ສ.ເກົາຫລີ ເຕືອນໂຄວິດ-19 ຮອບໃໝ່ ຜູ້ຕິດເຊື້ອເພີ່ມສູງສຸດໃນຮອບ 5 ເດືອນ ສ່ວນຫລາຍເຊື່ອມໂຍງໂບດໃນນະຄອນຫລວງເຊອຸນ
ທາງການ ສ.ເກົາຫລີ ເຕືອນການລະບາດຮອບໃໝ່ຂອງໂຄວິດ-19 ຫລັງມີລາຍງານຜູ້ຕິດເຊື້ອໃໝ່ເພີ່ມ 297 ຄົນໃນວັນທີ 19 ສິງຫາ ເຊິ່ງເປັນຕົວເລກສູງສຸດໃນຮອບ 5 ເດືອນ ຫລື ນັບແຕ່ເກີດກຸ່ມໃໝ່ທີ່ເຊື່ອມໂຍງກັບຜູ້ທີ່ຮ່ວມພິທີໃນໂບດເມືອງແທກູ.
ສຳນັກຂ່າວ Yonhap ລາຍງານວ່າ: ສ.ເກົາຫລີ ພົບກໍລະນີຜູ້ຕິດເຊື້ອໃໝ່ເພີ່ມເກືອບ 1.300 ຄົນໃນອາທິດຜ່ານມາ ເຊິ່ງສ່ວນຫລາຍອາໄສຢູ່ນະຄອນຫລວງເຊອຸນ ແລະ ພື້ນທີ່ອ້ອມຮອບ.
ຮອງລັດຖະມົນຕີກະຊວງສາທາລະນະສຸກຂອງ ສ.ເກົາຫລີ ຂໍການຮ່ວມມືຈາກປະຊາຊົນຢູ່ເມືອງຫລວງໃຫ້ຢູ່ແຕ່ໃນເຮືອນໃນໄລຍະ 2 ອາທິດຂ້າງໜ້າ ແລະ ແນະນຳໃຫ້ອອກຈາກເຮືອນເມື່ອຈຳເປັນເທົ່ານັ້ນ ເຊິ່ງລວມທັງການອອກໄປເຮັດວຽກ, ຊື້ເຄື່ອງທີ່ຈຳເປັນ ແລະ ໄປໂຮງໝໍ.
ສຳລັບກຸ່ມກ້ອນໃໝ່ນັ້ນເຊື່ອມໂຍງກັບຜູ້ທີ່ເດີນທາງໄປໂບດຊາຣາງເຊອິລໃນນະຄອນຫລວງເຊອຸນ ໂດຍລາຍງານຂອງ Yonhap ລະບຸວ່າ: ພົບຜູ້ຕິດເຊື້ອທີ່ກ່ຽວຂ້ອງກັບໂບດດັ່ງກ່າວແລ້ວ 400 ກວ່າຄົນ ລວມທັງ ຈຸນກວາງຮຸນ ບາດຫລວງ ເຊິ່ງເປັນນັກເຄື່ອນໄຫວຂວາຈັດທີ່ນຳຜູ້ປະທ້ວງຊຸມນຸມຕໍ່ຕ້ານປະທານາທິບໍດີ ມຸນແຈອິນ ໃນວັນທີ 15 ສິງຫາຜ່ານມາ ໂດຍບໍ່ສົນຄຳແນະນຳຂອງລັດຖະບານທີ່ໃຫ້ຢູ່ແຕ່ໃນເຮືອນ.
ກະຊວງສາທາລະນະສຸກ ສ.ເກົາຫລີ ເປີດເຜີຍອີກວ່າ: ທາງການໄດ້ດຳເນີນຄະດີອາຍາກັບ ຈຸນ ແລ້ວ ໃນຂໍ້ຫາຝ່າຝືນຄຳສັ່ງໃຫ້ກັກຕົວ ແລະ ຂັດຂວາງເຈົ້າໜ້າທີ່ໃນການຄວບຄຸມການລະບາດຂອງໄວຣັສ.
