ອົງການອະນາໄມໂລກ ຊີ້ກຸ່ມເປົ້າໝາຍແຜ່ເຊື້ອໂຄວິດ-19
ສຳນັກຂ່າວ vnnet, ວັນທີ 19 ສິງຫານີ້ໃຫ້ຮູ້ວ່າ: ອົງການອະນາໄມໂລກໃຫ້ຮູ້ວ່າ: ກຸ່ມຄົນທີ່ມີອາຍຸແຕ່ 20,30,40 ເປັນກຸ່ມແຜ່ເຊື້ອໄວຣັສໂຄໂຣນາເປັນວົງກວ້າງ.
ກຸ່ມເປົ້າໝາຍອາຍຸຂ້າງເທິງ ເຂົາບໍ່ຮູ້ສຶກຕົວວ່າຕົນເອງຕິດເຊື້ອ ແລ້ວນຳໄປແຜ່ໃສ່ກຸ່ມຄົນເຖົ້າ, ຜູ້ສຸຂະພາບອ່ອນເພຍ…ທ່ານ ຫົວໜ້າອົງການອະນາໄມໂລກປະຈຳພາກພື້ນປາຊີຟິກ, ທ່ານ Takeshi Kasai ໃຫ້ຮູ້ເພີ່ມເຕີມວ່າ: “ພວກເຂົາຕິດເຊື້ອໄວຣັສ ແຕ່ພວກເຂົາບໍ່ສະແດງອາການອອກມາ ຫຼື ເກືອບເອີ້ນວ່າບໍ່ຕິດເລີຍກໍວ່າໄດ້. ບັນຫານີ້ ໄດ້ນຳເອົາເຊື້ອໄປໃສ່ກັບຄົນອື່ນ ໂດຍບໍ່ຮູ້ສຶກຕົວ”. ດັ່ງນັ້ນ, ຜູ້ທີ່ຍັງມີອາຍຸໜຸ່ມນ້ອຍຕ້ອງລະມັດລະວັງຕໍ່ທຸກອາການທີ່ສະແດງອອກຂອງຕົນ ເຖິງແມ່ນຈະເປັນອາການນ້ອຍໆກໍຕາມ. ພວກເຮົາຈົ່ງພ້ອມກັນເປັນເຈົ້າການເພື່ອປ້ອງກັນການແຜ່ລະບາດຂອງມັນ.
ໃນຄວາມເປັນຈິງແລ້ວ 65% ຂອງຈຳນວນຜູ້ຕິດເຊື້ອໂຄວິດ-19ໃນຍີ່ປຸ່ນໃນລະຫວ່າງເດືອນກໍລະກົດ ແລະ ສິງຫາ ນັ້ນ ລ້ວນແຕ່ແມ່ນຜູ້ທີ່ຢູ່ໃນເກນອາຍຸຕໍ່າກວ່າ 40 ປີ. ທ່ານນາງ Matsui ກ່າວວ່າ: “ບັນຫາດັ່ງກ່າວໜ້າເປັນຫ່ວງຫຼາຍ ເພາະຜູ້ທີ່ຕິດເຊື້ອໃນສໍ່າອາຍຸດັ່ງກ່າວລ້ວນແຕ່ມີອາການເບົາທີ່ສຸດ ຫຼື ເກືອບວ່າບໍ່ສະແດງອອກເລີຍກໍວ່າໄດ້”.
ຂ່າວ: ລູກເມືອງພວນ.
