນບໍລິເວນ.
ຕົ້ນເດືອນສິງຫານີ້, ມີພົນລະເມືອງຊາວມາເລເຊຍຖືກປັບໃໝ 8.000 ຣິງກິດ ແລະ ຖືກກັກຕົວເປັນເວລາ 1 ວັນ ຍ້ອນບໍ່ກັກຕົວ. ນອກຈາກນັ້ນ, ຍັງມີເຈົ້າຂອງຮ້ານອາຫານແຫ່ງໜຶ່ງ ຊຶ່ງຕິດເຊື້ອໂຄວິດ-19 ແຕ່ບໍ່ກັກຕົວ ອັນໄດ້ຕິດຕໍ່ເຊື້ອໃສ່ຊຸມຊົນຖືກປັບໃໝ 12.000 ຣິງກິດ ແລະ ຖືກກັກຂັງເປັນເວລາ 5 ເດືອນ.
ອີງຕາມມາດຕະການຕ້ານການແຜ່ລະບາດຂອງພະຍາດໂຄວິດ-19 ຂອງມາເລເຊຍ, ຜູ້ທີ່ກັບມາແຕ່ຕ່າງປະເທດຕ້ອງໄດ້ກັກຕົວເປັນເວລາ 14 ວັນ ແລະ ຕ້ອງໄດ້ກວດຫາເຊື້ອຢ່າງໜ້ອຍ 2 ຄັ້ງ.
ເຈົ້າໜ້າທີ່ມາເລເຊຍໃຫ້ຮູ້ວ່າ: ກໍລະນີຂອງທ່ານ ລັດຖະມົນຕີຄົນດັ່ງກ່າວຍັງຈະຖືກສືບສວນສອບສວນອີກຕໍ່ໄປ.
ຂ່າວ: ລູກເມືອງພວນ.
