ຂໍ້ຫ້າມຂອງນັກຂັບຂີ່ ແລະ ຜູ້ໃຊ້ຖະໜົນຫົນທາງ

ເພື່ອເປັນການທວນຄືນເຕືອນສະຕິໃຫ້ບັນດານັກຂັບຂີ່ເປັນເຈົ້າການໃນການຈັດຕັ້ງປະຕິບັດກົດລະບຽບການສັນຈອນຢ່າງເຂັ້ມງວດ.

ດັ່ງນັ້ນ, ຈຶ່ງຂໍນໍາສະເໜີຄືນໃໝ່ກ່ຽວກັບຂໍ້ຫ້າມສໍາລັບຜູ້ນໍາໃຊ້ເສັ້ນທາງທີ່ລະບຸໃນມາດຕາ 51 ຂອງກົດໝາຍຈະລາຈອນທາງບົກມາໃຫ້ບັນດາເພື່ອນຜູ້ອ່ານທັງຮູ້ແລ້ວ ແລະ ຍັງບໍ່ທັນຮູ້ລະອຽດນໍາໄປຈັດຕັ້ງປະຕິບັດ ເພື່ອສ້າງຄວາມເປັນລະບຽບຮຽບຮ້ອຍ ຕາມຖະໜົນຫົນທາງ ກ້າວໄປສູ່ການຫລຸດຜ່ອນການເກີດອຸບັດເຫດ.

ໃນມາດຕາດັ່ງກ່າວຫ້າມຜູ້ໃຊ້ເສັ້ນທາງມີພຶດຕິກໍາດັ່ງນີ້: ຫ້າມຂັບຂີ່ໃນສະພາບມຶນເມົາ, ຂັບຂີ່ພາຫະນະໄວເກີນກໍານົດ, ຂັບເຈີດຊ້າຍ, ເຈີດຂວາ, ຊ່ວງຊີງຍານພາຫະນະອື່ນໆດ້ວຍຄວາມປະໝາດ ແລະ ບໍ່ຖືກກົດຈະລາຈອນ, ໃຊ້ໂທລະສັບມືຖື ແລະ ເຄື່ອງຫລິ້ນເອເລັກໂຕຣນິກປະເພດຕ່າງໆໃນເວລາຍ່າງຂ້າມທາງ, ໃຊ້ໂທລະສັບມືຖືເບິ່ງໂທລະພາບ, ຮູບພາບ VCD DVD ເຄື່ອງປິ່ນເອເລັກໂຕຣນິກປະເພດຕ່າງໆໃນເວລາຂັບຂີ່, ຍ່າງຮຽງກັນເປັນໜ້າ ກະດານເປັນພຶງເປັນແພທີ່ກີດຂວາງການສັນຈອນ, ກັ້ງຄັນຮົ່ມເວລາຂັບຂີ່ລົດຈັກ-ລົດຖີບ, ບັນທຸກຜູ້ໂດຍສານເກີນຈຳນວນສິນຄ້າເກີນນ້ຳໜັກ ແລະ ຂະໜາດທີ່ກໍານົດ, ບັນທຸກວັດຖຸອັນຕະລາຍໂດຍບໍ່ໄດ້ຮັບອະນຸຍາດສ້ອມແປງຍານພາຫະນະຢູ່ກາງທາງ, ກາງຂົວ, ເປີດເຄື່ອງສຽງດັງເກີນກໍານົດໃນເວລາຂັບຂີ່, ແຂ່ງລົດທຸກຊະນິດຕາມເສັ້ນທາງໂດຍບໍ່ໄດ້ຮັບອະນຸຍາດ, ປະຖ່ອນໄມ້ ຟົດໄມ້ ກ້ອນຫີນ ຫລື ສິ່ງກີດຂວາງອື່ນໆທີ່ໜູນຕີດລົດໄວ້ຕາມເສັ້ນທາງ ແລະ ພຶດຕິກໍາອື່ນໆທີ່ເປັນການລະເມີດລະບຽບກົດໝາຍ.

ນັ້ນຖືວ່າເປັນຂໍ້ຫ້າມທີ່ໄດ້ກໍານົດໄວ້ໃນກົດໝາຍຢ່າງຈະແຈ້ງ ແລະ ໃນບັນດາຂໍ້ຫ້າມນັ້ນທຸກທ່ານກໍຈະພົບເຫັນໄດ້ໃນຊີວິດປະຈໍາວັນ, ເຊິ່ງການປະຕິບົດກັບຂໍ້ຫ້າມທີ່ລະບຸໄວ້ນັ້ນສິ່ງທີ່ຕາມມາກໍຄືການເກີດອຸບັດເຫດ ສິ່ງທີ່ເຫັນໄດ້ໃນສື່ຕ່າງໆຢູ່ເປັນປະຈໍານັ້ນ ກໍຄືການດື່ມສິ່ງມຶນເມົາແລ້ວຂັບຂີ່, ຂັບຂີ່ໄວເກີນກໍານົດ ແລະ ອື່ນໆ. ນອກຈາກບັນດາຂໍ້ຫ້າມທີ່ກ່າວມາຂ້າງເທິງນັ້ນແລ້ວສິ່ງສໍາຄັນກໍຄືນັກຂັບຂີ່ເອງກໍຕ້ອງມີສະຕິໃນການຂັບຂີ່ ກໍຄືມີສະຕິຕໍ່ລະບຽບກົດໝາຍ, ລະບຽບການສັນຈອນ, ບັນດານິຕິກໍາກຸ່ມກົດໝາຍ ເຊິ່ງເປັນປັດໄຈສໍາຄັນ ເພື່ອເຮັດໃຫ້ການສັນຈອນໃນຂອບເຂດທົ່ວປະເທດ ໂດຍສະເພາະນະຄອນຫລວງວຽງຈັນມີຄວາມເປັນລະບຽບຮຽບຮ້ອຍ.