ລັດຖະມົນຕີກະຊວງການຕ່າງປະເທດລາວ ສົ່ງໂທລະເລກສະແດງຄວາມເຫັນໃຈຕໍ່ເຫດການນໍ້າຖ້ວມຢູ່ ສປປ ເກົາຫລີ

ໃນວັນທີ 18 ສິງຫານີ້, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສົ່ງໂທລະເລກສະແດງຄວາມເຫັນໃຈ ເຖິງ ສະຫາຍ ຣິ ເຊິນ ກວນ ລັດຖະມົນຕີກະຊວງການຕ່າງປະເທດ ແຫ່ງ ສປປ ເກົາຫລີ, ຕໍ່ເຫດການນໍ້າຖ້ວມຢູ່ແຂວງຮວາງແຮເໜືອ ຂອງປະເທດ.

ໂທລະເລກຂຽນວ່າ: ຂ້າ​ພະ​ເຈົ້າ​ໄດ້ຮັບຂ່າວວ່າໃນຕົ້ນເດືອນ ສິງຫາທີ່ຜ່ານມານີ້ໄດ້ມີຝົນຕົກໜັກຫລາຍມື້ຕໍ່ເນື່ອງກັນ ຢູ່ແຂວງຮວາງແຮເໜືອ ຂອງ ສປປ ເກົາຫລີ, ເຮັດໃຫ້ບ້ານເຮືອນ ແລະ ພື້ນຖານການຜະລິດກະສິກຳຂອງປະຊາຊົນໄດ້ຮັບຄວາມເສຍຫາຍເປັນຈໍານວນຫຼວງຫຼາຍ.

ໃນນາມຕາງໜ້າລັດຖະບານ, ປະຊາຊົນລາວກໍຄືໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນໃຈຢ່າງສຸດຊຶ້ງມາຍັງພັກ-ລັດຖະບານ ແລະ ປະຊາຊົນ ສປປ ເກົາຫລີ ອ້າຍນ້ອງ ແລະ ໂດຍຜ່ານ ສະຫາຍ ໄປຍັງປະຊາຊົນ ແລະ ບັນດາຄອບຄົວຜູ້ທີ່ໄດ້ຮັບຜົນກະທົບຈາກໄພທຳມະຊາດທີ່ຮ້າຍແຮງໃນຄັ້ງນີ້ດ້ວຍ.

ຂ້າພະເຈົ້າ ມີຄວາມເຊື່ອໝັ້ນວ່າ ດ້ວຍຄວາມເອົາໃຈໃສ່ຂອງພັກແຮງງານ ແລະ ລັດຖະບານ ສປປ ເກົາຫລີ, ປະຊາຊົນ ສປປ ເກົາຫລີ ຈະສາມາດຜ່ານຜ່າຄວາມຫຍຸ້ງຍາກໃນຄັ້ງນີ້ ແລະ ຟື້ນຟູຊິວິດການເປັນຢູ່ໃຫ້ກັບຄືນສູ່ສະພາບປົກກະຕິ ໂດຍໄວ.